Asian Games 2026ની શાનદાર ઓપનિંગ સેરેમની યોજાઈ, મનુ ભાકર અને પવન સેહરાવત બન્યા ભારતના ધ્વજવાહક

એશિયાના સૌથી મોટા રમત મહોત્સવ એટલે કે 20મી એશિયન ગેમ્સનો શનિવારે જાપાનના આઈચી-નાગોયામાં રંગારંગ અને હાઈટેક ઓપનિંગ સેરેમની સાથે સત્તાવાર પ્રારંભ થઈ ગયો છે. મિઝુહો પાર્ક એથ્લેટિક સ્ટેડિયમ ખાતે જાપાનના સમ્રાટ નારુહિતોએ આ રમતોત્સવની સત્તાવાર શરૂઆત જાહેર કરી હતી. આ ભવ્ય પરેડ ઓફ નેશન્સ દરમિયાન ભારતીય દળની આગેવાની ડબલ ઓલિમ્પિક મેડલ વિજેતા નિશાનેબાજ મનુ ભાકર અને સ્ટાર કબડ્ડી પ્લેયર પવન સેહરાવતે હાથમાં તિરંગો લઈને કરી હતી.

આ પણ વાંચો :

ગોલ્ડ મેડલથી લઈને T20 વર્લ્ડ કપ સુધી... અજિત અગરકરના કાર્યકાળ દરમિયાન ટીમ ઈન્ડિયાએ શું જીત્યું?

6,6,6,6,6,6... યુવરાજ સિંહના રેકોર્ડની બરાબરી કરવામાં લાગ્યા 14 વર્ષ, જાણો અત્યાર સુધી કોણે કર્યું છે આ કારનામું

જાપાનના સમ્રાટે કરાવ્યો શંખનાદ, આયોજિત થઈ શાનદાર સેરેમની

આ પણ વાંચો :

ટીમ ઈન્ડિયાના જાપાન રવાના થવામાં અવરોધ! ટીમની કિટે ઉભી કટી મોટી સમસ્યા; જાણો શું છે સમગ્ર મામલો

Asian Games 2026ના મેડલ કોણે ડિઝાઇન કર્યા છે? તેની 5 મુખ્ય વિશેષતાઓ વિશે જાણો

ઓલિમ્પિક કાઉન્સિલ ઓફ એશિયાના પ્રમુખ શેખ જોઆન બિન હમદ અલ થાની અને ઇન્ટરનેશનલ ઓલિમ્પિક કમિટીના પ્રમુખ કિર્સ્ટી કોવેન્ટ્રી તેમજ જાપાની શાહી પરિવારના સભ્યોની ઉપસ્થિતિમાં સમ્રાટ નારુહિતોએ એશિયન ગેમ્સ 2026ને ખુલ્લી મૂકી હતી. 2 કલાક ચાલેલા આ સમારોહની શરૂઆત જાપાનના રાષ્ટ્રગીત અને ધ્વજવંદન સાથે થઈ હતી, જ્યાં જાપાની સેલ્ફ-ડિફેન્સ ફોર્સિસના 9 જવાનો રાષ્ટ્રધ્વજ મંચ પર લાવ્યા હતા. આ સમારોહમાં ગેમ્સના સત્તાવાર મેસ્કોટ 'હોનોહોન' ની વિશેષ પ્રસ્તુતિ થઈ હતી. જાપાનીઝ ભાષામાં "જ્વાળા" માટે વપરાતા પ્રાચીન શબ્દ પરથી આ નામ લેવાયું છે, જે રમતવીરોના જુસ્સા, ઉર્જા અને સપના સાકાર કરવાની અંદરની આગનું પ્રતીક છે.

મનુ ભાકર અને પવન સેહરાવતના હાથમાં ભારતનો ત્રિરંગો

પેલોમા મિઝુહો સ્ટેડિયમમાં ભારતીય ત્રિરંગો લહેરાવતી વખતે પેરિસ ઓલિમ્પિક્સ 2024માં 2 બ્રોન્ઝ મેડલ જીતનારી મનુ ભાકર ભાવુક નજરે પડી હતી. મનુ ભાકરે જણાવ્યું કે, "આટલા મોટા વૈશ્વિક મંચ પર દેશના ધ્વજવાહક બનવું એ મારા માટે અત્યંત ગર્વ અને ભાવનાત્મક ક્ષણ છે. શૂટિંગના શરૂઆતી દિવસોથી લઈને આજ સુધી મળેલા સમર્થન માટે હું સૌની આભારી છું."

