નેપાળ પાસેથી છીનવાઈ ગઈ T20 વર્લ્ડ કપની આ મેચ, હિંસક પ્રદર્શનને કારણે વેન્યૂ બદલવાની જાહેરાત
છેલ્લું અપડેટ : 12 Sept 2025
આ વર્ષે નવેમ્બરમાં ભારતમાં યોજાનાર પ્રથમ વિમેન્સ બ્લાઈન્ડ T20 વર્લ્ડ કપ 2025 માટે નેપાળની રાજધાની કાઠમંડુને ન્યુટ્રલ વેન્યૂ તરીકે દૂર કરવામાં આવ્યું છે. નેપાળમાં ચાલી રહેલી રાજકીય અસ્થિરતા અને હિંસક પ્રદર્શનને કારણે આ નિર્ણય લેવામાં આવ્યો છે. આ ટુર્નામેન્ટમાં પાકિસ્તાનની ભાગીદારી માટે હવે એક નવું ન્યુટ્રલ વેન્યૂ શોધવામાં આવી રહ્યું છે. આ ઐતિહાસિક ટુર્નામેન્ટ 11થી 25 નવેમ્બર દરમિયાન યોજાશે, જેમાં ઓસ્ટ્રેલિયા, ઈંગ્લેન્ડ, ભારત, નેપાળ, પાકિસ્તાન, શ્રીલંકા અને અમેરિકાની ટીમો ભાગ લેશે.
પાકિસ્તાનની મેચો નેપાળમાં નહીં યોજાય
આ ટુર્નામેન્ટ નવી દિલ્હી અને બેંગલુરુમાં રમવાની હતી, પરંતુ ભારત અને પાકિસ્તાન વચ્ચેના તણાવને કારણે, કાઠમંડુને પાકિસ્તાનની મેચો માટે ન્યુટ્રલ વેન્યૂ તરીકે પસંદ કરવામાં આવ્યું હતું. ક્રિકેટ એસોસિએશન ફોર ધ બ્લાઈન્ડ ઈન ઈન્ડિયા (CABI) એ તેના નિવેદનમાં જણાવ્યું હતું કે, "કાઠમંડુને ત્રીજા યજમાન શહેર તરીકે પસંદ કરવામાં આવ્યું હતું, જ્યાં પાકિસ્તાનની મેચો યોજાવાની હતી. પરંતુ નેપાળમાં હાલની અશાંત પરિસ્થિતિને ધ્યાનમાં રાખીને, વૈકલ્પિક વેન્યૂ પર વિચાર કરવામાં આવી રહ્યો છે."
તમને જણાવી દઈએ કે, આ પહેલો વિમેન્સ બ્લાઈન્ડ T20 વર્લ્ડ કપ છે, જેમાં 21 લીગ મેચ, બે સેમીફાઈનલ અને એક ફાઈનલ રમાશે. આ ટુર્નામેન્ટમાં સાત દેશોની ટીમો ભાગ લેશે. દેશભરમાં 56 ખેલાડીઓની શોધ કર્યા પછી ટુર્નામેન્ટ માટે ભારતીય ટીમની પસંદગી કરવામાં આવી છે. કેપ્ટન તરીકે દીપિકા ટીસી અને વાઈસ કેપ્ટન તરીકે ગંગા એસ કદમની પસંદગી તેમના અગાઉના પ્રદર્શનના આધારે કરવામાં આવી હતી. ભારતીય વિમેન્સ બ્લાઈન્ડ ટીમે 2023 IBSA વર્લ્ડ ગેમ્સમાં ગોલ્ડ મેડલ જીત્યો હતો જેમાં ક્રિકેટનું ડેબ્યુ થયું હતું. ભારતે ફાઈનલમાં ઓસ્ટ્રેલિયાને હરાવ્યું હતું.
ભારતીય વિમેન્સ ટીમ
B1 કેટેગરી: સિમુ દાસ, પી. કરુણા કુમારી, અનુ કુમારી, જમુના રાની ટુડુ અને કાવ્યા વી.
B2 કેટેગરી: અનેખા દેવી, બસંતી હંસદા, સિમરનજીત કૌર, સુનિતા સરાઠે અને પાર્વતી.
B3 કેટેગરી: દીપિકા ટીસી (કેપ્ટન), ફુલા સોરેન, ગંગા એસ કદમ, કાવ્યા એનઆર, સુષ્મા પટેલ અને દુર્ગા યેવલે.
