ભારતીય T20 કેપ્ટન બન્યા બાદ સૂર્યકુમાર યાદવની પહેલી પ્રતિક્રિયા, ફેન્સ સામે કહી દિલની વાત
ભારતના T20 કેપ્ટન બન્યા બાદ સૂર્યકુમાર યાદવે ઇન્સ્ટાગ્રામ પર પોતાના ફેન્સનો આભાર વ્યક્ત કર્યો
ભારતના T20 કેપ્ટન બન્યા બાદ સૂર્યકુમાર યાદવે ઇન્સ્ટાગ્રામ પર પોતાના ફેન્સનો આભાર વ્યક્ત કર્યો હતો. પોસ્ટના કેપ્શનમાં ઈમોશનલ મેસેજ લખી સૂર્યકુમારે તેને મળેલા પ્રેમ અને સમર્થન માટે ફેન્સનો આભાર વ્યક્ત કર્યો છે. શ્રીલંકા પ્રવાસ માટે રોહિત શર્માની જગ્યાએ સૂર્યકુમારને ભારતનો T20 કેપ્ટન બનાવવામાં આવ્યો છે.
T20Iમાંથી રોહિતની નિવૃત્તિ પછી, સૂર્યકુમારે ભારતનો T20 કેપ્ટન બનવાની રેસમાં હાર્દિક પંડ્યાને પાછળ છોડી દીધો. શુભમન ગિલ વાઈસ કેપ્ટનની ભૂમિકા નિભાવશે. શુભમન ગિલને હાર્દિકની જગ્યાએ ODI અને T20 ટીમનો વાઈસ કેપ્ટન બનાવવામાં આવ્યો છે. જો કે, સ્ટાર ઓલરાઉન્ડર T20 સિરીઝ માટે ખેલાડી તરીકે શ્રીલંકાનો પ્રવાસ કરશે.
સોશિયલ મીડિયા પર ખાસ મેસેજ લખ્યો
સૂર્યકુમારે ઇન્સ્ટાગ્રામ પર લખ્યું, 'તમારા તરફથી મળેલા પ્રેમ, સમર્થન અને શુભકામનાઓ માટે ખૂબ ખૂબ આભાર. છેલ્લા કેટલાંક અઠવાડિયા સપનાથી ઓછા નથી અને હું ખરેખર આભારી છું. દેશ માટે રમવું એ સૌથી ખાસ લાગણી છે જે હું શબ્દોમાં સમજાવી નહીં શકું. આ નવી ભૂમિકા તેની સાથે ઘણી જવાબદારી અને ઉત્સાહ લાવી છે. હું આશા રાખું છું કે મને તમારો સાથ અને આશીર્વાદ મળતા રહેશે. બધી કીર્તિ ભગવાન સુધી પહોંચે છે, ભગવાન મહાન છે.'
કેપ્ટન તરીકે સૂર્યકુમાર યાદવનું પ્રદર્શન
તમને જણાવી દઈએ કે સૂર્યકુમારની કપ્તાનીમાં ભારતે ઓસ્ટ્રેલિયા સામે 5 મેચની T20 સિરીઝ 4-1થી જીતી હતી. તેની કપ્તાનીમાં ભારતે ડિસેમ્બરમાં સાઉથ આફ્રિકા સામેની T20 સિરીઝ પણ 1-1થી બરાબર કરી હતી. ભારત માટે ક્રિકેટમાં ટૂંક સમયમાં એક નવો યુગ શરૂ થશે, કારણ કે સિલેક્ટર્સ અને હેડ કોચ ગૌતમ ગંભીરે સૂર્યકુમાર યાદવને નવી જવાબદારી સોંપી છે.
