શિખર ધવનને શા માટે કહેવામાં આવે છે મિસ્ટર ICC? 'ગબ્બર'ના આ આંકડાઓથી મળશે જવાબ; જાણો અતૂટ રેકોર્ડ

ભારતીય ક્રિકેટના દિગ્ગજ બેટ્સમેન શિખર ધવને આંતરરાષ્ટ્રીય ક્રિકેટ અને સ્થાનિક ક્રિકેટમાંથી નિવૃત્તિ લઈ લીધી છે. 38 વર્ષનો ધવન લાંબા સમયથી ટીમ ઈન્ડિયાની બહાર હતો. તેણે છેલ્લી ટેસ્ટ 2018માં, છેલ્લી ODI 2022માં અને છેલ્લી T20 ઈન્ટરનેશનલ 2021માં રમી હતી. ધવનને મિસ્ટર ICC તરીકે ઓળખવામાં આવે છે.

શિખર ધવન હવે IPLમાં પણ રમતા જોવા નહીં મળે. તેણે તમામ પ્રકારના ક્રિકેટને અલવિદા કહી દીધું છે. નિવૃત્તિની જાહેરાત કરતી વખતે ધવને કહ્યું, "મારા જીવનમાં એક જ લક્ષ્ય હતું, ભારત માટે રમવાનું. હું આ લક્ષ્યને હાંસલ કરવામાં સફળ રહ્યો, જેના માટે હું ઘણા લોકોનો આભારી છું. હવે મેં આંતરરાષ્ટ્રીય અને સ્થાનિક ક્રિકેટમાંથી પણ નિવૃત્તિ લેવાનું નક્કી કર્યું છે અને હું મારા દેશ માટે ઘણી મેચ રમ્યો તે માટે હું BCCI અને ફેન્સનો પણ આભાર માનું છું."

જાણો શા માટે ધવનને મિસ્ટર ICC કહેવામાં આવે છે

• ICC ચેમ્પિયન્સ ટ્રોફી 2013માં ભારત માટે સૌથી વધુ રન
• ICC ODI વર્લ્ડ કપ 2015માં ભારત માટે સૌથી વધુ રન
• ICC ચેમ્પિયન્સ ટ્રોફી 2017માં ભારત માટે સૌથી વધુ રન
• એશિયા કપ 2018માં ભારત માટે સૌથી વધુ રન
• આંતરરાષ્ટ્રીય ક્રિકેટમાં કુલ 10,867 રન

2013ની ચેમ્પિયન્સ ટ્રોફીમાં ધવનનું પ્રદર્શન

• સાઉથ આફ્રિકા સામે 94 બોલમાં 114 રન
• વેસ્ટ ઈન્ડિઝ સામે 107 બોલમાં અણનમ 102 રન
• પાકિસ્તાન સામે 41 બોલમાં 48 રન
• ICC ચેમ્પિયન્સ ટ્રોફીની સેમિફાઈનલમાં 68 રન
• ICC ચેમ્પિયન્સ ટ્રોફીની ફાઈનલમાં 31 રન

વિવ રિચર્ડ્સ પણ ધવનથી પાછળ 

ICC ODI ટૂર્નામેન્ટમાં શિખર ધવનની એવરેજ (ઓછામાં ઓછા 1000 રન) વિશ્વના દરેક બેટ્સમેન કરતા વધારે છે. આ મામલે ધવન વિવ રિચર્ડ્સ, સૌરવ ગાંગુલી, રોહિત શર્મા અને સઈદ અનવર જેવા મહાન ખેલાડીઓથી આગળ છે. ICC ODI ટૂર્નામેન્ટમાં ધવનની એવરેજ 65.15 રહી છે, જે સૌથી વધુ છે.