ભારતની જીત બાદ બદલાઈ ગયા WTC ફાઈનલના સમીકરણો, હવે આ 3 ટીમો વચ્ચે છે સ્પર્ધા

કાનપુર ટેસ્ટમાં બાંગ્લાદેશ સામે ભારતની જીત બાદ વર્લ્ડ ટેસ્ટ ચેમ્પિયનશિપ ફાઈનલના સમીકરણો બદલાઈ ગયા હોય તેવું લાગી રહ્યું છે. ભારતે બે ટેસ્ટ મેચની સિરીઝમાં બાંગ્લાદેશને 2-0થી હરાવ્યું છે. લગભગ 3 દિવસ વરસાદથી પ્રભાવિત થયા બાદ, ભારતે આક્રમક રમત બતાવી અને બીજી ટેસ્ટ મેચ 7 વિકેટે જીતી લીધી. ટીમ ઈન્ડિયા માટે સારી વાત એ છે કે તેણે ટેબલમાં બીજા સ્થાને રહેલી ઓસ્ટ્રેલિયા પર સારી લીડ મેળવી લીધી છે.

WTC પોઈન્ટ ટેબલ

વર્લ્ડ ટેસ્ટ ચેમ્પિયનશિપનું પોઈન્ટ્સ ટેબલ ટકાવારીના આધારે તૈયાર કરવામાં આવે છે. ભારત હાલમાં 74.24 PCT સાથે પ્રથમ ક્રમે છે. બાંગ્લાદેશ સામે સિરીઝ જીત્યા પછી આશા વધી ગઈ છે કે ટીમ ઈન્ડિયા સતત ત્રીજી ફાઈનલ રમવા જઈ રહી છે. બીજા સ્થાને ઓસ્ટ્રેલિયા છે, જેની PCT 62.50 છે અને ત્રીજા સ્થાને શ્રીલંકા છે, જેણે તાજેતરમાં જ ટેસ્ટ શ્રેણીમાં ન્યુઝીલેન્ડને 2-0થી હરાવ્યું છે. શ્રીલંકાની PCT 55.56 છે.

3 ટીમો વચ્ચે ફાઈનલ માટે ટક્કર

હાલમાં ભારત, ઓસ્ટ્રેલિયા અને શ્રીલંકા વચ્ચે ફાઈનલમાં પહોંચવા માટે ટક્કર ચાલી રહી છે. સાઉથ આફ્રિકા પણ આ રેસમાં સામેલ થઈ શકે છે, જેણે આગામી મહિનામાં બાંગ્લાદેશ, શ્રીલંકા અને પછી પાકિસ્તાન સામે ટેસ્ટ સિરીઝ રમવાની છે. જો આફ્રિકન ટીમ આ તમામ મેચ જીતી જાય છે તો તેની PCT 70ને પાર થઈ જશે. પરંતુ જો ઘણી મેચો ડ્રો થાય તો સાઉથ આફ્રિકાને પરિણામ ભોગવવું પડી શકે છે. આથી આફ્રિકા માટે ફાઈનલમાં પહોંચવાનો માર્ગ અસંભવ નથી પરંતુ મુશ્કેલ છે. આવી સ્થિતિમાં ભારત, ઓસ્ટ્રેલિયા અને શ્રીલંકા વચ્ચે ફાઈનલમાં પહોંચવાનો સીધો મુકાબલો છે.

ભારતની આગામી મેચો

બાંગ્લાદેશને 2-0થી હરાવ્યા બાદ ભારત હવે ન્યુઝીલેન્ડની યજમાની કરશે. બંને દેશો વચ્ચે 3 ટેસ્ટ મેચની સિરીઝ 16 ઓક્ટોબરથી શરૂ થશે. જે બાદ ટીમ ઈન્ડિયાએ બોર્ડર-ગાવસ્કર ટ્રોફી માટે ઓસ્ટ્રેલિયાનો પ્રવાસ કરવાનો છે. એવું કહી શકાય છે કે બોર્ડર-ગાવસ્કર ટ્રોફી નક્કી કરશે કે કોણ ફાઈનલમાં જશે અને કોણ નહીં. આ 5 ટેસ્ટ મેચની સિરીઝ 22 નવેમ્બરથી શરૂ થશે.