IPLમાં ખેલાડીઓના જર્સી નંબર કેવી રીતે નક્કી થાય છે, શું છે તેને લગતા નિયમો?

દેશમાં ઈન્ડિયન પ્રીમિયર લીગ (IPL) ની 17મી સિઝન ચાલી રહી છે. મેચ દરમિયાન દેશના ક્રિકેટ પ્રેમીઓની નજર હંમેશા ટીવી કે ફોન સ્ક્રીન પર જ રહે છે. પરંતુ શું તમે જાણો છો કે ખેલાડીઓ મેચ દરમિયાન જે પણ ટી-શર્ટ (જર્સી) પહેરે છે તેની પાછળ લખેલા નંબર કેવી રીતે નક્કી થાય છે. જો નહીં, તો આજે અમે તમને જણાવીશું કે ખેલાડીઓને આ નંબર કેવી રીતે મળે છે.

ખેલાડીઓની ઓળખ છે જર્સી નંબર

ક્રિકેટ જગતમાં સમયની સાથે જર્સી નંબર ખેલાડીઓની ઓળખ બની ગયો છે. ટીમ ઈન્ડિયાના વર્તમાન કેપ્ટન રોહિત શર્મા 45 નંબરની જર્સી પહેરે છે જ્યારે પૂર્વ કેપ્ટન વિરાટ કોહલીનો જર્સી નંબર 18 છે. અનુભવી ક્રિકેટર મહેન્દ્ર સિંહ ધોની 7 નંબરની જર્સી પહેરતો હતો. મોટાભાગના ભારતીયો માટે ક્રિકેટના ભગવાન તરીકે જાણીતા સચિન તેંડુલકરની જર્સીનો નંબર 10 હતો.

પરંતુ સવાલ એ છે કે ક્રિકેટરોને તેમની જર્સીની પાછળ લખેલા નંબર કેવી રીતે મળે છે? શું આ નંબર ભારતીય ખેલાડીઓને દેશના બોર્ડ એટલે કે BCCI દ્વારા આપવામાં આવે છે કે પછી ખેલાડીઓ પોતાના નંબર જાતે નક્કી કરે છે? શું ભૂતપૂર્વ ક્રિકેટર સચિન તેંડુલકરનો જર્સી નંબર અન્ય કોઈ ખેલાડી મેળવી શકે છે? અથવા અન્ય કોઈ ખેલાડી મહેન્દ્ર સિંહ ધોનીનો જર્સી નંબર 7 મેળવી શકે છે?

આ રીતે મળે છે જર્સી નંબર

માહિતી અનુસાર, આ અંગે કોઈ સ્પષ્ટ નિયમ નથી. જર્સી નંબર સામાન્ય રીતે ટીમ મેનેજમેન્ટ દ્વારા નક્કી કરવામાં આવે છે. બોર્ડની આ બાબતમાં કોઈ દખલગીરી હોતી નથી. ખેલાડીઓ ઈચ્છે તે જર્સી નંબર પસંદ કરવા માટે સ્વતંત્ર છે. પરંતુ ટીમના અન્ય ખેલાડીઓ પાસે તે નંબરની જર્સી ન હોવી જોઈએ. ખેલાડીઓ તેમની પસંદગી મુજબ આ નંબર નક્કી કરે છે. પરંતુ બોર્ડ અથવા ટીમ મેનેજમેન્ટ કેટલાક નંબરોને લઈને ઇનકાર કરી શકે છે. ઉદાહરણ તરીકે, અત્યાર સુધી સચિન અને ધોનીના જર્સી નંબર ભારતીય ક્રિકેટ ટીમના અન્ય કોઈ ખેલાડીને આપવામાં આવ્યા નથી. આ બંને ખેલાડીઓ ઇન્ટરનેશનલ ક્રિકેટમાંથી નિવૃત્ત થઈ ગયા છે. પરંતુ જ્યારે ધોની IPL મેચો રમે છે ત્યારે તે 7 નંબરની જર્સી સાથે રમે છે.

એક કરતા વધારે ખેલાડી સમાન નંબરની જર્સી પહેરી શકે છે?

તમને જણાવી દઈએ કે IPLમાં કોઈપણ ટીમનો ખેલાડી કોઈપણ નંબરની જર્સી પહેરવા માટે સ્વતંત્ર છે, પરંતુ તે જ ટીમના અન્ય કોઈ ખેલાડીની પાસે તે નંબરની જર્સી ન હોવી જોઈએ. ઉદાહરણ તરીકે, ગુજરાત ટાઇટન્સના કેપ્ટન શુભમન ગિલ ભારતીય ક્રિકેટ ટીમમાં 77 નંબરની જર્સી પહેરે છે. પરંતુ IPL મેચમાં તે ગુજરાત ટાઇટન્સ માટે 7 નંબરની જર્સી પહેરે છે, જ્યારે એમએસ ધોની પણ ચેન્નાઈ તરફથી 7 નંબરની જર્સી પહેરીને રમે છે.