મેસ્સીની ફેરવેલ પોસ્ટ પર રોનાલ્ડોનો ઈમોશનલ મેસેજ, કહ્યું- ‘તમે જે ઈતિહાસ રચ્યો છે તે હંમેશા યાદ રહેશે’
છેલ્લું અપડેટ : 08 Oct 2026
આર્જેન્ટીનાના સ્ટાર ફૂટબોલર લિયોનેલ મેસ્સીએ 6 ઓક્ટોબરે પોતાની નેશનલ ટીમની જર્સીમાં છેલ્લી વાર મેદાનમાં ઉતર્યો. પોતાની ફેરવેલ મેચ બાદ મેસ્સીએ સોશિયલ મીડિયા પર દુનિયાભરના ફેન્સનો પ્રેમ આપવા બદલ આભાર માન્યો હતો. હવે તેની આ પોસ્ટ પર તેના સૌથી મોટા પ્રતિસ્પર્ધી રહેલા ક્રિસ્ટિયાનો રોનાલ્ડોએ પણ ઈમોશનલ ટ્રિબ્યુટ આપ્યું છે. બેનિન સામે મોન્યુમેન્ટલ સ્ટેડિયમ ખાતે રમાયેલી પોતાની આ છેલ્લી ઈન્ટરનેશનલ મેચમાં મેસીએ શાનદાર પ્રદર્શન કર્યું હતું. તેણે પોતે તો એક ગોલ ફટકાર્યો જ સાથે જ સાથી ખેલાડીઓને બે ગોલ કરવામાં મદદ (આસિસ્ટ) પણ કરી હતી.
મેસ્સીએ ઈન્સ્ટાગ્રામ પર લખી વિદાય પોસ્ટ
આ ફેરવેલ મેચથી પરત ફરતા જ મેસ્સીએ ઇન્સ્ટાગ્રામ પર એક લાંબી પોસ્ટ લખી હતી. તેણે લખ્યું કે અત્યારથી જ આર્જેન્ટીનાની જર્સીની યાદ આવવા લાગી છે. હવે નેશનલ ટીમથી આગળ વધવાનો એકદમ યોગ્ય સમય આવી ગયો છે. આ સાથે જ તેણે પોતાના પરિવારજનો અને ટીમના સાથીઓનો પણ હૃદયપૂર્વક આભાર માન્યો હતો. મેસ્સીએ આ અવસરે આર્જેન્ટીનાના મહાન ફૂટબોલર ડિએગો મારાડોનાને પણ યાદ કર્યા હતા. તેણે કહ્યું કે મારાડોનાના કારણે જ આર્જેન્ટીના ફૂટબોલની દુનિયામાં એક મહાશક્તિ બની શક્યું હતું.
મેસ્સીના નિવૃત્તિના સમાચાર સાંભળીને વર્તમાન અને પૂર્વ તમામ ફૂટબોલર્સે તેને ટ્રિબ્યુટ આપ્યું. પરંતુ તેમાં સૌથી વધુ ધ્યાન રોનાલ્ડોના મેસેજે ખેંચ્યું. મેદાન પર એકબીજાને કાંટાની ટક્કર આપનારા રોનાલ્ડોએ પોતાના રાઈવલ માટે એવો મેસેજ લખ્યો કે વાંચીને દિલ ભરાઈ આવે. પોર્ટુગલના આ સુપરસ્ટારે મેસ્સીની પોસ્ટ પર રિપ્લાય કરતા લખ્યું કે, તમે જે ઈતિહાસ રચ્યો છે, તે હંમેશા યાદ રાખવામાં આવશે. આ સાથે જ તેણે મેસ્સીને વર્ચ્યુઅલી ભેટીને શુભકામનાઓ પણ પાઠવી.
રોનાલ્ડોએ શું લખ્યું?
રોનાલ્ડોએ લખ્યું કે, 'લિયો, આટલા વર્ષો સુધી પોતાના દેશ માટે રમીને તમે એવો ઈતિહાસ રચી દીધો છે જે હંમેશા કાયમ રહેશે. આર્જેન્ટીના સાથે તમે જે પણ સિદ્ધિઓ મેળવી છે, તેના માટે મારા તરફથી ફુલ રિસ્પેક્ટ છે. ખૂબ પ્રેમ.'
જોકે આ પહેલીવાર નથી જ્યારે રોનાલ્ડોએ મેસ્સીને ઈન્સ્ટાગ્રામ પર મેસેજ મોકલ્યો હોય. આ જ વર્ષે ઓગસ્ટમાં જ્યારે મેસ્સીના પિતા જોર્જનું નિધન થયું હતું, ત્યારે પણ રોનાલ્ડોએ આગળ વધીને પોતાની સંવેદના વ્યક્ત કરી હતી.
રોનાલ્ડો vs મેસ્સીનો ઈતિહાસ
મોડર્ન ડે ફૂટબોલની વાત હોય અને રોનાલ્ડો-મેસ્સીની રાઈવલરીનો ઉલ્લેખ ન થાય, એવું તો બની જ ન શકે. આ બંને વચ્ચેની ટક્કરે જ ફૂટબોલને તેની નવી ઓળખ આપી છે. આ કહાનીની શરૂઆત વર્ષ 2007માં થઈ હતી, જ્યારે આ બંને દિગ્ગજ બ્રાઝિલના કાકા સાથે બેલોન ડી'ઓર એવોર્ડની રેસમાં સામેલ હતા.
ત્યારબાદ આગામી 10 વર્ષ સુધી ફૂટબોલની દુનિયામાં માત્ર આ બંનેનો જ દબદબો રહ્યો. દરેક ફિફા બેસ્ટ પ્લેયર અને બેલોન ડી'ઓર એવોર્ડ આ બંને વચ્ચે જ વહેંચાતા રહ્યા. આ રાઈવલરીમાં ખરી સ્પર્ધા ત્યારે શરૂ થઈ જ્યારે રોનાલ્ડો રિયાલ મેડ્રિડની જર્સી પહેરીને સ્પેનમાં મેસીની ટીમ બાર્સિલોના સામે મેદાનમાં ઉતર્યા. ક્લબ ફૂટબોલમાં આ બંને ટીમો વચ્ચે રમાતી 'એલ ક્લાસિકો' મેચનો રોમાંચ જ અલગ બની ગયો અને તેને સૌથી મોટી મેચ માનવામાં આવવા લાગી.
ભલે આ બંને વચ્ચે વિશ્વની સૌથી મોટી પ્રતિસ્પર્ધા રહી હોય, પરંતુ મેદાનની અંદર અને બહાર બંનેએ હંમેશાં એકબીજાનું સન્માન કર્યું છે. ઈન્ટરનેશનલ લેવલ પર આ બંને ધુરંધરો બે વાર સામસામે ટકરાયા છે અને બંનેના ખાતે સરખી રીતે એક-એક જીત નોંધાયેલી છે.