IND vs BAN / કાનપુરમાં ટીમ ઈન્ડિયાએ ટોસ જીતીને કર્યો બોલિંગ કરવાનો નિર્ણય, પ્લેઈંગ 11માં 2 બદલાવ

ભારત અને બાંગ્લાદેશ વચ્ચે બે મેચની ટેસ્ટ સિરીઝની છેલ્લી ટેસ્ટ મેચ આજથી શરૂ થઈ છે. ભારત પ્રથમ ટેસ્ટ જીતીને સિરીઝમાં 1-0થી આગળ છે. બીજી ટેસ્ટ મેચ કાનપુરના ગ્રીન પાર્ક ક્રિકેટ સ્ટેડિયમમાં રમાઈ રહી છે. તેની પિચ કાળી માટીમાંથી તૈયાર કરવામાં આવી છે. ભારતે ટોસ જીતીને પ્રથમ બોલિંગ કરવાનો નિર્ણય લીધો હતો.

રોહિત શર્માએ જણાવ્યું કે શા માટે પહેલા બોલિંગ કરવાનો નિર્ણય કર્યો

ટોસ દરમિયાન રોહિત શર્માએ કહ્યું- "અમે પહેલા બોલિંગ કરવાનો નિર્ણય લીધો છે કારણ કે પીચ થોડી નરમ લાગે છે, અને અમે ઈચ્છીએ છીએ કે અમારા ત્રણ ફાસ્ટ બોલરો તેનો ફાયદો ઉઠાવે અને વહેલી વિકેટ ઝડપે. પ્રથમ મેચમાં અમારી બેટિંગમાં સારી શરૂઆત ન હતી થઈ. તેમ છતાં અમે રન બનાવ્યા હતા અને બોલરોએ શાનદાર પ્રદર્શન કર્યું હતું. અહીં પણ અમે પડકારોનો સામનો કરીશું, પરંતુ અમારી પાસે અનુભવ છે. ટીમમાં કોઈ ફેરફાર કરવામાં આવ્યો નથી."

બાંગ્લાદેશની ટીમમાં બે ફેરફાર

નઝમુલ હુસૈન શાંતોએ ટોસ પછી કહ્યું- "પહેલા બેટિંગ કરીને ખુશ, અમે પહેલા બેટિંગ કરવા માંગતા હતા. જો અમને બેટ્સમેન તરીકે સારી શરૂઆત મળશે, તો અમારે મોટો સ્કોર કરવો પડશે. આશા છે કે અમારા બેટ્સમેન આજે સારું પ્રદર્શન કરશે. આ બેટિંગ માટે સારી પિચ લાગે છે. જોકે નવા બોલ સાથે બેટિંગ કરવી મહત્ત્વપૂર્ણ રહેશે. ટીમમાં બે ફેરફાર કરવામાં આવ્યા છે. નાહિદ અને તસ્કીનને બદલે તૈજુલ અને ખાલિદનો સમાવેશ કરવામાં આવ્યો છે.

બીજી ટેસ્ટ માટે ટીમ ઈન્ડિયાની પ્લેઈંગ ઈલેવન

યશસ્વી જયસ્વાલ, રોહિત શર્મા (કેપ્ટન), શુભમન ગિલ, વિરાટ કોહલી, રિષભ પંત (વિકેટકીપર), કેએલ રાહુલ, રવિન્દ્ર જાડેજા, રવિચંદ્રન અશ્વિન, આકાશ દીપ, જસપ્રિત બુમરાહ, મોહમ્મદ સિરાજ.

બીજી ટેસ્ટ માટે બાંગ્લાદેશની પ્લેઈંગ ઈલેવન

શાદમાન ઇસ્લામ, ઝાકિર હસન, નઝમુલ હુસૈન શાંતો (કેપ્ટન), મોમિનુલ હક, મુશફિકુર રહીમ, શાકિબ અલ હસન, લિટન દાસ (વિકેટકીપર), મેહદી હસન મિરાજ, તૈજુલ ઇસ્લામ, હસન મહમૂદ, ખાલિદ અહેમદ.

બે મેચની ટેસ્ટ શ્રેણીમાં ભારત 1-0થી આગળ છે

પ્રથમ ટેસ્ટ મેચ 19 સપ્ટેમ્બરે શરૂ થઈ હતી, જેમાં ભારતે બાંગ્લાદેશ સામે મોટી જીત હાંસલ કરી હતી. ભારત પ્રથમ ટેસ્ટ મેચ ચોથા દિવસે 280 રનથી જીતવામાં સફળ રહ્યું હતું. આ ટેસ્ટમાં રવિચંદ્રન અશ્વિનને પ્લેયર ઓફ ધ મેચનો એવોર્ડ મળ્યો હતો. અશ્વિને પ્રથમ ઈનિંગમાં 133 બોલમાં 113 રન બનાવ્યા હતા, પરંતુ તેને એક પણ વિકેટ મળી ન હતી. અશ્વિનને બીજી ઈનિંગમાં બેટિંગ કરવાની તક ન હતી મળી, પરંતુ બોલિંગમાં તેણે 21 ઓવરમાં 4.19ની ઈકોનોમી સાથે 6 વિકેટ ઝડપી હતી.