IND-W vs PAK-W / વિમેન્સ ટીમ પણ પાકિસ્તાની ખેલાડીઓ સાથે નહીં મિલાવે હાથ, આ દિવસે કોલંબોમાં થશે મહામુકાબલો
છેલ્લું અપડેટ : 02 Oct 2025
દુબઈમાં એશિયા કપ દરમિયાન ભારતીય મેન્સ ક્રિકેટ ટીમની જેમ, હરમનપ્રીત કૌર અને તેની ટીમ પણ 5 ઓક્ટોબરે કોલંબોમાં રમાનાર વિમેન્સ વર્લ્ડ કપ મેચ દરમિયાન પાકિસ્તાની ખેલાડીઓ સાથે હાથ મિલાવવાની પરંપરાનું પાલન નહીં કરે.
ભારત-પાકિસ્તાન ક્રિકેટ સંબંધો સૌથી ખરાબ સ્તરે છે. BCCI સૂત્રોના જણાવ્યા અનુસાર, બોર્ડ સરકારના નિર્દેશોનું પાલન કરશે. પરંતુ ટોસ દરમિયાન ભરતીય કેપ્ટન પાકિસ્તાનની કેપ્ટન સાથે હાથ નહીં મિલાવે, મેચ રેફરી સાથે ફોટોશૂટ નહીં થાય અને રમતના અંતે ખેલાડીઓ હાથ નહીં મિલાવે.
વિમેન્સ ટીમ પણ 'નો હેન્ડશેક' નીતિનું પાલન કરશે
વિમેન્સ ટીમ પણ મેન્સ ટીમ દ્વારા અપનાવવામાં આવેલી સમાન નીતિનું પાલન કરશે. કોલંબોમાં ટોસ કોણ કરશે તેના પર પણ નજર રાખવામાં આવશે. એવી અપેક્ષા રાખવામાં આવે છે કે આ ન્યુટ્રલ દેશના ભૂતપૂર્વ ખેલાડી અથવા નિષ્ણાત દ્વારા કરવામાં આવશે. આ વાતાવરણ 2022માં ન્યુઝીલેન્ડમાં રમાયેલા ODI વર્લ્ડ કપ કરતાં સંપૂર્ણપણે અલગ હશે, જ્યાં ભારતીય ખેલાડીઓ બિસ્માહ મારૂફની પુત્રીને પ્રેમ કરતી હોય તેવા ફોટો વાયરલ થયા હતા. આ વખતે, હરમનપ્રીત કૌર અને પાકિસ્તાનની કેપ્ટન ફાતિમા સના વચ્ચેની સામાન્ય વાતચીત થવાની પણ સંભાવના નથી.
પ્રથમ વખત વર્લ્ડ કપ જીતવાનું મિશન
ICC વિમેન્સ વર્લ્ડ કપ 2025માં ભારતીય ટીમે તેના અભિયાનની શરૂઆત જીત સાથે કરી હતી. ટીમ ઈન્ડિયાએ DLSથી શ્રીલંકાને 59 રનથી હરાવીને મેચ જીતી હતી. ભારતે 47 ઓવરની આ મેચમાં શ્રીલંકા માટે 270 રનનો ટાર્ગેટ રાખ્યો હતો. જોકે, શ્રીલંકાની ટીમ 45.4 ઓવરમાં 211 રનમાં ઓલઆઉટ થઈ ગઈ હતી.
તમને જણાવી દઈએ કે, ભારતીય વિમેન્સ ટીમ એક વખત પણ આ વર્લ્ડ કપ નથી જીતી શકી. આવી સ્થિતિમાં હરમનપ્રીતની કેપ્ટનશિપવાળી ટીમ તેના ટાઈટલના દુષ્કાળને સમાપ્ત કરવાના પડકારનો સામનો કરશે.