મોહમ્મદ શમીએ પોતાના પ્રદર્શનથી સિલેક્ટર્સને આપ્યો જડબાતોડ જવાબ, SMAT 2025માં બોલથી મચાવી તબાહી
છેલ્લું અપડેટ : 05 Dec 2025
સૈયદ મુશ્તાક અલી ટ્રોફી (SMAT) 2025માં જ્યાં સિલેક્ટર્સ ઘણા નવા ખેલાડીઓના પ્રદર્શન પર નજર રાખી રહ્યા છે, ત્યાં કેટલાક ખેલાડીઓ એવા પણ છે જે આ ટુર્નામેન્ટમાં પોતાના શાનદાર પ્રદર્શન દ્વારા ટીમ ઈન્ડિયામાં વાપસી કરવાની આશા રાખી રહ્યા છે. આવું જ એક નામ ફાસ્ટ બોલર મોહમ્મદ શમીનું છે, જે ઘણા સમયથી ટીમ ઈન્ડિયામાં વાપસી કરવાનો પ્રયાસ કરી રહ્યો છે. શમીએ 4 ડિસેમ્બરે સર્વિસીસ સામે સૈયદ મુશ્તાક અલી ટ્રોફીની મેચમાં બોલથી ભારે તબાહી મચાવી હતી અને પોતાના પ્રદર્શનથી તેણે ફરી એકવાર સિલેક્ટર્સને જવાબ આપ્યો છે.
શમીએ 4 વિકેટ લીધી
મોહમ્મદ શમી સૈયદ મુશ્તાક અલી ટ્રોફી 2025માં બંગાળ માટે રમી રહ્યો છે, જ્યાં તે હૈદરાબાદના રાજીવ ગાંધી ઇન્ટરનેશનલ ક્રિકેટ સ્ટેડિયમ ખાતે એલિટ ગ્રુપ C મેચમાં સર્વિસીસનો સામનો કરી રહ્યો હતો. આ મેચમાં સર્વિસીસની ટીમ પહેલા બેટિંગ કરવાની આવી હતી, પરંતુ તે 18.2 ઓવરમાં 165 રન બનાવીને ઓલઆઉટ થઈ ગઈ હતી, જેમાં મોહમ્મદ શમીની મોટી ભૂમિકા રહી હતી. શમીએ તેની 3.2 ઓવરમાં માત્ર 13 રન આપીને 4 વિકેટ ઝડપી હતી. જ્યારે રન ચેઝ કરવા ઉતરેલી બંગાળની ટીમે 15.1 ઓવરમાં ફક્ત 3 વિકેટ ગુમાવીને મેચ પોતાનના નામે કરી હતી. શમીને આ મેચમાં શાનદાર પ્રદર્શન કરવા બદલ 'પ્લેયર ઓફ ધ મેચ' જાહેર કરવામાં આવ્યો હતો. મોહમ્મદ શમી અત્યાર સુધી SMAT 2025માં 5 મેચ રમી ચૂક્યો છે, જેમાં તેણે 19.44ની એવરેજથી કુલ 9 વિકેટ લીધી છે.
બંગાળનું અત્યાર સુધીનું પ્રદર્શન પ્રભાવશાળી રહ્યું
એલિટ ગ્રુપ Cમાં રમી રહેલા બંગાળનું અત્યાર સુધી સૈયદ મુશ્તાક અલી ટ્રોફી 2025માં પ્રદર્શન પ્રભાવશાળી રહ્યું છે. ટીમર તેની 5માંથી 4 મેચ જીતી છે અને ફક્ત એક જ હારનો સામનો કરવો પડ્યો છે. બંગાળ હાલમાં -0.014ની નેટ રન રેટ સાથે 16 પોઈન્ટ સાથે ગ્રુપમાં ટોપ પર છે, જેના કારણે તેનું આગામી રાઉન્ડમાં પહોંચવું લગભગ નિશ્ચિત છે. ગ્રુપ સ્ટેજમાં બંગાળ 6 ડિસેમ્બરે પુડુચેરી અને 8 ડિસેમ્બરે હરિયાણા સામે ટકરાશે.