IND-W vs AUS-W / બીજી ODIમાં હાર બાદ ઓસ્ટ્રેલિયન ટીમને લાગ્યો ઝટકો, ICC એ ખેલાડીઓને ફટકાર્યો દંડ
છેલ્લું અપડેટ : 19 Sept 2025
ઓસ્ટ્રેલિયન વિમેન્સ ટીમ ત્રણ મેચની ODI સિરીઝ માટે ભારતના પ્રવાસે છે. તેણે પ્રથમ ODI 8 વિકેટથી જીતી હતી. ત્યારબાદ ભારતીય વિમેન્સ ટીમે બીજી ODIમાં જોરદાર વાપસી કરીને 102 રનથી મેચ જીતી, જે ODI ક્રિકેટમાં ઓસ્ટ્રેલિયન વિમેન્સ ટીમની સૌથી મોટી હાર હતી. આ હાર બાદ, ઓસ્ટ્રેલિયાને વધુ એક મોટો ઝટકો લાગ્યો છે, બીજી ODIમાં સ્લો ઓવર-રેટ માટે તેની મેચ ફીના 10 ટકાનો દંડ ફટકારવામાં આવ્યો છે.
ઓસ્ટ્રેલિયન કેપ્ટને ભૂલ સ્વીકારી
ભારતીય વિમેન્સ ટીમ અને ઓસ્ટ્રેલિયન વિમેન્સ ટીમ વચ્ચેની બીજી ODI મુલ્લાનપુરના મહારાજા યાદવિન્દ્ર સિંહ આંતરરાષ્ટ્રીય ક્રિકેટ સ્ટેડિયમ ખાતે રમાઈ હતી. ઓસ્ટ્રેલિયાને નિર્ધારિત સમય પર બે ઓવર ઓછી ફેંકવા બદલ દોષી ઠેરવવામાં આવ્યું હતું. મેચ બાદ, ઓસ્ટ્રેલિયન કેપ્ટન એલિસા હેલીએ પોતાની ભૂલ સ્વીકારી. ખેલાડીઓને નિર્ધારિત સમયની અંદર ફેંકવામાં ન આવતી દરેક ઓવર માટે તેમની મેચ ફીના 5 ટકા દંડ ફટકારવામાં આવ્યો છે. આ દંડ ઓન-ફિલ્ડ અમ્પાયર વૃંદા રાઠી અને જનની નારાયણન, થર્ડ અમ્પાયર લોરેન એજેનબેગ અને ફોર્થ અમ્પાયર ગાયત્રી વેણુગોપાલન દ્વારા ફટકારવામાં આવ્યો હતો.
સ્મૃતિ મંધાનાએ સદી ફટકારી
બીજી ODIમાં ભારતીય વિમેન્સ ટીમ માટે સ્મૃતિ મંધાનાએ શાનદાર પ્રદર્શન કર્યું. તેણે 117 રન બનાવ્યા, જે તેની 12મી ODI સદી હતી. દીપ્તિ શર્માએ પણ 40 રનનું યોગદાન આપ્યું. આ બે ખેલાડીઓને કારણે જ ભારતીય વિમેન્સ ટીમ 292 રન બનાવવામાં સફળ રહી. ઓસ્ટ્રેલિયન ટીમ માટે એલિસ પેરીએ 44 રન અને એનાબેલ સધરલેન્ડે 45 રન બનાવ્યા. બાકીની ખેલાડીઓ સારું પ્રદર્શન કરવામાં નિષ્ફળ રહી અને ટીમ માત્ર 190 રનમાં ઓલઆઉટ થઈ ગઈ. ભારત માટે ક્રાંતિ ગૌડે સૌથી વધુ 3 વિકેટ લીધી.
ત્રીજી ODI દિલ્હીમાં રમાશે
બીજી ODIમાં જીત સાથે, ભારતીય વિમેન્સ ટીમે 3 મેચની ODI સિરીઝ 1-1થી બરાબર કરી લીધી. બંને ટીમો વચ્ચેની ત્રીજી ODI હવે 20 સપ્ટેમ્બરે દિલ્હીના અરુણ જેટલી ક્રિકેટ સ્ટેડિયમમાં રમાશે, જ્યાં સિરીઝનો નિર્ણય થશે.
