ટીમ ઈન્ડિયાએ રચ્યો નવો ઈતિહાસ: T20I માં 200મી જીત નોંધાવનારી બની વિશ્વની પ્રથમ ટીમ
છેલ્લું અપડેટ : 23 Sept 2026
ભારતીય ક્રિકેટ ટીમે 22 સપ્ટેમ્બરે એક અત્યંત રોમાંચક મેચમાં જાપાનને 2 રનથી હરાવ્યું છે. આ જીત સાથે જ ભારતે ટી20 ઈન્ટરનેશનલ (T20I) ક્રિકેટમાં એક નવો ઈતિહાસ રચી દીધો છે. ભારતીય ટીમ વિશ્વની પહેલી એવી ટીમ બની ગઈ છે, જેણે ટી20 ઈન્ટરનેશનલ ક્રિકેટમાં પૂરી 200 મેચ જીતી છે, જેમાં સુપર ઓવરની જીત પણ સામેલ છે. આ સિદ્ધિ એટલા માટે પણ મોટી વાત છે કારણ કે ભારતે આ મુકામ માત્ર 291 મેચોમાં હાંસલ કરી લીધો છે. ભારતે પોતાની ટી20 સફરની શરૂઆત વર્ષ 2006માં દક્ષિણ આફ્રિકા સામે કરી હતી.
2006માં ભારતને મળી હતી પહેલી T20I જીત
ટી20 ઈન્ટરનેશનલ ક્રિકેટમાં ભારતની જીતની સફર વર્ષ 2006માં દક્ષિણ આફ્રિકાને હરાવીને શરૂ થઈ હતી. ટીમ ઈન્ડિયાએ વર્ષ 2017માં શ્રીલંકાને હરાવીને પોતાની 50મી જીત નોંધાવી અને 2022માં વેસ્ટ ઈન્ડિઝને માત આપીને 100 જીતનો આંકડો પૂરો કર્યો. આગળ વધતા વર્ષ 2024માં ઓસ્ટ્રેલિયાને હરાવીને ભારતે પોતાની 150મી જીત હાંસલ કરી અને હવે જાપાન સામે મળેલી આ ખાસ જીત સાથે જ ભારતે ટી20 ક્રિકેટમાં પોતાની 200 જીત પૂરી કરી લીધી છે.
ભારત પછી બીજા નંબરે છે પાકિસ્તાન
ટી20 ઈન્ટરનેશનલ ક્રિકેટમાં સૌથી વધુ મેચ જીતવાના મામલે ભારત પછી પાકિસ્તાન બીજા સ્થાને છે. પાકિસ્તાને 299 મેચ રમીને 174 મેચોમાં જીત હાંસલ કરી છે, જ્યારે ભારતીય ટીમે માત્ર 291 મેચોમાં જ 200 જીત નોંધાવી લીધી છે. આ યાદીમાં ન્યુઝીલેન્ડ 137 જીત સાથે ત્રીજા નંબરે છે, તો વળી દક્ષિણ આફ્રિકાએ 131 અને ઈંગ્લેન્ડે 130 T20I મેચ જીતી છે. લગભગ 20 વર્ષની આ સફરમાં ટીમ ઈન્ડિયા 200 જીતના આ જાદુઈ આંકડા સુધી પહોંચવામાં સફળ રહી છે.
ભારતે રોમાંચક અંદાજમાં નોંધાવી 200મી જીત
ટી20 ઈન્ટરનેશનલમાં ભારતની આ 200મી જીત બિલકુલ સરળ નહોતી. વરસાદના કારણે આ મેચ માત્ર 5-5 ઓવરની રમાઈ હતી. પહેલા બેટિંગ કરતા ભારતીય ટીમે 5 ઓવરમાં 32 રન બનાવ્યા હતા. જેના જવાબમાં જાપાનની ટીમ 30 રન જ બનાવી શકી હતી. આ રીતે ભારતે આ રોમાંચક મેચ માત્ર 2 રનથી જીતી લીધી અને ટી20 ક્રિકેટમાં 200 જીત નોંધાવવાનો શાનદાર રેકોર્ડ પોતાના નામે કરી લીધો. હવે ટીમ ઈન્ડિયા એશિયન ગેમ્સમાં રમતી જોવા મળશે.
