ભારતની આક્રમક ઉજવણી પાક ખેલાડીઓને ખૂંચી, U19 ટીમના સમર્થનમાં BCCIનું નિવેદન
ગત રોજ ઓમાનમાં રમાયેલા અંડર-19 એશિયા કપના રોમાંચક ફાઇનલ મુકાબલામાં પાકિસ્તાનને હરાવ્યા બાદ ભારતીય યુવા ટીમની ઉજવણીની રીતને લઈને સોશિયલ મીડિયા પર મોટી ચર્ચા છેડાઈ છે. એક તરફ જ્યાં કેટલાક લોકો ભારતીય ખેલાડીઓના સમર્થનમાં ઉતર્યા છે, તો બીજી તરફ કેટલાક લોકોનું કહેવું છે કે ખેલના મેદાન પર આ પ્રકારની ઉજવણીથી બચવું જોઈતું હતું. ખાસ કરીને પાકિસ્તાનના ક્રિકેટ ફેન્સ, પૂર્વ ક્રિકેટર્સ અને એક્સપર્ટ્સ ભારતીય ટીમની ઉજવણીની રીત પર સવાલો ઉઠાવી રહ્યા છે.
શું થયું હતું મેદાનમાં?
ફાઇનલ જીત્યા બાદ ભારતીય યુવા ખેલાડીઓએ ખૂબ જ આક્રમક અંદાજમાં ઉજવણી કરી હતી. કેટલાક ખેલાડીઓ પાકિસ્તાની ખેલાડીઓની સામે જઈને ઉજવણી કરતા પણ નજરે પડ્યા. આ દરમિયાન ભારતીય ટીમનો સપોર્ટ સ્ટાફ ખેલાડીઓને શાંત કરાવતો અને તેમને ગ્રાઉન્ડમાંથી બહાર લઈ જતો જોવા મળ્યો. કેટલાક ખેલાડીઓ પાકિસ્તાનની ટીમ તરફ ઈશારા કરતા પણ નજરે પડ્યા હતા.
BCCIનું નિવેદન
ભારતીય ક્રિકેટ કંટ્રોલ બોર્ડ (BCCI)એ પણ આ મુદ્દે પોતાનું નિવેદન જાહેર કર્યું છે. સેક્રેટરી દેવજીત સૈકિયાએ ભારતીય ટીમનું સમર્થન કર્યું છે. તેમણે એક ન્યૂઝ એજન્સી સાથે વાતચીતમાં જણાવ્યું, "આ ભારતીય ટીમનો ઉત્સાહ અને તેમની ફાઇટિંગ સ્પિરિટ દર્શાવે છે. આ મેચ ભારતના હાથમાં ન હતી. જો તમે જોશો તો 280ની આસપાસ આઠ વિકેટ પડી ગઈ હતી અને ઓવરો તથા બોલ પણ ખૂબ ઓછા બચી ગયા હતા. તે સ્થિતિમાંથી ભારતની ટીમ જીતી છે, જેનાથી સ્પષ્ટ થાય છે કે ભારતીય ટીમનો આત્મવિશ્વાસ વધ્યો છે. જે રીતે જીત્યા છે તે રીતે ઉજવણી કરી તે બરોબર છે.
પાકિસ્તાનના પૂર્વ ક્રિકેટર્સની પ્રતિક્રિયા
આ જીત બાદ ભારતીય ટીમની ઉજવણીના અંદાજ પર પાકિસ્તાનના પૂર્વ ક્રિકેટર્સે આલોચના કરી છે. પાકિસ્તાનના પૂર્વ ક્રિકેટર અહમદ શહઝાદે કહ્યું કે 'ટૂર્નામેન્ટ જીતવા બદલ ભારતને અભિનંદન અને શાનદાર પ્રદર્શન સાથે સમગ્ર ટૂર્નામેન્ટમાં શ્રેષ્ઠ ક્રિકેટ રમવા બદલ પાકિસ્તાન અંડર-19 ટીમને પણ શ્રેય જાય છે. જોકે, જીતની ઉજવણી ખુશી સાથે થવી જોઈએ, ન કે આક્રમકતા દેખાડીને કે અકારણ દુશ્મની વધારીને. આ યુવા ખેલાડીઓ છે અને તેમને એ શીખવવું જરૂરી છે કે ખેલની ભાવના જીત અને હારથી ઘણી ઉપર હોય છે.'
આગળ લખ્યું કે કમનસીબે, સિનિયર ખેલાડીઓએ કેટલીક એવી પરંપરાઓને આગળ ધપાવી છે જેને બદલવાની જરૂર છે. હવે સમય આવી ગયો છે કે આપણે ખુદને બદલીએ, વિરોધી ટીમનું સન્માન કરીએ અને ખેલદિલીને અપનાવીએ. ગર્વ સાથે જીતો, પૂરા જોશ સાથે મુકાબલો કરો, પરંતુ હંમેશાં ખેલનું સન્માન કરો.
