ભારતીય ખેલાડીનું ઐતિહાસિક કારનામું, એક જ મેચમાં બે સદી ફટકારીને બનાવ્યો વર્લ્ડ રેકોર્ડ

ભારતમાં ઘરેલુ ક્રિકેટમાં મહિલા મલ્ટી-ડે ચેલેન્જર ટ્રોફી રમાઈ રહી છે. આ ટ્રોફીમાં કુલ ચાર ટીમો ભાગ લઈ રહી છે. જેમાં ટીમ-એ, ટીમ-બી, ટીમ-સી અને ટીમ-ડીનો સમાવેશ થાય છે. આમાં, ટીમ-એ અને ટીમ-સી વચ્ચે રમાયેલી મેચ ડ્રો રહી હતી. ટીમ-સી તરફથી તનુશ્રી સરકારે મેચમાં શાનદાર પ્રદર્શન કર્યું છે અને બંને ઈનિંગ્સમાં સદી ફટકારીને ઐતિહાસિક સિદ્ધિ હાંસલ કરી છે.

મહિલા ફર્સ્ટ ક્લાસ ક્રિકેટમાં પહેલીવાર બન્યું

તનુશ્રી સરકાર મહિલા ફર્સ્ટ-ક્લાસ મેચની બંને ઈનિંગ્સમાં સદી ફટકારનારી પ્રથમ મહિલા ખેલાડી બની છે. તેણે પોતાની ઉત્તમ બેટિંગથી આ વર્લ્ડ રેકોર્ડ બનાવ્યો છે. વિશ્વભરમાં ઘરેલુ ક્રિકેટમાં મહિલા ખેલાડીઓ માટે બહુ ઓછી ફર્સ્ટ-ક્લાસ મેચો રમાય છે. આ કારણોસર, આજ સુધી આ રેકોર્ડ બન્યો નથી. તનુશ્રીએ પહેલી ઈનિંગમાં 153 રન અને બીજી ઈનિંગમાં 102 રનની અણનમ ઈનિંગ રમી હતી.

ટીમ-સી માટે તનુશ્રી સરકાર પ્રથમ ઈનિંગમાં ત્રીજા નંબરે બેટિંગ કરવા આવી હતી. ત્યારે તેણે 278 બોલમાં 21 ચોગ્ગા અને એક છગ્ગાની મદદથી કુલ 153 રન બનાવ્યા હતા. તેના સિવાય કેપ્ટન જેમિમા રોડ્રિગ્ઝે પણ 71 રનની શાનદાર ઈનિંગ રમી હતી. આ બે મહિલા બેટ્સમેનોના કારણે જ ટીમે પ્રથમ ઈનિંગમાં 313 રનનો મોટો સ્કોર બનાવ્યો હતો.

તનુશ્રીએ બીજી ઈનિંગમાં પણ સદી ફટકારી

આ પછી, ટીમ-એની પ્રથમ ઈનિંગમાં 305 રન બન્યા અને આ રીતે ટીમ-સીને પ્રથમ ઈનિંગના આધારે 8 રનની લીડ મળી. આ પછી, ટીમ-સી માટે તનુશ્રી સરકારે બીજી ઈનિંગમાં વિસ્ફોટક બેટિંગ કરી. તેણે 184 બોલમાં 102 રન બનાવ્યા, જેમાં 13 ચોગ્ગાનો સમાવેશ થાય છે. તેના સિવાય જેમીમા રોડ્રિગ્ઝે 55 રનની ઈનિંગ રમી હતી. આ ખેલાડીઓના કારણે, ટીમે બીજી ઈનિંગમાં 211 રન બનાવ્યા અને આ મેચ ડ્રો ગઈ.