ટીમ ઈન્ડિયાને જીત પછી લાગ્યો મોટો ઝટકો, મેચ વિનર ખેલાડી લગભગ 3 અઠવાડિયા માટે ક્રિકેટથી થઈ ગયો દૂર
છેલ્લું અપડેટ : 26 Oct 2025
સિડની ક્રિકેટ ગ્રાઉન્ડ પર ટીમ ઈન્ડિયાએ ઓસ્ટ્રેલિયાને 9 વિકેટથી હરાવ્યું હતું. આ મેચ દરમિયાન, ટીમ ઈન્ડિયાને મોટો ઝટકો લાગ્યો. ટીમનો વાઈસ કેપ્ટન શ્રેયસ અય્યર એક શાનદાર કેચ લેતી વખતે ઈજાગ્રસ્ત થયો હતો, જેના કારણે તેને મેચની વચ્ચે જ મેદાન છોડી દેવું પડ્યું હતું. મેચ સમાપ્ત થયા પછી તેની ફિટનેસ અંગે અપડેટ્સ આવી રહ્યા છે, જે સૂચવે છે કે તે લગભગ ત્રણ અઠવાડિયા માટે રમતથી દૂર થઈ ગયો છે. જોકે, અય્યર મોટી સિરીઝ માટે મેદાનમાં પાછો ફરી શકે છે.
શ્રેયસ અય્યરની ફિટનેસ અંગે અપડેટ
ઓસ્ટ્રેલિયા સામેની ત્રીજી ODIમાં, વિકેટકીપર-બેટ્સમેન એલેક્સ કેરીએ હર્ષિત રાણાના બોલ પર મોટો શોટ મારવાનો પ્રયાસ કર્યો. જ્યારે બોલ હવામાં ગયો, ત્યારે ભારતીય વાઈસ કેપ્ટન શ્રેયસ અય્યરે પાછળ દોડીને કેચ ઝડપ્યો, પરંતુ આ દરમિયાન તેને રિબ કેજ પર ઈજા થઈ. આ પછી અય્યર મેદાનની બહાર જતો રહ્યો હતો અને મેચ પૂરી થઈ ત્યાં સુધી જોવા નહતો મળ્યો.
તેની ફિટનેસ અંગે અપડેટ આપતાં, BCCIના એક અધિકારીએ PTI ને જણાવ્યું હતું કે, "શ્રેયસને મેચ દરમિયાન સ્કેન માટે હોસ્પિટલમાં લઈ જવામાં આવ્યો હતો. પ્રારંભિક પરીક્ષણો સૂચવે છે કે તેને ઝટકો લાગ્યો છે અને તે ઓછામાં ઓછા ત્રણ અઠવાડિયા માટે રમતથી દૂર રહેશે. તેના પરત ફર્યા પછી, તેણે સેન્ટર ઓફ એક્સેલન્સમાં રિપોર્ટ કરવો પડશે. વધુ રિપોર્ટ્સની રાહ જોવામાં આવી રહી છે, ત્યારબાદ જ નક્કી થઈ શકશે કે તેની રિકવરીમાં સમય લાગશે કે નહીં. જો તેને હેરલાઇન ફ્રેક્ચર છે, તો તેમાં વધુ સમય લાગી શકે છે."
આ મોટી સિરીઝ માટે પરત ફરી શકે છે
જો આ રિપોર્ટ્સ પર વિશ્વાસ કરવામાં આવે તો, શ્રેયસ અય્યર 30 નવેમ્બરે ટીમ ઈન્ડિયા માટે ફરીથી રમતો જોવા મળી શકે છે. ભારત અને સાઉથ આફ્રિકા વચ્ચેની સિરીઝની પહેલી મેચ 30 નવેમ્બરે રાંચીમાં રમાશે. અય્યર હાલમાં સારા ફોર્મમાં છે. તેણે ઓસ્ટ્રેલિયા સામેની બીજી ODIમાં 61 રનની શાનદાર ઈનિંગ રમી હતી. અય્યરને હવે વાપસી માટે તેની ફિટનેસ પર સખત મહેનત કરવી પડશે. અય્યર પહેલાથી જ તેની ઈજાને કારણે ઘણો સમય ગુમાવી ચૂક્યો છે. જેના કારણે તે પોતે પણ ટૂંક સમયમાં વાપસી કરવા માંગશે.
