'અમને તેમની જરૂર છે', ઓસ્ટ્રેલિયા પ્રવાસ પહેલા નવા ODI કેપ્ટન શુભમન ગિલે રોહિત અને વિરાટ અંગે આપ્યું મોટું નિવેદન
છેલ્લું અપડેટ : 09 Oct 2025
હાલમાં ટીમ ઈન્ડિયા શુભમન ગિલની કેપ્ટનશિપ હેઠળ, વેસ્ટ ઈન્ડિઝ સામે બે મેચની હોમ ટેસ્ટ સિરીઝ રમી રહી છે. જેમાં, ટીમ ઈન્ડિયાએ એક મેચ જીતી છે અને સિરીઝમાં 1-0થી આગળ છે. આ ટેસ્ટ સિરીઝ પછી, ટીમ ઇન્ડિયા ઓસ્ટ્રેલિયાનો પ્રવાસ કરશે. રોહિત શર્મા અને વિરાટ કોહલી પણ આ પ્રવાસમાં રમતા જોવા મળશે. બંને અનુભવી ખેલાડીઓ ODI ટીમનો ભાગ છે, જોકે, આ વખતે ફેન્સ રોહિત અને વિરાટને શુભમન ગિલની કેપ્ટનશિપ હેઠળ રમતા જોશે. હવે, ઓસ્ટ્રેલિયા પ્રવાસ પહેલા, કેપ્ટન શુભમન ગિલે રોહિત અને વિરાટ વિશે એક મહત્ત્વપૂર્ણ નિવેદન આપ્યું છે.
શુભમન ગિલે રોહિત અને વિરાટ વિશે શું કહ્યું?
ટીમ ઈન્ડિયા દિલ્હીના અરુણ જેટલી સ્ટેડિયમમાં વેસ્ટ ઈન્ડિઝ સામે બીજી ટેસ્ટ રમશે. આ મેચ પહેલા, જ્યારે કેપ્ટન શુભમન ગિલને તેની વિસ્તૃત ભૂમિકા વિશે પૂછવામાં આવ્યું, ત્યારે તેમણે કહ્યું, "હું રોહિત ભાઈએ ટીમમાં બનાવેલી મિત્રતા અને ધીરજ જાળવી રાખવા માંગુ છું. તેમની જેમ, હું ટીમ અને ડ્રેસિંગ રૂમમાં શાંત વાતાવરણ જાળવવા માંગુ છું."
ગિલે આગળ કહ્યું, "રોહિત અને વિરાટ ભાઈએ ટીમ ઈન્ડિયા માટે ઘણી મેચ જીતી છે. ખૂબ ઓછા લોકો પાસે આટલો અનુભવ અને કૌશલ્ય હોય છે. અમને તેમની જરૂર છે. આ બંને છેલ્લા ઘણા વર્ષોથી ટીમ ઈન્ડિયાના આધારસ્તંભ રહ્યા છે અને તેમના પ્રભાવશાળી પ્રદર્શનથી એકલા હાથે ટીમ માટે મેચ જીતી છે."
ઓસ્ટ્રેલિયા પ્રવાસ માટે 3 મેચની ODI સિરીઝ
ટીમ ઈન્ડિયા 15 ઓક્ટોબરે ઓસ્ટ્રેલિયા માટે રવાના થશે. ટીમ ઈન્ડિયાના ખેલાડીઓ બે બેચમાં ત્યાં પહોંચશે. આ પ્રવાસ બંને ટીમો વચ્ચે 3 મેચની ODI સિરીઝથી શરૂ થશે. સિરીઝની પહેલી મેચ 19 ઓક્ટોબરે પર્થમાં રમાશે, ત્યારબાદ બીજી મેચ 23 અને ત્રીજી મેચ 25 તારીખે રમાશે.
