IPLમાં 'Girlfriend Culture' સામે BCCI લેશે કડક પગલાં! આ ચાર ખેલાડીઓ રડારમાં
છેલ્લું અપડેટ : 04 May 2026
ભારતીય ક્રિકેટ કંટ્રોલ બોર્ડ (BCCI) ઈન્ડિયન પ્રીમિયર લીગ (IPL) માં ખેલાડીઓ સાથે જોડાયેલા 'ગર્લફ્રેન્ડ કલ્ચર' પર અંકુશ મેળવવા માટે કડક પગલાં લેવાની તૈયારી કરી રહ્યું છે. એક અહેવાલ મુજબ, બોર્ડ આના લાંબા ગાળાના પરિણામો અંગે ચિંતિત છે અને માને છે કે કોઈ મોટો વિવાદ ઊભો થાય અથવા આંતરિક બાબતો લીક થાય તે પહેલાં સ્પષ્ટ નિયમો ઘડવા વધુ સારું છે.
IPL 2026ની સિઝનમાં અત્યાર સુધીમાં કેટલાક વિવાદો જોવા મળ્યા છે. રાજસ્થાન રોયલ્સના મીડિયા મેનેજર રોમી ભિન્દર ડગઆઉટમાં સેલ ફોનનો ઉપયોગ કરતા પકડાયા હતા, જ્યારે કેપ્ટન રિયાન પરાગ વેપિંગ કરતો જોવા મળ્યો હતો. તણાવ પહેલેથી જ વધી રહ્યો હોવાથી, BCCIના અધિકારીઓને લાગે છે કે અન્ય કોઈ ઘટનાની રાહ જોવા કરતા અત્યારે જ પગલાં લેવા યોગ્ય છે. આ નિયમ આગામી IPL સિઝનથી અમલમાં આવી શકે છે.
સોશિયલ મીડિયા ઈન્ફ્લુએન્સર અને સુરક્ષાની ચિંતા
અહેવાલમાં દાવો કરવામાં આવ્યો છે કે BCCIએ હાર્દિક પંડ્યા, અર્શદીપ સિંહ, ઈશાન કિશન અને યશસ્વી જયસ્વાલ સહિતના ખેલાડીઓની નોંધ લીધી છે, જેઓ તેમની ગર્લફ્રેન્ડ સાથે જોવા મળ્યા હતા. બોર્ડને ખેલાડીઓના ડેટિંગ સામે કોઈ વાંધો નથી, પરંતુ અધિકારીઓ એ વાતથી નારાજ છે કે કેટલાક પાર્ટનર્સ ખેલાડીઓ સાથે રોકાય છે અને ટીમ સાથે મુસાફરી કરે છે. કેટલાક કિસ્સાઓમાં, પાર્ટનર્સ ખેલાડીઓ સાથે રહેવા માટે અલગથી બીજા શહેરોમાં પણ મુસાફરી કરી રહ્યા છે. જેમાંથી કેટલીક સોશિયલ મીડિયા ઈન્ફ્લુએન્સર છે, જે સંવેદનશીલ માહિતી જાહેરમાં શેર થવાની ચિંતા પેદા કરે છે.
"BCCIના એક અધિકારીએ જણાવ્યું છે કે આ અંગે ચર્ચાઓ ચાલી રહી છે. પત્નીઓ અને પરિવારના સભ્યો ખેલાડીઓ સાથે મુસાફરી કરે તેની સામે કોઈ વાંધો નથી, પરંતુ ગર્લફ્રેન્ડના કિસ્સામાં આ બાબતને વધુ ગંભીર માનવામાં આવે છે. અગાઉ, IPL દરમિયાન ગર્લફ્રેન્ડને ખેલાડીઓ સાથે રહેવાની મંજૂરી નહોતી, પરંતુ હવે તે એક ટ્રેન્ડ બની ગયો છે."
જ્યારે એક અધિકારીએ એન્ટી કરપ્શન યુનિટ (ACU) ના સભ્ય સામે આ મુદ્દો ઉઠાવ્યો, ત્યારે પ્રતિનિધિએ કહ્યું કે તેઓ પત્નીઓ અને "ઓફિશિયલ ગર્લફ્રેન્ડ" સામે વાંધો ઉઠાવવા માટે સક્ષમ નથી. જ્યારે બોર્ડે "ઓફિશિયલ ગર્લફ્રેન્ડ" શબ્દ પર પ્રશ્ન કર્યો, ત્યારે સભ્યએ કહ્યું કે તેમને આવી જ સૂચના આપવામાં આવી છે.
પ્રોફેશનલિઝમ અને ટીમના વાતાવરણ પર અસર
બોર્ડર-ગાવસ્કર ટ્રોફી માટે ઓસ્ટ્રેલિયામાં ભારતની કારમી હાર બાદ, BCCIએ ઘણા કડક પ્રોટોકોલ લાગુ કર્યા હતા. તેમાંથી એક મુજબ, 45 દિવસ કે તેથી વધુ સમયના પ્રવાસ પર ખેલાડીનો પરિવાર તેની સાથે માત્ર એક સપ્તાહ માટે જ રહી શકે છે. જોકે, હવે બોર્ડ એક્શનમાં આવવા તૈયાર છે ત્યારે જોવાનું એ રહે છે કે આ નીતિ IPLની બહાર ભારતીય ક્રિકેટરો પર પણ લાગુ કરવામાં આવશે કે કેમ. એવું માનવામાં આવે છે કે જ્યારે ખેલાડીઓ ભારત માટે રમી રહ્યા હોય ત્યારે BCCI તેમની પ્રવૃત્તિઓ પર વધુ સરળતાથી નજર રાખી શકે છે, પરંતુ 10 ફ્રેન્ચાઈઝીઓની સંડોવણીને કારણે IPLમાં આવું કરવું વધુ પડકારજનક છે.
BCCIને એ વાતની પણ ચિંતા છે કે ખેલાડીઓ સાથે મુસાફરી કરતી ગર્લફ્રેન્ડ્સની અસર ટીમના વાતાવરણ અને પ્રોફેશનલિઝમ પર પડી શકે છે. આના બે સંભવિત પરિણામો હોઈ શકે છે:
બોર્ડ ACU ના નિયમો વધુ કડક બનાવી શકે છે.
ગર્લફ્રેન્ડ્સને ખેલાડીઓ સાથે મુસાફરી કરવા પર સંપૂર્ણ પ્રતિબંધ લગાવી શકે છે.
રિપોર્ટમાં એવો પણ ઉલ્લેખ કરવામાં આવ્યો છે કે આ ગર્લફ્રેન્ડ્સમાં એવી ઘણી ઈન્ફ્લુએન્સર છે જેમણે અગાઉ સટ્ટાબાજીની (જુગાર) વેબસાઈટ પ્રમોટ કરી છે. તાજેતરમાં, કેટલાક IPL ખેલાડીઓએ તેમની મહિલા સાથીઓ દ્વારા નોંધાવવામાં આવેલા પોલીસ કેસોનો પણ સામનો કરવો પડ્યો છે.
