ચેમ્પિયન્સ ટ્રોફીમાંથી બહાર થયા બાદ ઇંગ્લેન્ડના જોસ બટલરે ODI અને T20માંથી કેપ્ટનશીપ છોડી

ઇંગ્લેન્ડના ખેલાડી જોસ બટલરે ODI અને T20 કેપ્ટનશીપ છોડી દેવાનો નિર્ણય લીધો છે. બટલર 1 માર્ચે દક્ષિણ આફ્રિકા સામે છેલ્લી વખત કેપ્ટનશીપ કરતો જોવા મળશે.

ICC ચેમ્પિયન્સ ટ્રોફી 2025માં ઈંગ્લેન્ડનું પ્રદર્શન કંઈ ખાસ રહ્યું નથી. સતત બે મેચ હાર્યા બાદ ઈંગ્લેન્ડની ટીમ સેમિફાઇનલની દોડમાંથી બહાર થઈ ગઈ છે. હવે ખરાબ પ્રદર્શન બાદ જોસ બટલરે ODI અને T20 ટીમની કેપ્ટનશીપ છોડવાનો નિર્ણય લીધો છે. બટલર છેલ્લી વખત 1 માર્ચ (શનિવાર) ના રોજ દક્ષિણ આફ્રિકા સામે ઇંગ્લેન્ડની કેપ્ટનશીપ કરતો જોવા મળશે.

જોસ બટલરની કેપ્ટનશીપ હેઠળ ઇંગ્લેન્ડની ટીમને અફઘાનિસ્તાન સામે 8 રનથી શરમજનક હારનો સામનો કરવો પડ્યો. હાર બાદ બટલરે કેપ્ટનશીપ છોડવાનો સંકેત આપ્યો હતો. બટલરે કહ્યું હતું કે, 'હું આ સમયે કોઈ ભાવનાત્મક નિવેદન નહીં આપું. હું મારા અને અન્ય ખેલાડીઓ વિશે વિચારીશ. અમે બધી શક્યતાઓ પર વિચાર કરીશું. આ ખૂબ જ નિરાશાજનક છે. મને લાગ્યું કે આપણે મેચ જીતી શક્યા હોત. બીજી એક શાનદાર મેચ, પણ અમે હારી ગયા.’

હવે જોસ બટલરે આ મોટો નિર્ણય લીધો છે. જોસ બટલરની કેપ્ટનશીપ હેઠળ, ઇંગ્લેન્ડ ભારતમાં આયોજિત ODI વર્લ્ડ કપ (2023) અને વેસ્ટ ઇન્ડીઝ-અમેરિકામાં આયોજિત T20 વર્લ્ડ કપ 2024 માં નિષ્ફળ ગયું. હવે તેની ટીમ ચેમ્પિયન્સ ટ્રોફીમાં પણ સારું પ્રદર્શન કરી શકી નહીં અને તેને કેપ્ટનશીપ છોડવાની ફરજ પડી.