T20 વર્લ્ડ કપ 2024માં પૂરી થઈ 10 ટીમોની સફર, હવે આ ચારમાંથી બે બહાર થશે

આ વખતે T20 વર્લ્ડ કપ 2024માં 20 ટીમો ભાગ લઈ રહી છે. આ જ કારણે વર્લ્ડકપમાં રોજ નવા નવા રેકોર્ડ બની રહ્યા છે અને તૂટી રહ્યા છે. ફેન્સને પણ રોમાંચક મેચો જોવા મળી રહ્યા છે. હાલમાં ચાલી રહેલા T20 વર્લ્ડ કપમાં ગ્રુપ સ્ટેજ લગભગ સમાપ્ત થવાને આરે છે. અત્યાર સુધીમાં 6 ટીમ સુપર-8 માટે ક્વોલિફાય થઈ છે. આ ટીમોમાં ભારત, અમેરિકા, સાઉથ આફ્રિકા, વેસ્ટ ઈન્ડિઝ, અફઘાનિસ્તાન અને ઓસ્ટ્રેલિયાની ટીમો સામેલ છે. જ્યારે 10 ટીમ સુપર-8માં ક્વોલિફાય કરવામાં નિષ્ફળ રહી છે.

પાકિસ્તાન અને ન્યુઝીલેન્ડનું પ્રદર્શન ખૂબ જ ખરાબ રહ્યું હતું

બાબર આઝમની કેપ્ટન્સીમાં પાકિસ્તાની ટીમ ટી20 વર્લ્ડ કપ 2024માં ખાસ પ્રદર્શન કરી શકી નથી. ટીમ તેની પ્રથમ મેચ અમેરિકા સામે સુપર ઓવરમાં હારી ગઈ હતી. આ પછી ભારતીય ટીમ સામે પાકિસ્તાનનો 6 રને પરાજય થયો હતો. આ મેચોમાં હાર બાદ પાકિસ્તાની ટીમ રિકવર કરી શકી નથી. જ્યારે વરસાદના કારણે આયર્લેન્ડ અને અમેરિકા વચ્ચેની મેચ રદ્દ થવાને કારણે પાકિસ્તાની ટીમ સુપર-8માં પહોંચી શકી નથી.

ન્યુઝીલેન્ડની ટીમે વર્તમાન T20 વર્લ્ડ કપ 2024માં 3 મેચ રમી છે, જેમાંથી ટીમ માત્ર એક જ મેચ જીતવામાં સફળ રહી હતી. ન્યૂઝીલેન્ડ અફઘાનિસ્તાન સામે 84 રને અને વેસ્ટ ઈન્ડિઝ સામે 13 રને હારી ગયું હતું. સતત બે મેચ હાર્યા બાદ ન્યૂઝીલેન્ડની ટીમ T20 વર્લ્ડ કપ 2024ના સુપર-8 રાઉન્ડમાં જગ્યા બનાવી શકી નથી. પાકિસ્તાન અને ન્યુઝીલેન્ડ ઉપરાંત કેનેડા, આયર્લેન્ડ, નામીબિયા, ઓમાન, યુગાન્ડા, પાપુઆ ન્યુ ગીની, નેપાળ અને શ્રીલંકાની ટીમો પણ સુપર-8માં સ્થાન મેળવી શકી નથી.

ઈંગ્લેન્ડ અને સ્કોટલેન્ડમાંથી એક ટીમ ક્વોલિફાય થશે

ગ્રુપ-Bમાંથી માત્ર ઓસ્ટ્રેલિયન ટીમ જ સુપર-8 માટે ક્વોલિફાય થઈ શકી છે. આ ગ્રુપમાંથી સ્કોટલેન્ડ અને ઈંગ્લેન્ડની ટીમો સુપર-8ની રેસમાં યથાવત છે. સ્કોટલેન્ડે તેની છેલ્લી મેચ ઓસ્ટ્રેલિયા સામે રમવાની છે. જો સ્કોટલેન્ડ આ મેચ જીતશે તો તે સુપર-8 માટે ક્વોલિફાય થઈ જશે. આ સાથે જ ઈંગ્લેન્ડને સુપર-8માં પહોંચવા માટે તેની છેલ્લી મેચ જીતવી પડશે. આવી સ્થિતિમાં આ ગ્રુપમાંથી માત્ર એક જ ટીમ સુપર-8 રાઉન્ડમાં પહોંચી શકે છે.

નેધરલેન્ડ અને બાંગ્લાદેશમાંથી એક ટીમ આગળ જશે

બીજી તરફ ગ્રુપ-Dમાંથી અત્યાર સુધી માત્ર સાઉથ આફ્રિકાની ટીમ જ સુપર-8 માટે ક્વોલિફાય થઈ શકી છે. આ ગ્રુપમાંથી બાંગ્લાદેશ અને નેધરલેન્ડની ટીમો સુપર-8માં પહોંચવાની મોટી દાવેદાર છે. બાંગ્લાદેશ તેની છેલ્લી મેચ નેપાળ સામે રમશે. આ મેચ જીતીને બાંગ્લાદેશ સરળતાથી સુપર-8માં પહોંચી શકે છે. નેધરલેન્ડને આગામી રાઉન્ડમાં પહોંચવા માટે શ્રીલંકા સામેની મેચ મોટા અંતરથી જીતવી પડશે. આ સિવાય બાંગ્લાદેશ મેચ હારે તો જ નેધરલેન્ડ સુપર-8માં પહોંચી શકે છે. આવી સ્થિતિમાં નેધરલેન્ડ અને બાંગ્લાદેશમાંથી માત્ર એક જ ટીમ સુપર-8માં પહોંચી શકે છે.