ODI વર્લ્ડ કપ 2027 પહેલા સાઉથ આફ્રિકામાં છ મેચની સિરીઝ રમશે ભારતીય ટીમ, જાણો સંપૂર્ણ યોજના
છેલ્લું અપડેટ : 02 Oct 2026
ICCએ આવતા વર્ષે સાઉથ આફ્રિકા, ઝિમ્બાબ્વે અને નામિબિયામાં યોજાનાર ODI વર્લ્ડ કપનું શેડ્યૂલ જાહેર કર્છેયું. ભારતીય ટીમ 7 ઓક્ટોબરે કેપટાઉનમાં ડિફેન્ડિંગ ચેમ્પિયન ઓસ્ટ્રેલિયા સામે ટુર્નામેન્ટની પહેલી ગ્રુપ મેચમાં પોતાના અભિયાનની શરૂઆત કરશે. 2023ના વર્લ્ડ કપ ફાઈનલમાં મળેલી હારને ભૂલીને ભારત ત્રીજી વખત ટાઈટલ જીતવાના ઈરાદા સાથે મેદાનમાં ઉતરશે. ટીમ ઈન્ડિયા વર્લ્ડ કપ પહેલા પોતાની તૈયારીઓને મજબૂત બનાવવા માટે સાઉથ આફ્રિકામાં છ મેચની ODI સિરીઝ રમી શકે છે.
ભારત વર્લ્ડ કપ પહેલા સાઉથ આફ્રિકામાં છ મેચની ODI સિરીઝ રમશે
એક અહેવાલ મુજબ, ભારતીય ટીમ વર્લ્ડ કપની તૈયારી માટે ઘણા સમય પહેલા સાઉથ આફ્રિકા પહોંચી શકે છે. વર્લ્ડ કપની મોટાભાગની મેચ સાઉથ આફ્રિકામાં રમાશે, તેથી ટીમ ઈન્ડિયા યજમાન દેશ સામે સાઉથ આફ્રિકામાં છ મેચની ODI સિરીઝ રમશે. સિરીઝની મેચો જોહાનિસબર્ગ, કેપટાઉન અને સેન્ચુરિયન જેવા મુખ્ય વેન્યુ પર યોજાઈ શકે છે, જ્યાં વર્લ્ડ કપની મેચો પણ રમાશે. જોકે, આ સિરીઝનું શેડ્યૂલ હજુ સુધી જાહેર નથી કરવામાં આવ્યું. સિરીઝ અંગે BCCI અને ક્રિકેટ સાઉથ આફ્રિકા વચ્ચે ચર્ચા ચાલી રહી છે, અને ભારત-સાઉથ આફ્રિકા ODI સિરીઝની તારીખો ટૂંક સમયમાં નક્કી થઈ શકે છે.
વર્લ્ડ કપ પહેલા આ સિરીઝ શા માટે મહત્ત્વપૂર્ણ છે?
સાઉથ આફ્રિકાની પરિસ્થિતિઓ ભારતીય ટીમ માટે એક અનોખો અને પડકારજનક વાતાવરણ રજૂ કરે છે. તેથી, વર્લ્ડ કપ પહેલા ત્યાં શક્ય તેટલી વધુ ODI રમવી એ ટીમ માટે તૈયારીની સારી તક હશે. ખેલાડીઓને ત્યાંની પિચ, હવામાન અને ગ્રાઉન્ડ પરિસ્થિતિઓ સાથે અનુકૂલન સાધવાની તક મળશે. આ સિરીઝ ફાસ્ટ બોલર્સ અને બેટ્સમેન માટે ખાસ મહત્ત્વપૂર્ણ રહેશે. ભારતીય ટીમ વર્લ્ડ કપ દરમિયાન સાઉથ આફ્રિકા અને ઝિમ્બાબ્વેમાં પણ મેચ રમશે, તેથી ટુર્નામેન્ટ પહેલા ત્યાંનો અનુભવ ભારત માટે ખૂબ ઉપયોગી થઈ શકે છે.
2023માં સાઉથ આફ્રિકામાં છેલ્લી ODI સિરીઝ રમી હતી
ભારતીય ટીમે છેલ્લે ડિસેમ્બર 2023માં સાઉથ આફ્રિકામાં ODI સિરીઝ રમી હતી. તે પ્રવાસ પર ભારતે ત્રણ મેચની સિરીઝમાં સાઉથ આફ્રિકાને 2-1થી હરાવ્યું હતું. ભારતે પ્રથમ ODI 8 વિકેટથી જીતી હતી, જ્યારે આફ્રિકન ટીમે બીજી ODIમાં 8 વિકેટથી જીત મેળવી હતી. ત્યારબાદ, ભારતીય ટીમે ત્રીજી અને અંતિમ ODI 78 રનથી જીતીને સિરીઝ સુરક્ષિત કરી હતી.