IPL 2027 પહેલા મુંબઈ ઈન્ડિયન્સમાં જોડાયો RRનો ભૂતપૂર્વ કોચ સ્ટીફન જોન્સ, ફ્રેન્ચાઈઝીમાં આ મોટી જવાબદારી મળી
IPL 2027 પહેલા મુંબઈ ઇન્ડિયન્સ પરિવર્તનના સમયગાળામાંથી પસાર થઈ રહી છે. તાજેતરમાં MIએ મહેલા જયવર્ધનેની વિદાયની જાહેરાત કરી અને કિરોન પોલાર્ડને તેના નવા હેડ કોચ તરીકે નિયુક્ત કયો. હવે મુંબઈ ઈન્ડિયન્સે તેના કોચિંગ સ્ટાફમાં વધુ એક સભ્યનો ઉમેરો કર્યો છે. તેણે રાજસ્થાન રોયલ્સના ભૂતપૂર્વ હાઈ-પર્ફોર્મન્સ કોચ સ્ટીફન જોન્સને કોચિંગ સ્ટાફના ભાગ રૂપે નિયુક્ત કર્યો છે. આગામી સિઝન પહેલા સ્ટીફનને મહત્ત્વપૂર્ણ ભૂમિકા સોંપવામાં આવી છે.
સ્ટીફન જોન્સ MIમાં જોડાયો
એક અહેવાલ મુજબ, સ્ટીફન જોન્સ MIના ડેવલપમેન્ટ પ્રોગ્રામમાં બોલિંગ આસિસ્ટન્ટ તરીકે મુંબઈ ઈન્ડિયન્સમાં જોડાયો છે. 52 વર્ષીય ખેલાડી ઝુબિન ભરૂચાના નેતૃત્વમાં MIની ડેવલપમેન્ટ સ્કવોડ સાથે કામ કરશે. તે મુંબઈ ઇન્ડિયન્સ સાથે પર્ફોર્મન્સ ડિરેક્ટર તરીકે જોડાયો છે.
સ્ટીફન જોન્સે 2019માં RRના ફાસ્ટ બોલિંગ કોચ તરીકે સેવા આપી હતી. ત્યારબાદ તેને 2022માં રાજસ્થાન રોયલ્સમાં હાઈ-પર્ફોર્મન્સ બોલિંગ કોચ તરીકે પાછો બોલાવવામાં આવ્યો હતો. રિપોર્ટમાં એમ પણ કહેવામાં આવ્યું છે કે ભરૂચા અને જોન્સ વર્તમાન સ્થાનિક સિઝન દરમિયાન ભારતીય ખેલાડીઓ સાથે કામ કરશે.
સ્ટીફન જોન્સ કોણ છે?
વેલ્સમાં જન્મેલો સ્ટીફન જોન્સ રાઈટ આર્મ ફાસ્ટ બોલર હતા. તે 14 વર્ષ ઈંગ્લિશ કાઉન્ટી ક્રિકેટમાં રમ્યો. તેણે 148 ફર્સ્ટ-ક્લાસ મેચોમાં 387 વિકેટ લીધી. તેણે પોતાની કારકિર્દી દરમિયાન 10 વખત એક ઈનિંગમાં પાંચ વિકેટ પણ લીધી. લિસ્ટ A અને T20 ક્રિકેટમાં તેનો પ્રભાવશાળી રેકોર્ડ હતો, તેણે તેની સ્થાનિક કારકિર્દીમાં 691 વિકેટ લીધી.
જોન્સે તાજેતરમાં ભારતીય ફાસ્ટ-બોલિંગ ઓલરાઉન્ડર નીતિશ કુમાર રેડ્ડી સાથે કામ કર્યું હતું. તેણે રેડ્ડીના કૌશલ્યને સુધારવામાં મુખ્ય ભૂમિકા ભજવી હતી. હવે તે મુંબઈ ઈન્ડિયન્સ સાથે કામ કરશે.
MIનો નવો યુગ શરૂ થાય છે
કિરોન પોલાર્ડ 2010માં મુંબઈ ઇન્ડિયન્સ સાથે જોડાયો હતો. તે 2022 સુધી એક ખેલાડી તરીકે ટીમ સાથે રહ્યા અને પછી બેટિંગ કોચ તરીકે કામ કરવાનું શરૂ કર્યું. મહેલા જયવર્ધનેના મુંબઈ ઈન્ડિયન્સ છોડ્યા પછી, દરેકને જાણવાની ઉત્સુકતા હતી કે આગામી હેડ કોચ કોણ બનશે. મુંબઈ ઈન્ડિયન્સે તેના બેટિંગ કોચ કિરોન પોલાર્ડને હેડ કોચ તરીકે બઢતી આપી છે. હવે મુંબઈ ઈન્ડિયન્સ માટે એક નવા યુગની શરૂઆત થઈ છે અને પોલાર્ડના કાર્યકાળ પર નજીકથી નજર રાખવામાં આવશે.
