આર્યના સબાલેન્કાએ US Openનો તાજ જીત્યો, ફાઈનલમાં અમેરિકન ખેલાડી જેસિકા પેગુલાને હરાવી

યુએસ ઓપન વિમેન્સ સિંગલ ફાઇનલમાં જેસિકા પેગુલાએ આર્યના સબાલેન્કાને જોરદાર ટક્કર આપી હતી, પરંતુ તેને સીધા સેટમાં હારનો સામનો કરવો પડ્યો હતો. સતત બે ઓસ્ટ્રેલિયન ઓપન જીત્યા બાદ સબાલેન્કાએ તેનું ત્રીજું મોટું ટાઇટલ જીત્યું હતું.

વિશ્વની નંબર 2 આર્યના સબાલેન્કાએ ફાઇનલમાં જેસિકા પેગુલાને હરાવી

વિશ્વની નંબર 2 આર્યના સબાલેન્કાએ ફાઇનલમાં જેસિકા પેગુલાને સીધા સેટમાં હરાવીને યુએસ ઓપન 2024 મહિલા સિંગલ્સનું ટાઇટલ જીતી લીધું છે. ન્યૂયોર્કના આર્થર એશે સ્ટેડિયમમાં રમાયેલી હાઈ-વોલ્ટેજ ફાઈનલ મેચમાં બેલારુસિયન ખેલાડીએ તેની અમેરિકન પ્રતિસ્પર્ધીને 7-5, 7-5થી પરાજય આપ્યો હતો. આ મેચ એક કલાક અને 53 મિનિટ સુધી ચાલી હતી. ગયા વર્ષે, સબલેન્કા યુએસ ઓપનની ફાઇનલમાં અમેરિકન ખેલાડી કોકો ગૉફ સામે હારી ગઈ હતી, પરંતુ આ વર્ષે તેણે ઇતિહાસનું પુનરાવર્તન થવા દીધું નથી.

પેગુલાએ ક્વાર્ટર ફાઇનલમાં વિશ્વની નંબર 1 પોલેન્ડની ઇગા સ્વાઇટેકને હરાવી

પેગુલાએ ક્વાર્ટર ફાઇનલમાં વિશ્વની નંબર 1 પોલેન્ડની ઇગા સ્વાઇટેકને હરાવી હતી. સેમિ-ફાઇનલ મેચમાં શરૂઆતનો સેટ ગુમાવવા છતાં તેણે ચેક રિપબ્લિકની કેરોલિના માકોવાને હરાવી અને પ્રથમ વખત કોઈ ગ્રાન્ડ સ્લેમ ટુર્નામેન્ટની ફાઇનલમાં જગ્યા બનાવી હતી. ટાઇટલ મેચમાં જેસિકા પેગુલાએ  આર્યના  સાબાલેન્કાને જોરદાર ટક્કર આપી હતી, પરંતુ તેને સીધા સેટમાં હારનો સામનો કરવો પડ્યો હતો અને સતત બે ઓસ્ટ્રેલિયન ઓપન જીત્યા બાદ સબલેન્કાએ તેનું ત્રીજું મોટું ટાઇટલ જીત્યું હતું.

બીજા સેટમાં 5-3થી પાછળ હોવા છતાં સબાલેન્કાએ જીત મેળવી

બીજા સેટમાં આર્યના સબાલેન્કા વધુ પ્રભાવશાળી દેખાતી હતી અને તેણે સર્વિસ બ્રેક સાથે 3-0ની લીડ મેળવી હતી. જેસિકા પેગુલાએ સર્વ હોલ્ડ કરીને સેટમાં પોતાનું ખાતું ખોલાવ્યું હતું, પરંતુ તે પુનરાગમન કરવા અને તેના વિરોધીને દબાણમાં લાવવાથી દૂર હતી. પેગુલા કોઈપણ રીતે હાર સ્વીકારવા તૈયાર ન હતી. તે ફરી એકવાર સબાલેન્કાની સર્વિસ તોડવામાં સફળ રહી અને સ્કોર 3-3 પર લાવી દીધો હતો. તેણી અહીં જ અટકી ન હતી અને વધુ એક સર્વિસ બ્રેક સાથે સબાલેન્કા પર 5-3ની લીડ મેળવી હતી.

પ્રથમ વખત યુએસ ઓપનનું ટાઈટલ જીત્યું

બીજા સેટમાં 3-0થી શરૂઆત કર્યા બાદ કમાન્ડમાં દેખાતી આર્યના સબાલેન્કા અચાનક જ મુશ્કેલ પરિસ્થિતિમાં આવી ગઈ હતી. પરંતુ તેણીએ પોતાની જાતને નિયંત્રિત કરી અને તરત જ તેણીની રમતમાં સુધારો કર્યો અને પેગુલા સામે નિર્ણાયક પુનરાગમન કરવામાં સફળ રહી. તેણે બીજો સેટ અને મેચ પણ 7-5થી જીતી લીધી હતી. પ્રથમ વખત યુએસ ઓપનનું ટાઈટલ જીત્યું.