મનુ આ ગેમ્સમાં મહિલાઓની 10 મીટર એર પિસ્તોલ, 25 મીટર પિસ્તોલ અને 10 મીટર એર પિસ્તોલ મિક્સ્ડ ટીમ ઇવેન્ટ્સમાં ભાગ લેશે.

બીજી તરફ, કબડ્ડી ટીમનો સુકાની પવન સેહરાવત પણ પુરુષ ધ્વજવાહક તરીકે જોડાયો હતો. અગાઉ શોટ પુટર તજિન્દરપાલ સિંહ તૂરને આ જવાબદારી સોંપાઈ હતી, પરંતુ ટેકનિકલ કારણોસર તેને સમયસર સેરેમોનિયલ કિટ ન મળતાં છેલ્લી ઘડીએ પવન સેહરાવતને પસંદ કરાયો હતો. પવન 2023 હાંગઝોઉ ગેમ્સમાં ગોલ્ડ મેડલ જીતનારી ટીમનો હિસ્સો હતો.

હાંગઝોઉનો સર્વશ્રેષ્ઠ રેકોર્ડ તોડવા ભારત મેદાનમાં

ભારતે આ વખતે 501 સભ્યોની વિશાળ ટુકડી મોકલી છે જે 36 રમતોમાં પડકાર ફેંકશે. ભારતીય ટીમનો લક્ષ્યાંક 2023ના હાંગઝોઉ એશિયન ગેમ્સના પોતાના સર્વશ્રેષ્ઠ પ્રદર્શનને પાર કરવાનો રહેશે, જ્યાં ભારતે 28 ગોલ્ડ સહિત કુલ 106 મેડલ જીતીને મેડલ ટેલીમાં ચોથું સ્થાન મેળવ્યું હતું. ભારત આ વખતે એથ્લેટિક્સ, શૂટિંગ, કુસ્તી, બોક્સિંગ, બેડમિન્ટન ઉપરાંત એસ્પોર્ટ્સ અને ટેકબોલ જેવી નવી રમતોમાં પણ સ્પર્ધા કરી રહ્યું છે.

ક્રિકેટમાં શાનદાર શરૂઆત

હરમનપ્રીત કૌરની આગેવાની હેઠળની ભારતીય મહિલા ક્રિકેટ ટીમે ઓપનિંગ સેરેમની પહેલાં જ યજમાન જાપાનને 8 વિકેટે હરાવીને સેમીફાઈનલમાં પ્રવેશ મેળવી લીધો છે.

ટેકબોલમાં મેડલની આશા

ક્વિમ્સી ડિસોઝા મહિલા સિંગલ્સની સેમીફાઈનલ હારી ગઈ હોવાથી હવે તે બ્રોન્ઝ મેડલ માટે મેદાનમાં ઉતરશે.

કબડ્ડીમાં દબદબો

1990થી અત્યાર સુધી રમાયેલી 9 એશિયન ગેમ્સમાંથી ભારતે 8 વખત ગોલ્ડ મેડલ જીત્યો છે. માત્ર 2018માં બ્રોન્ઝ મળ્યો હતો, પરંતુ 2023માં ઈરાનને 33-29થી હરાવીને ભારતે ટાઈટલ પરત મેળવ્યું હતું.

નવી રમતો અને વિશ્વસ્તરીય પડકારો

આ એશિયન ગેમ્સમાં પરંપરાગત રમતો સાથે ટેકબોલ (ટેબલ ટેનિસ અને ફૂટબોલનું મિશ્રણ) અને વર્ચ્યુઅલ તાઈકવાન્ડો ડેબ્યૂ કરી રહ્યા છે, જ્યારે એસ્પોર્ટ્સનો ફરી સમાવેશ કરાયો છે.

પરેડમાં અફઘાનિસ્તાનની ટુકડી સૌથી પ્રથમ પ્રવેશી હતી, જ્યારે ચીને 800થી વધુ ખેલાડીઓનું સૌથી મોટું દળ ઉતારીને સૌનું ધ્યાન ખેંચ્યું હતું. ટોક્યોમાં યોજાનારી સ્વિમિંગ સ્પર્ધામાં 100 મીટર ફ્રીસ્ટાઇલ વર્લ્ડ રેકોર્ડ હોલ્ડર ચીનનો પાન ઝાનલે અને 13 વર્ષીય સનસનાટી યુ ઝીડી ભાગ લેશે.

કેટલાક દિવસોના સંચાલન વિવાદો અને સ્ટેડિયમમાં ખાલી સીટો હોવા છતાં, હવે બધું ધ્યાન મેદાન પરના મુકાબલાઓ તરફ વળી ગયું છે. રવિવારથી ગોલ્ડ મેડલની સત્તાવાર રેસ શરૂ થશે.