રોહિત-વિરાટ પછી વધુ એક મોટા ખેલાડીએ જાહેર કરી નિવૃત્તિ, આ દિવસે રમશે છેલ્લી આંતરરાષ્ટ્રીય મેચ
છેલ્લું અપડેટ : 17 Jul 2025
રોહિત શર્મા અને વિરાટ કોહલીએ ગયા વર્ષે T20 વર્લ્ડ કપ 2024 જીત્યા બાદ T20Iમાંથી નિવૃત્તિ લીધી હતી. ત્યારબાદ આ વર્ષે મે મહિનામાં બંને ખેલાડીએ ટેસ્ટમાંથી પણ નિવૃત્તિ લઈ લીધી હતી. હવે વેસ્ટ ઈન્ડિઝના ઓલરાઉન્ડર આન્દ્રે રસેલે આંતરરાષ્ટ્રીય ક્રિકેટમાંથી નિવૃત્તિ લેવાનો નિર્ણય લીધો છે. તે ઓસ્ટ્રેલિયા સામેની T20 સિરીઝ પછી નિવૃત્તિ લેશે. વેસ્ટ ઈન્ડિઝ અને ઓસ્ટ્રેલિયા વચ્ચે 21 જુલાઈથી 5 મેચની T20 સિરીઝ શરૂ થશે. આ સિરીઝમાં આન્દ્રે રસેલની પસંદગી કરવામાં આવી છે. પરંતુ તે સિરીઝની વચ્ચે નિવૃત્તિ લેશે.
આન્દ્રે રસેલ ક્યારે નિવૃત્તિ લેશે?
આન્દ્રે રસેલ ઓસ્ટ્રેલિયા સામેની બધી 5 મેચ નહીં રમે. ESPN ક્રિકઈન્ફોના અહેવાલમાં દાવો કરવામાં આવ્યો છે કે રસેલ બીજી મેચ પછી જ નિવૃત્તિ લઈ લેશે. સિરીઝની બીજી મેચ 23 જુલાઈએ જમૈકાના સબીના પાર્ક કિંગ્સ્ટન ખાતે રમાશે. આ મેચ રસેલની છેલ્લી આંતરરાષ્ટ્રીય મેચ હશે.
37 વર્ષીય આન્દ્રે રસેલે 2010માં આંતરરાષ્ટ્રીય ક્રિકેટમાં ડેબ્યુ કર્યું હતું, તેણે 15 નવેમ્બરે શ્રીલંકા સામે પોતાની પહેલી અને એકમાત્ર ટેસ્ટ મેચ રમી હતી. આના 6 મહિના પછી, 2011માં, રસેલે T20 અને ODIમાં ડેબ્યુ કર્યું હતું
આન્દ્રે રસેલની આંતરરાષ્ટ્રીય કારકિર્દી
- ટેસ્ટ - 1 મેચમાં 2 રન અને 1 વિકેટ
- ODI - 56 મેચમાં 1034 રન અને 70 વિકેટ
- T20 - 84 મેચમાં 1078 રન અને 61 વિકેટ
આન્દ્રે રસેલે ODIમાં 4 અડધી સદી અને T20માં 3 અડધી સદી ફટકારી છે. વનડેમાં તેનો હાઈએસ્ટ સ્કોર 92* છે, જે એક રેકોર્ડ છે. રસેલની આ ઈનિંગ નવમા નંબર પર રમતા કોઈપણ બેટ્સમેનની સૌથી મોટી ઈનિંગ (ODIમાં) છે.
રસેલ બે વાર વર્લ્ડ કપ વિજેતા ટીમનો ભાગ હતો
આવતા વર્ષે T20 વર્લ્ડ કપ રમાશે, જે ભારત અને શ્રીલંકા દ્વારા યોજાવાનો છે. રસેલ તે પહેલાં નિવૃત્તિ લેવા જઈ રહ્યો છે. તમને જણાવી દઈએ કે તે પોતાની કારકિર્દીમાં બે વાર વર્લ્ડ કપ વિજેતા ટીમનો ભાગ રહી ચૂક્યો છે. વેસ્ટ ઈન્ડિઝે 2012 અને 2016માં T20 વર્લ્ડ કપ જીત્યો હતો, આન્દ્રે રસેલે બંનેમાં મહત્ત્વપૂર્ણ ભૂમિકા ભજવી હતી. 2016ની સેમીફાઈનલમાં, તેણે ટીમ ઈન્ડિયા સામે 20 બોલમાં 43 રનની શાનદાર ઈનિંગ રમી હતી.
ઓસ્ટ્રેલિયા સામે T20 સિરીઝ માટે વેસ્ટ ઈન્ડિઝની ટીમ
શાઈ હોપ (કેપ્ટન), જ્વેલ એન્ડ્રુ, રોસ્ટન ચેઝ, મેથ્યુ ફોર્ડ, શિમરોન હેટમાયર, જેડિયા બ્લેડ્સ, અકીલ હોસેન, જેસન હોલ્ડર, અલ્ઝારી જોસેફ, બ્રેન્ડન કિંગ, એવિન લુઈસ, ગુડાકેશ મોટી, શેરફેન રથરફોર્ડ, રોમારિયો શેફર્ડ, રોવમેન પોવેલ, આન્દ્રે રસેલ.
