SA vs ENG / પહેલી T20 મેચમાં 69 રનનો ટાર્ગેટ પણ ચેઝ ન કરી શક્યું ઈંગ્લેન્ડ, શૂન્ય પર આઉટ થયા આટલા ખેલાડી
છેલ્લું અપડેટ : 11 Sept 2025
ઈંગ્લેન્ડ અને સાઉથ આફ્રિકા વચ્ચે ત્રણ મેચની T20 સિરીઝની પહેલી મેચ 10 સપ્ટેમ્બરના રોજ કાર્ડિફ ગ્રાઉન્ડ પર રમાઈ હતી. વરસાદે આ મેચમાં વિક્ષેપ પાડ્યો હતો. આફ્રિકન ટીમને મેચમાં ફક્ત 7.5 ઓવર માટે બેટિંગ કરવાની તક મળી હતી જેમાં તેઓએ 5 વિકેટ ગુમાવીને 97 રન બનાવ્યા હતા. વરસાદ બંધ થયા પછી, અમ્પાયર્સે ડકવર્થ લુઈસ (DLS) નિયમ મુજબ યજમાન ઈંગ્લેન્ડને 5 ઓવરમાં 69 રનનો ટાર્ગેટ આપવાનો નિર્ણય કર્યો, પરંતુ ઈંગ્લેન્ડની ટીમ ફક્ત 54 રનના સ્કોર સુધી પહોંચી શકી અને 14 રનથી હારનો સામનો કરવો પડ્યો.
કેપ્ટન હેરી બ્રુક ખાતું પણ ન ખોલી શક્યો
કાર્ડિફ ગ્રાઉન્ડ પર વરસાદથી પ્રભાવિત આ મેચમાં જ્યારે ઈંગ્લેન્ડને DLS નિયમ મુજબ 5 ઓવરમાં 69 રનનો ટાર્ગેટ મળ્યો, ત્યારે બધાને અપેક્ષા હતી કે ટીમ આ ટાર્ગેટ ચેઝ કરી લેશે, પરંતુ સાઉથ આફ્રિકાના બોલર્સે આવું થવા ન દીધું. ઈંગ્લેન્ડ તરફથી ઓપનિંગ કરવા આવેલ ફિલ સોલ્ટ પોતાનું ખાતું પણ ન ખોલી શક્યો, જોકે જોસ બટલરે ઝડપથી રન બનાવ્યા, પરંતુ તેને બીજા છેડેથી સપોર્ટ ન મળ્યો, જેકબ બેથેલ 7 રન બનાવીને આઉટ થયા, જ્યારે કેપ્ટન હેરી બ્રુક 4 બોલનો સામનો કરીને ખાતું ખોલ્યા વિના પવેલિયન પરત ફર્યો.
જોસ બટલરના બેટમાંથી 11 બોલમાં 25 રનની ઈનિંગ જોવા મળી, જ્યારે 10 મહિના પછી ઈંગ્લેન્ડની T20 ટીમમાં વાપસી કરી રહેલા સેમ કરને 10 રનની અણનમ ઈનિંગ રમી. આ ઉપરાંત, 5 બેટ્સમેન ડબલ ડીજીટને પણ ન સ્પર્શી શક્ય. સાઉથ આફ્રિકા તરફથી બોલિંગમાં માર્કો યાન્સન અને કોર્બિન બોશે 2-2 વિકેટ લીધી, જ્યારે કગીસો રબાડાએ એક વિકેટ લીધી.
આફ્રિકાની ઈનિંગમાં માર્કરામ અને બ્રેવિસની કમાલ
જો આપણે આ મેચમાં સાઉથ આફ્રિકાની ટીમના બેટિંગ પ્રદર્શનની વાત કરીએ, તો તેમાં કેપ્ટન એડન માર્કરામ અને બ્રેવિસની કમાલ જોવા મળી. માર્કરામે 28 રનની ઈનિંગ રમી હતી, જ્યારે બ્રેવિસે 10 બોલમાં 23 રનની ઈનિંગ રમી હતી. આ ઉપરાંત ડોનોવન ફેરેરાએ પણ અણનમ 25 રન બનાવ્યા હતા. કાર્ડિફ ગ્રાઉન્ડ પર અત્યાર સુધીની 11 T20 આંતરરાષ્ટ્રીય મેચોમાં આ ઈંગ્લેન્ડનો માત્ર બીજો પરાજય હતો, ટીમ બંને વખત સાઉથ આફ્રિકા સામે જ હારી છે.
