કાર્લોસ અલ્કારાઝે જીત્યો US Open 2025નો ખિતાબ, ફાઈનલમાં યાનિક સિનરને હરાવ્યો
છેલ્લું અપડેટ : 08 Sept 2025
સ્પેનિશ સ્ટાર કાર્લોસ અલ્કારાઝે તેના સૌથી મોટા હરીફ યાનિક સિનરને હરાવીને ન્યૂયોર્કના આર્થર એશ સ્ટેડિયમ ખાતે રમાયેલી યુએસ ઓપન 2025ની ફાઈનલમાં ટાઈટલ જીત્યું. 7 સપ્ટેમ્બરના રોજ રમાયેલી ફાઈનલ મેચમાં, અલ્કારાઝે શાનદાર પ્રદર્શન કર્યું અને 4માંથી 3 સેટ જીત મેળવી. તેણે સિનરને 6-2, 3-6, 6-1, 6-4થી હરાવ્યો. આ જીત સાથે, તેણે માત્ર ટુર્નામેન્ટનો ખિતાબ જ નહીં, પરંતુ સિનર પાસેથી વર્લ્ડ નંબર-1ની ખુરશી પણ છીનવી લીધી.
ફાઈનલ મેચની શરૂઆતમાં, અલ્કારાઝે આક્રમક રમત રમી અને પહેલો સેટ 6-2થી જીત્યો. જોકે, સિનરે તરત જ વાપસી કરી અને બીજો સેટ 6-3થી જીત્યો. ત્રીજા સેટમાં, સ્પેનિશ સ્ટારે પ્રભુત્વ જમાવ્યું અને 6-1થી સરળ જીત મેળવી. ચોથા અને નિર્ણાયક સેટમાં કઠિન લડાઈ થઈ, પરંતુ અલ્કારાઝે 6-4થી જીત મેળવી અને ટાઈટલ પોતાના નામે કર્યું.
છઠ્ઠી વખત ગ્રાન્ડ સ્લેમ જીત્યો
આ પહેલા, અલ્કારાઝ 2025 વિમ્બલ્ડનની ફાઈનલમાં સિનર સામે હારી ગયો હતો, પરંતુ તેણે ન્યૂયોર્કમાં શાનદાર વાપસી કરી હતી. આ સતત ત્રીજી વખત હતું જ્યારે બંને ખેલાડીઓ ગ્રાન્ડ સ્લેમ ફાઈનલમાં ટકરાયા હતા. આ જીત સાથે, 22 વર્ષીય અલ્કારાઝે તેની કારકિર્દીનો છઠ્ઠો ગ્રાન્ડ સ્લેમ ખિતાબ જીત્યો અને મહાન ખેલાડી બજોર્ન બોર્ગ પછી આ સિદ્ધિ હાંસલ કરનાર બીજો સૌથી યુવા ખેલાડી બન્યો.
સિનર માટે મોટી સિદ્ધિ
સિનર ભલે ટાઈટલ ન જીત્યો હોય, પરંતુ તેણે આ વર્ષે ચારેય ગ્રાન્ડ સ્લેમ ફાઈનલ રમીને એક મહાન સિદ્ધિ હાંસલ કરી છે. આ રીતે, તે એક વર્ષમાં ચારેય ગ્રાન્ડ સ્લેમ ફાઈનલ રમનાર વિશ્વનો ચોથો ખેલાડી બન્યો. આ પહેલા, રોડ લેવર (1969), રોજર ફેડરર (2006, 2007, 2008) અને નોવાક જોકોવિચ (2015, 2021, 2023) આ સિદ્ધિ મેળવી ચૂક્યા છે.
