VIDEO: GT vs RR / કોણ છે ગુજરાત ટાઈટન્સનો અશોક શર્મા? IPL 2026માં સૌથી ઝડપી બોલ ફેંકી ચર્ચામાં આવ્યો
છેલ્લું અપડેટ : 05 Apr 2026
ગુજરાત ટાઈટન્સના 23 વર્ષીય ફાસ્ટ બોલર અશોક શર્માએ રાજસ્થાન રોયલ્સ સામેની મેચમાં હલચલ મચાવી હતી. તેણે 154થી વધુની ઝડપે બોલ ફેંકીને બધાને આશ્ચર્યચકિત કર્યા હતા. આ પછી તેની ઘણી ચર્ચા થઈ રહી છે. તેણે રાજસ્થાન સામેની મેચમાં IPL 2026ની સૌથી ઝડપી બોલ ફેંકી હતી, જેનાથી એનરિક નોર્કિયાનો રેકોર્ડ તૂટ્યો છે.
અશોકે પંજાબ સામે IPLમાં ડેબ્યુ કર્યું હતું. જોકે, તેણે પોતાની બીજી મેચમાં જ ચર્ચા જગાવી છે. અશોક છેલ્લા ઘણા વર્ષોથી ઘણી IPL ફ્રેન્ચાઇઝી સાથે સંકળાયેલો હતો. ગુજરાતે તેને 2026માં સાઈન કર્યો હતો અને તેને ડેબ્યુ કરવાની તક આપી હતી. તેની બીજી મેચમાં અશોકે તેની પ્રતિભા દર્શાવી અને તેની ઝડપી બોલિંગથી બધાને આશ્ચર્યચકિત કરી દીધા.
અશોક શર્મા કોણ છે?
અશોક શર્મા 23 વર્ષીય રાઈટ આર્મ ફાસ્ટ બોલર છે.તેનો જન્મ 17 જૂન, 2002ના રોજ રાજસ્થાનમાં થયો હતો, તેણે પોતાની ગતિ અને બોલ સ્વિંગ કરવાની ક્ષમતાથી ઘણા લોકોને પ્રભાવિત કર્યા છે. અશોક બોલને બંને તરફ સ્વિંગ કરાવી શકે છે. તેણે અગાઉ રાજસ્થાન રોયલ્સ માટે નેટ બોલર તરીકે સેવા આપી હતી. તેણે ટ્રાયલ દરમિયાન કોલકાતા નાઈટ રાઇડર્સને પણ પ્રભાવિત કર્યું હતું અને 2022માં KKR દ્વારા તેને 55 લાખમાં સાઈન કરવામાં આવ્યો હતો.
IPL 2025 દરમિયાન અશોક રાજસ્થાનમાં ગયો હતો, જ્યાં તેણે નેટ બોલર તરીકે સેવા આપી. ત્યારબાદ 2026ના ઓક્શનમાં ગુજરાત દ્વારા તેને 90 લાખ રૂપિયામાં સાઈન કરવામાં આવ્યો હતો. તેનો ડેબ્યુ પંજાબ સામે થયો, જ્યાં તેણે 1 વિકેટ લીધી. રાજસ્થાન સામેની મેચમાં રાઈટ આર્મ ફાસ્ટ બોલરે 4 ઓવરમાં 37 રન આપીને 1 વિકેટ લીધી. તેણે અત્યાર સુધી 11 T20 મેચ રમી છે અને 33 વિકેટ લીધી છે.
IPL 2026નો સૌથી ઝડપી બોલ
અશોકે IPL 2026નો સૌથી ઝડપી બોલ ફેંક્યો હતો. તેણે 154.2 કિમી પ્રતિ કલાકની ઝડપે બોલ ફેંક્યો હતો. અગાઉ એનરિક નોર્કિયાએ લખનૌ સુપર જાયન્ટ્સ સામે 150.9ની ઝડપે બોલ ફેંકીને સિઝનની સૌથી ઝડપી ડિલિવરીનો રેકોર્ડ બનાવ્યો હતો. ત્રીજા સ્થાને કાર્તિક ત્યાગી છે, જેણે 149.7ની ઝડપે બોલ ફેંક્યો હતો.
