દુલીપ ટ્રોફીના વેન્યુમાં અચાનક મોટો ફેરફાર કરવામાં આવ્યો, BCCIએ આપ્યું અપડેટ
છેલ્લું અપડેટ : 20 Aug 2026
2026-27 દુલીપ ટ્રોફીના વેન્યુમાં અચાનક મોટો ફેરફાર કરવામાં આવ્યો છે. ભારતીય ક્રિકેટ કંટ્રોલ બોર્ડ (BCCI) એ બુધવારે (19 ઓગસ્ટ) એક અપડેટ શેર કર્યું જેમાં કહેવામાં આવ્યું હતું કે ટુર્નામેન્ટની ફાઇનલ મેચનું વેન્યુ બદલવામાં આવ્યું છે. બોર્ડે આ ફેરફારનું કારણ પણ જણાવ્યું છે.
શરૂઆતમાં BCCI સેન્ટર ઓફ એક્સેલન્સ ખાતે રમાનારી ટાઈટલ મેચ હવે ચેન્નાઈના એમએ ચિદમ્બરમ સ્ટેડિયમમાં યોજાશે. ફાઈનલ 6થી 10 સપ્ટેમ્બર દરમિયાન યોજાશે. ટુર્નામેન્ટ 23 ઓગસ્ટ અને 10 સપ્ટેમ્બર દરમિયાન યોજાશે. ફાઈનલ સિવાયની બધી મેચ સેન્ટર ઓફ એક્સેલન્સ ખાતે યોજાશે, જે અગાઉ સુનિશ્ચિત હતી.
BCCIએ આ નિર્ણય કેમ લીધો?
ફેરફાર અંગે એક રિલીઝમાં, બોર્ડે જણાવ્યું હતું કે આ નિર્ણય દર્શકોના હિતમાં લેવામાં આવ્યો છે. રિલીઝમાં કહેવામાં આવ્યું છે કે, "આ મહત્ત્વપૂર્ણ ઘરેલુ ક્રિકેટ ટુર્નામેન્ટ માટે, દર્શકોને સ્ટેડિયમમાં આવીને ફાઈનલ મેચ લાઈવ જોવાની મંજૂરી આપવાનો નિર્ણય લેવામાં આવ્યો છે. આ મેચ 6 થી 10 સપ્ટેમ્બર દરમિયાન રમાશે."
સચિવ દેવજીત સૈકિયાએ શું કહ્યું?
આ ફેરફાર અંગે BCCI સચિવ દેવજીત સૈકિયાએ કહ્યું, "દુલીપ ટ્રોફી અમારા કેલેન્ડરમાં એક મુખ્ય ટુર્નામેન્ટ છે અને એક સમૃદ્ધ વારસો આગળ ધપાવે છે. ક્રિકેટની ગુણવત્તા હંમેશા ઉચ્ચ રહે છે અને અમે ઈચ્છીએ છીએ કે અમારા ફેન્સને સ્ટેડિયમમાંથી ફાઈનલ મેચ લાઇવ જોવાની તક મળે. સેન્ટર ઓફ એક્સેલન્સમાં દર્શકોની હાજરી પર કેટલાક પ્રતિબંધો છે અને અમને લાગ્યું કે ફાઈનલ એવા વેન્યુ પર યોજવી શ્રેષ્ઠ રહેશે જ્યાં ફેન્સ આવીને આ પ્રસંગનો ભાગ બની શકે."
ટુર્નામેન્ટના લાઈવ કવરેજ અંગે, દેવજીત સૈકિયાએ કહ્યું, "અમે ટુર્નામેન્ટનું કવરેજ પણ વધાર્યું છે. દુલીપ ટ્રોફીની બધી મેચ લાઈવ સ્ટ્રીમ કરવામાં આવશે. વધુમાં, એક ક્વાર્ટર-ફાઇનલ, એક સેમીફાઈનલ અને ફાઈનલ ટેલિવિઝન પર પણ ટેલિકાસ્ટ કરવામાં આવશે."