VIDEO: લગ્ન પહેલા મસ્તીના મૂડમાં જોવા મળ્યા કુલદીપ યાદવ અને વંશિકા ચઢ્ઢા, વાયરલ થઈ મહેંદીના ફંક્શનની કલીપ
છેલ્લું અપડેટ : 13 Mar 2026
ભારતનો સ્ટાર સ્પિનર કુલદીપ યાદવ મહેંદીના ફંક્શન દરમિયાન તેની મંગેતર વંશિકા ચઢ્ઢા સાથે ખૂબ જ ખુશ દેખાતો હતો. આ કપલે 4 જૂન, 2025ના રોજ લખનૌમાં સગાઈ કરી હતી. હવે તેઓ 14 માર્ચ, 2026ના રોજ લગ્ન કરશે.
લગ્ન ક્યાં થશે?
પહેલા લગ્ન નવેમ્બર 2025માં યોજવાના હતા, પરંતુ કુલદીપ યાદવના ક્રિકેટ કમીટમેન્ટને કારણે મુલતવી રાખવામાં આવ્યા હતા. આ કપલ શનિવારે મસૂરીની સવોય હોટેલમાં સાત ફેરા લેવા જઈ રહ્યું છે, જેમાં ઘણા ક્રિકેટ સ્ટાર્સ હાજરી આપે તેવી અપેક્ષા છે.
મહેંદીના ફંક્શનનો વીડિયો વાયરલ થયો
કપલના મોટા દિવસ પહેલા શુક્રવાર, 13 માર્ચના રોજ સોશિયલ મીડિયા પર એક વીડિયો વાયરલ થઈ રહ્યો, જેમાં કપલ મસ્તીના મૂડમાં જોવા મળી રહ્યું છે. વીડિયોમાં, વંશિકા કુલદીપ પાસે બેઠી છે અને ડાન્સ કરતી જોવા મળે છે. ફેન્સ આ વીડિયોને ખૂબ પસંદ કરી રહ્યા છે.
T20 વર્લ્ડ કપ ચેમ્પિયન
કુલદીપ યાદવ છેલ્લે 8 માર્ચે પૂરા થયેલા 2026ના T20 વર્લ્ડ કપમાં રમ્યો હતો. જેમાં ભારતે અમદાવાદના નરેન્દ્ર મોદી સ્ટેડિયમમાં ફાઈનલમાં ન્યુઝીલેન્ડને 96 રનથી હરાવીને ટાઈટલ જીત્યું હતું. આ ટુર્નામેન્ટ દરમિયાન કુલદીપે કોલંબોમાં પાકિસ્તાન સામે મેચ રમી હતી, જ્યાં તેણે 3 ઓવરમાં 14 રન આપીને 1 વિકેટ લીધી હતી. લેફ્ટ આર્મ સ્પિનરે 54 T20I મેચ રમી છે, જેમાં 52 ઈનિંગ્સમાં 13.74ની એવરેજ, 11.8 ના સ્ટ્રાઈક રેટ અને 6.95ની ઈકોનોમી સાથે 95 વિકેટ લીધી છે. આમાં બે વખત પાંચ વિકેટ હોલનો સમાવેશ થાય છે.
IPLમાં જોવા મળશે જલવો
કુલદીપ યાદવ ટૂંક સમયમાં મેદાનમાં પાછો ફરશે, IPL 2026 આ મહિનાની 28 તારીખથી શરૂ થઈ રહ્યો છે. તે આ ટુર્નામેન્ટમાં દિલ્હી કેપિટલ્સ ટીમનો ભાગ છે. 2025ની સિઝનમાં, કુલદીપે 13 ઈનિંગ્સમાં 15 વિકેટ લીધી હતી, પરંતુ તેની ટીમ પ્લેઓફ માટે ક્વોલિફાય નહતી થઈ શકી. કુલદીપે 98 IPL મેચ રમી છે, જેમાં 95 ઈનિંગ્સમાં 26.95ની એવરેજ, 20.1ના સ્ટ્રાઈક રેટ અને 8.03ની ઈકોનોમી સાથે 102 વિકેટ લીધી છે, IPLમાં તેનો બેસ્ટ બોલિંગ ફિગર 4/14 છે.