નિકોલસ પૂરને T20 ક્રિકેટમાં બનાવ્યો વર્લ્ડ રેકોર્ડ, આવું કારનામું કરનાર પ્રથમ બેટ્સમેન બન્યો

T20 ક્રિકેટને હંમેશા બેટ્સમેનની રમત માનવામાં આવે છે. અહીં જ્યારે બેટ્સમેન બોલને બાઉન્ડ્રીની પાર મોકલે છે ત્યારે ફેન્સ ખૂબ જ ખુશ થાય છે. ક્રિકેટમાં રેકોર્ડ હંમેશા તૂટવા માટે જ બને છે. પરંતુ હવે વેસ્ટ ઈન્ડિઝના સ્ટાર બેટ્સમેન નિકોલસ પૂરને એક શાનદાર રેકોર્ડ બનાવ્યો છે, જેને તોડવો મુશ્કેલ લાગે છે. પૂરન ક્રિકેટ જગતની મોટાભાગની લીગમાં રમતો જોવા મળે છે. તેની પાસે માત્ર થોડા જ બોલમાં આખી મેચ બદલવાની ક્ષમતા છે અને તે ઝડપી ગતિએ રન બનાવે છે. આ કારણે તમામ ફ્રેન્ચાઈઝી તેને પોતાની ટીમમાં રાખવા માંગે છે.

નિકોલસ પૂરન છેલ્લા કેટલાક સમયથી શાનદાર ફોર્મમાં છે અને કેરેબિયન પ્રીમિયર લીગ 2024માં ઘણા રન બનાવી રહ્યો છે. ટ્રિનબાગો નાઈટ રાઈડર્સ તરફથી રમતા તેણે સેન્ટ કિટ્સ એન્ડ નેવિસ પેટ્રિયોટ્સની ટીમ સામે 43 બોલમાં 93 રનની વિસ્ફોટક ઈનિંગ રમી હતી. આ ઈનિંગ દરમિયાન તેણે 6 ફોર અને 7 સિક્સ ફટકારી હતી. તેના કારણે જ ટ્રિનબાગો નાઈટ રાઈડર્સની ટીમ મેચ જીતી હતી. ખાસ વાત એ હતી કે પૂરન અંત સુધી અણનમ રહ્યો હતો.

T20 ક્રિકેટમાં 150 છગ્ગા પૂરા કર્યા

મેચમાં 7 સિક્સ ફટકારીને, નિકોલસ પૂરને વર્ષ 2024માં T20 ક્રિકેટમાં તેની 150 સિક્સ પૂર્ણ કરી લીધી છે. તે T20 ક્રિકેટના એક કેલેન્ડર વર્ષમાં 150 સિક્સ મારનાર પ્રથમ બેટ્સમેન બની ગયો છે. તેની પહેલા કોઈ આ કરી શક્યું ન હતું. ક્રિસ ગેલે વર્ષ 2015માં T20 ક્રિકેટમાં 135 સિક્સ ફટકારી હતી. હવે પૂરને 9 વર્ષ પછી ગેલનો રેકોર્ડ તોડી નાખ્યો છે અને નવો સિક્સર કિંગ બની ગયો છે.

T20 ક્રિકેટમાં 8000થી વધુ રન

નિકોલસ પૂરને T20 ક્રિકેટમાં અત્યાર સુધી 361 મેચ રમી છે અને કુલ 8032 રન બનાવ્યા છે, જેમાં 2 સદી સામેલ છે. આ દરમિયાન તેણે 563 સિક્સ ફટકારી છે. તે T20 ક્રિકેટના ઈતિહાસમાં સૌથી વધુ સિક્સ મારનાર ખેલાડીની યાદીમાં ચોથા નંબર પર છે.