મુશ્કેલીમાં ફસાયો પાકિસ્તાની ક્રિકેટર હૈદર અલી, ઈંગ્લેન્ડમાં દુષ્કર્મના આરોપમાં થઈ ધરપકડ
છેલ્લું અપડેટ : 08 Aug 2025
પાકિસ્તાન ક્રિકેટનો યુવા ખેલાડી હૈદર અલી એક મોટી મુશ્કેલીમાં ફસાઈ ગયો છે. ઈંગ્લેન્ડમાં તેની કથિત દુષ્કર્મના આરોપમાં ધરપકડ કરવામાં આવી હતી. આ ઘટના સામે આવ્યા બાદ PCBએ પણ એક્શન લેતા તેને સસ્પેન્ડ કરવાની જાહેરાત કરી હતી.
શું હતો મામલો?
જોકે આ મામલે હૈદર અલીને જામીન મળી ગયા છે. ગ્રેટ માન્ચેસ્ટર પોલીસે આ મામલે જાણકારી આપતાં કહ્યું કે, "4 ઓગસ્ટ 2025ના રોજ અમને દુષ્કર્મ મામલે એક ફરિયાદ મળી હતી. જેના પર કાર્યવાહી કરતાં 24 વર્ષીય ક્રિકેટરની ધરપકડ કરવામાં આવી હતી. તેના પર આરોપ છે કે 23 જુલાઈ 2025ના રોજ તેણે માનચેસ્ટરમાં એક મહિલા પણ દુષ્કર્મ ગુજાર્યું હતું. જોકે હાલ પૂછપરછ બાદ તેને જામીન આપી દેવામાં આવ્યા છે. પીડિતાને પોલીસ સહાય કરી રહી છે."
PCB એ કરી મોટી કાર્યવાહી
પાકિસ્તાન ક્રિકેટ બોર્ડે તપાસ પૂર્ણ થાય ત્યાં સુધી હૈદર અલીને અસ્થાયી રૂપે સસ્પેન્ડ કરી દીધો છે. PCB એ એક નિવેદનમાં કહ્યું, "PCB યુનાઇટેડ કિંગડમની કાનૂની પ્રક્રિયાઓનું સંપૂર્ણ સન્માન કરે છે અને તપાસને તેના માર્ગે ચાલવા દેવાના મહત્ત્વને સમજે છે. તેથી, PCB એ ચાલુ તપાસના પરિણામ સુધી તાત્કાલિક અસરથી હૈદર અલીને અસ્થાયી રૂપે સસ્પેન્ડ કરવાનો નિર્ણય લીધો છે."