Religion: બગલામુખી સાધનામાં રાખવી પડે છે આટલી સાવધાની, જાણો પૂજાના એ 10 નિયમો જેનું પાલન છે અનિવાર્ય
છેલ્લું અપડેટ : 24 Apr 2026
સનાતન પરંપરામાં દેવી બગલામુખીની પૂજા જીવનના તમામ ભય દૂર કરનારી અને શત્રુઓ પર વિજય અપાવનારી માનવામાં આવે છે. દેવીનો રંગ સોનેરી પીળો હોવાથી ભક્તો તેમને 'પિતાંબરા' તરીકે પણ પૂજે છે.
હિન્દુ માન્યતા અનુસાર, માતા બગલામુખીની સાધના કરનાર ભક્ત જીવનના દરેક ક્ષેત્રમાં વિજય પ્રાપ્ત કરે છે. દસ મહાવિદ્યાઓમાં આઠમું સ્થાન ધરાવતા દેવી બગલામુખીની પૂજા માટે શાસ્ત્રોમાં કેટલાક કડક નિયમો જણાવવામાં આવ્યા છે. આ નિયમોનું પાલન કર્યા વિના કરવામાં આવેલી પૂજા નિષ્ફળ જઈ શકે છે. ચાલો જાણીએ માતા બગલામુખીની પૂજા સાથે જોડાયેલા 10 મહત્વપૂર્ણ નિયમો:
દેવી બગલામુખીની પૂજા માટેના નિયમો
પવિત્ર સ્થાન અને માર્ગદર્શન: માતા બગલામુખીની સાધના કોઈ પવિત્ર સ્થળે અને સિદ્ધ પુરુષ કે યોગ્ય માર્ગદર્શક હેઠળ કરવામાં આવે તો તેમાં ઝડપી સફળતા મળે છે.
ગુરુની પરવાનગી: આ સાધના હંમેશા સિદ્ધ ગુરુની પરવાનગી મેળવ્યા પછી જ શરૂ કરવી જોઈએ. સાધના દરમિયાન ગુરુની સૂચનાઓ અને મર્યાદાઓનું ચુસ્તપણે પાલન કરવું અનિવાર્ય છે.
બ્રહ્મચર્યનું પાલન: પૂજા કે સાધના દરમિયાન ભક્તોએ માનસિક અને શારીરિક રીતે બ્રહ્મચર્યનું કડક પાલન કરવું જોઈએ.
પીળા રંગનું મહત્વ: માતા બગલામુખીની પૂજામાં પીળા રંગનું વિશેષ મહત્વ છે. તેથી સાધકે પૂજા દરમિયાન પીળા વસ્ત્રો જ ધારણ કરવા જોઈએ.
પૂજા સામગ્રી: માતાની પૂજામાં વપરાતી મોટાભાગની સામગ્રી જેવી કે પીળા ફૂલ, પીળું ચંદન અને પીળો પ્રસાદ હોવો જોઈએ.
ગુપ્ત સાધના: માતા બગલામુખીની સાધના હંમેશા ગુપ્ત રાખવી જોઈએ. આ પૂજા ક્યારેય ખુલ્લા આકાશ નીચે ન કરવી જોઈએ, હંમેશા બંધ રૂમ કે મંદિરમાં કરવી જોઈએ.
પૂજાનો સમય અને માળા: દેવીની સાધના અને મંત્ર જાપ માટે રાત્રિના 10 થી સવારના 4 વાગ્યા સુધીનો સમય સૌથી પ્રભાવશાળી માનવામાં આવે છે. મંત્ર જાપ માટે હંમેશા હળદરની માળાનો જ ઉપયોગ કરવો.
યંત્ર પૂજા: કોઈ વિશેષ સમસ્યાના નિવારણ કે શત્રુ વિજય માટે માતા બગલામુખીના યંત્રની સ્થાપના કરી તેની વિધિવત પૂજા કરવી જોઈએ.
આહાર અને ઉપવાસ: પૂજા દરમિયાન સાધકે ખાંડ અને મીઠા વગરનો આહાર લેવો જોઈએ અથવા ફળાહાર પર રહીને ઉપવાસ કરવો જોઈએ.
વર્જિત કાર્યો: માતા બગલામુખીની જયંતિના દિવસે અથવા સાધના દરમિયાન નખ, દાઢી કે વાળ કાપવા જોઈએ નહીં.
નોંધ:- આ લેખમાં આપવામાં આવેલી તમામ માહિતી વિવિધ સ્રોતો જેવા કે - પંચાંગો/ ઉપદેશો/ ધાર્મિક માન્યતાઓ/જ્યોતિષીઓ/ શાસ્ત્રોમાંથી સંકલિત કરવામાં આવી છે અને તમને પ્રસારિત કરવામાં આવી છે. અમારો હેતુ માત્ર માહિતી પૂરી પાડવાનો છે. GSTV આની પુષ્ટિ નથી કરતું. તેના માટે કોઈ નિષ્ણાતનું માર્ગદર્શન લેવું.