'આપણે માત્ર ક્રિકેટ નથી રમવાની, આપણે મૂલ્યો સાથે પણ ચાલવાનું છે': પૂર્વ ફાસ્ટ બોલર શોએબ અખ્તર
પાકિસ્તાનના પૂર્વ ફાસ્ટ બોલર શોએબ અખ્તરે એક કાર્યક્રમમાં કહ્યું, "ભારતને અભિનંદન. તેઓ ખૂબ સારું ક્રિકેટ રમ્યા. પરંતુ એક વાત કહીશ કે આપણે માત્ર ક્રિકેટ નથી રમવાની, આપણે મૂલ્યો સાથે પણ ચાલવાનું છે. આજે પણ હું સચિન વિશે સારું બોલું છું. આજે પણ હું તેમને દુનિયાના નંબર વન બેટ્સમેન માનું છું. સેહવાગ, સૌરવ, અમે બધા એકસાથે રમ્યા છીએ. અમે બધા સારા મિત્રો છીએ. અમે ક્યારેય એકબીજા સામે આ રીતે રીએક્ટ નથી કર્યું. હું માનું છું કે તેઓ યુવાન છે, પરંતુ આપણે આપણા બાળકોને સંસ્કારો પણ શીખવવાના છે. ગત મેચમાં ભારતીય ટીમના કેપ્ટને કહ્યું હતું કે તેઓ આપણા કરતા સારું રમ્યા, તેઓ આપણા કરતા સારી ટીમ છે. આ વાત સાંભળીને કેટલો આનંદ આવ્યો! મારું ભારતીય ખેલાડીઓને આ જ સંદેશ છે, આક્રમકતા જરૂર દેખાડો, આ જોઈને ખૂબ સારું લાગ્યું, પરંતુ સાથે જ હું કહેવા માંગીશ કે પાકિસ્તાન સારી ટીમ હતી, આખી ટૂર્નામેન્ટમાં તેઓ સારું રમ્યા."
જીત હોય કે હાર, હંમેશાં સન્માનજનક વ્યવહાર રાખો: પૂર્વ ક્રિકેટર મોહમ્મદ યુસુફ
પાકિસ્તાનના પૂર્વ ક્રિકેટર મોહમ્મદ યુસુફે એક પોસ્ટમાં લખ્યું, "એશિયા કપ અંડર-19 નો અંત થઈ ગયો છે અને હંમેશાની જેમ દબાણના સમયે ભારતે પાકિસ્તાનને હરાવ્યું. આ બંને ટીમો અને તે ખેલાડીઓ માટે શીખવા માટેનું એક શાનદાર પ્લેટફોર્મ હતું, જેમાં ભવિષ્યના સ્ટાર બનવાની ક્ષમતા છે. હું એક વાત કહેવા માંગીશ કે જ્યારે તમે કોઈ રમત રમો છો અથવા કોઈપણ સ્તરે મુકાબલો કરો છો, ત્યારે તમે માત્ર તમારા દેશનું પ્રતિનિધિત્વ નથી કરી રહ્યા હોતા. વાસ્તવમાં, તમે તમારા ઉછેર, તમારા મૂલ્યો અને તે સંસ્કારોનું પણ પ્રતિનિધિત્વ કરી રહ્યા હોવ છો, જે તમારા માતા-પિતાએ બાળપણમાં તમને શીખવ્યા છે. તેથી જીત હોય કે હાર, હંમેશાં સન્માનજનક વ્યવહાર રાખો અને સંયમ જાળવી રાખો. સાચી ખેલદિલી એ વાતથી ઝળકે છે કે પરિણામ ગમે તે હોય, મેદાન પર અને મેદાનની બહાર તમારો વ્યવહાર કેવો છે."
ભારતમાં શું કહી રહ્યા છે લોકો?
ભારતની અંડર-19 ટીમના ખેલાડી મોહિત ઉલવાએ આ મામલે પ્રતિક્રિયા આપતા કહ્યું કે જે પણ રિએક્શન બહાર આવ્યું તે નેચરલ હતું, તેમણે કોઈને દેખાડવા કે જતાવવા માટે નથી કર્યું. મોહિતે કહ્યું, "આવું થવું નેચરલ છે, કારણ કે ભારત-પાકિસ્તાનની મેચ હતી, ફાઇનલ હતી. તેમણે અગાઉ અમને એક મેચ હરાવી હતી અને તેમણે જે કર્યું, તેને અમે અમારા પર હાવી ન થવા દીધું. તેઓએ ત્યારે પોતાની જીત સેલિબ્રેટ કરી હતી, અમને એ વાતથી કોઈ મતલબ ન હતો કે તેઓ શું કરી રહ્યા છે. અમે પણ એવું જ કર્યું અને પોતાની જીતની ઉજવણી કરી રહ્યા હતા, જેમાં આક્રમકતા અને ઇમોશન્સ બંને સામેલ હોય છે. અમે તેમને જતાવવા કે દેખાડવા માટે આ નથી કર્યું."
ભારતના પૂર્વ ક્રિકેટર સંજય માંજરેકરે 'એક્સ' પર લખ્યું, "જો ભારતીય ક્રિકેટ ટીમ મેદાન પર પોતાનું 'આક્રમક વલણ' દેખાડવા માંગતી હોય, તો તેણે હવે પોતાની બરાબરીની ટીમોના ખેલાડીઓને પસંદ કરવા જોઈએ. પાકિસ્તાન હવે એક કમજોર અને આસાન નિશાન બની ગયું છે. મારું સૂચન છે કે ઓસ્ટ્રેલિયા, દક્ષિણ આફ્રિકા, ન્યુઝીલેન્ડ અને ઇંગ્લેન્ડ…"
