'કોઈને કહો નજર ઉતારી દે...', T20 વર્લ્ડ કપ ટીમમાંથી બહાર થયેલા શુભમન ગિલને સુનિલ ગાવસ્કરે આપી સલાહ
છેલ્લું અપડેટ : 21 Dec 2025
ICC મેન્સ T20 વર્લ્ડ કપ 2026 માટે ભારતીય સ્કવોડની પસંદગીએ બધાને આશ્ચર્યચકિત કરી દીધા છે. સાઉથ આફ્રિકા સામેની સિરીઝમાં ટીમના વાઈસ-કેપ્ટન રહેલા શુભમન ગિલને સ્કવોડમાંથી બહાર કરવામાં આવ્યો છે. શુભમન ખરાબ ફોર્મ સાથે સંઘર્ષ કરી રહ્યો છે, જેના કારણે સિલેક્ટર્સે આ કઠિન નિર્ણય લીધો. અક્ષર પટેલને તેના સ્થાને T20 વર્લ્ડ કપ માટે ભારતીય ટીમના વાઈસ-કેપ્ટન તરીકે નિયુક્ત કરવામાં આવ્યો છે. આ નિર્ણયથી ભારતના ભૂતપૂર્વ કેપ્ટન સુનિલ ગાવસ્કર સહિત ઘણા લોકોને આશ્ચર્ય થયું છે.
ટીમની જાહેરાત પર પ્રતિક્રિયા આપતા, સુનિલ ગાવસ્કરે કહ્યું કે તેમને શુભમન ગિલના બાહર થવાની અપેક્ષા નહતી. તેમણે સ્ટાર સ્પોર્ટ્સને કહ્યું, "આ સંપૂર્ણપણે આશ્ચર્યજનક છે."
સુનિલ ગાવસ્કરે શુભમન ગિલની ક્ષમતાઓની પ્રશંસા કરતા કહ્યું કે તે એક ક્લાસિક ખેલાડી છે અને તાજેતરમાં જ તેણે સારું પ્રદર્શન કર્યું છે. ગાવસ્કરે સ્વીકાર્યું કે શુભમનને સાઉથ આફ્રિકા સામેની સિરીઝમાં સંઘર્ષ કરવો પડ્યો હતો, પરંતુ સાથે એમ પણ કહ્યું કે ફોર્મમાં આવતું-જતું રહે છે, પરંતુ ક્લાસ હંમેશા રહે છે.
T20 ક્રિકેટમાં વાપસી સરળ નથી: ગાવસ્કર
સુનીલ ગાવસ્કરે એ પણ સમજાવ્યું કે લાંબી ગેરહાજરી પછી T20 ક્રિકેટમાં પાછા ફરવું સરળ નથી. ગાવસ્કરે કહ્યું, "T20 ફોર્મેટમાં બેટ્સમેન પહેલા બોલથી જ આક્રમક રીતે રમવાની અપેક્ષા રાખે છે અને જો લય ન હોય તો મુશ્કેલી વધે છે. ગિલ પણ તાજેતરમાં આ સમસ્યાનો સામનો કરી રહ્યો છે. ગિલની કુદરતી રમત લાંબા ફોર્મેટ માટે વધુ યોગ્ય છે, જ્યાં સમય અને ગ્રાઉન્ડ શોટ મહત્ત્વપૂર્ણ છે. જોકે, આનો અર્થ એ નથી કે ગિલ T20 માટે અયોગ્ય છે."
એક અંગત કિસ્સો શેર કરતા સુનીલ ગાવસ્કરે ખુલાસો કર્યો કે તેઓ તાજેતરમાં શુભમન ગિલ અને ભારતીય કેપ્ટન સૂર્યકુમાર યાદવ સાથે અમદાવાદથી એક જ ફ્લાઈટમાં મુસાફરી કરી રહ્યા હતા. મુસાફરી દરમિયાન, તેમણે ગિલ પ્રત્યેનો પોતાનો પ્રેમ અને સ્નેહ એમ કહીને વ્યક્ત કર્યો, "ઘરે કોઈને કહો કે ઉતારી દે કારણ કે અમે તેમાં માનીએ છીએ. અમે માનીએ છીએ કે ક્યારેક નજર લાગી જાય છે."
સુનિલ ગાવસ્કરે શુભમન ગિલના IPLમાં પ્રભાવશાળી પ્રદર્શનને યાદ કર્યું, જે તેની T20 ક્ષમતાઓનો પુરાવો છે. ગાવસ્કરે કહ્યું કે, "ગિલ ખૂબ જ સારો ખેલાડી છે અને લોકોએ તેને IPLમાં શાનદાર પ્રદર્શન કરતો જોયો છે, તેથી T20 ફોર્મેટ તેના માટે નવું નથી."
