અનોખું મંદિર જ્યાં ભગવાનના દરરોજ થાય છે લગ્ન: જાણો તમિલનાડુના નિત્યકલ્યાણ પેરુમલ મંદિરનો અદ્ભુત મહિમા
છેલ્લું અપડેટ : 19 Sept 2026
જો કોઈ તમને એવા મંદિર વિશે જણાવે જ્યાં ભગવાન પોતે દરરોજ વિવાહના બંધનમાં બંધાય છે, તો કદાચ માનવું મુશ્કેલ લાગે, પરંતુ આ વાત એકદમ સાચી છે. આ ચમત્કારિક મંદિર તમિલનાડુના ચેન્નાઈ નજીક તિરુવિદંથાઈ (તિરુવિદંતઈ) ખાતે આવેલું છે, જે ‘નિત્યકલ્યાણ પેરુમલ મંદિર’ તરીકે પ્રખ્યાત છે.
ભગવાન વિષ્ણુને સમર્પિત આ પવિત્ર ધામમાં તેમના વરાહ અવતારની દિવ્ય મૂર્તિ સ્થાપિત છે. ‘પેરુમલ’ એ દક્ષિણ ભારતમાં ભગવાન વિષ્ણુનું અત્યંત આદરણીય નામ છે. અહીં માતા લક્ષ્મીજીની ‘કોમલાવલ્લી થાયાર’ તરીકે પૂજા કરવામાં આવે છે. સતત લગ્નોત્સવની પરંપરાને કારણે આ ધામને ‘શાશ્વત લગ્ન મંદિર’ (Eternal Wedding Temple) પણ કહેવામાં આવે છે.
ભગવાન શા માટે દરરોજ લગ્ન કરે છે?
પૌરાણિક કથા અનુસાર, પ્રાચીન કાળમાં કાલવ નામના એક તપસ્વી ઋષિ થઈ ગયા. તેમને ૩૬૦ પુત્રીઓ હતી અને તેઓ પોતાની તમામ પુત્રીઓનું કલ્યાણ થાય તે હેતુથી તેમના લગ્ન ભગવાન વિષ્ણુ સાથે કરાવવા માંગતા હતા. ભક્તની ભક્તિ જોઈ ભગવાન વરાહ પ્રગટ થયા અને તેમણે ઋષિની એક-એક પુત્રી સાથે દરરોજ લગ્ન કરવાનું વચન આપ્યું.
આ વિવાહ ઉત્સવ સતત ૩૬૦ દિવસ સુધી ચાલ્યો. વર્ષના અંતે ભગવાને આ તમામ કન્યાઓને એક દિવ્ય સ્વરૂપમાં સમાવી માતા લક્ષ્મીના સ્વરૂપે પોતાના ડાબા ખોળામાં સ્થાન આપ્યું. તમિલમાં ‘તિરુ’ એટલે લક્ષ્મી અને ‘ઇદંથાઈ’ એટલે ડાબી બાજુ, જેના પરથી આ સ્થળનું નામ ‘તિરુવિદંથાઈ’ પડ્યું. દરરોજ લગ્ન કરવાના કારણે જ ભગવાન અહીં ‘નિત્યકલ્યાણ પેરુમલ’ કહેવાયા. આજે પણ આ મંદિરમાં ભગવાનના કલ્યાણોત્સવ (લગ્ન વિધિ)ની પરંપરા અતૂટ શ્રદ્ધા સાથે ઉજવાય છે.
૧,૦૦૦ વર્ષથી વધુ પ્રાચીન ઈતિહાસ
આ ઐતિહાસિક મંદિર લગભગ ૧,૦૦૦ વર્ષથી પણ વધુ જૂનું છે. પલ્લવ અને ચોલ શાસકોના સમયમાં આ મંદિરનું નિર્માણ તેમજ જીર્ણોદ્ધાર થયો હોવાના શિલાલેખો મળે છે. આ મંદિર ભગવાન વિષ્ણુના પરમ પવિત્ર ૧૦૮ દિવ્ય દેશમ (દિવ્ય ક્ષેત્રો) પૈકીનું એક ગણાય છે, જેના કારણે તેનું ધાર્મિક મહાત્મ્ય અનેકગણું વધી જાય છે. દેશ-વિદેશમાંથી રોજના હજારો શ્રદ્ધાળુઓ અહીં દર્શનાર્થે પધારે છે.
લગ્ન અને સંતાન પ્રાપ્તિની મનોકામના થાય છે પૂર્ણ
લોકમાન્યતા અનુસાર, જે યુવક-યુવતીઓના વિવાહમાં સતત વિલંબ થઈ રહ્યો હોય કે કુંડળીમાં કોઈ દોષ હોય, તેઓ આ મંદિરમાં આવીને વિશેષ પૂજા-અર્ચના કરે તો ટૂંક સમયમાં યોગ્ય જીવનસાથી મળે છે. પૂજા દરમિયાન ભક્તોને માળા પહેરાવવામાં આવે છે, જે વિવાહ સંપન્ન થયા બાદ ફરી મંદિરે આવીને સમર્પિત કરવાની પરંપરા છે. આ ઉપરાંત, સંતાન પ્રાપ્તિની ઈચ્છા રાખતા દંપતીઓ માટે પણ આ સ્થાન આશીર્વાદરૂપ માનવામાં આવે છે. મંદિરમાં વર્ષ દરમિયાન બ્રહ્મોત્સવમ, વૈકુંઠ એકાદશી અને પંગુની ઉત્તિરમ જેવા તહેવારો ધામધૂમથી ઉજવાય છે.
મંદિરે કેવી રીતે પહોંચવું?
હવાઈ માર્ગ: સૌથી નજીકનું એરપોર્ટ ચેન્નાઈ ઇન્ટરનેશનલ એરપોર્ટ છે, જે મંદિરથી આશરે ૪૦ કિલોમીટર દૂર છે. એરપોર્ટથી ટેક્સી કે કેબ દ્વારા સરળતાથી પહોંચી શકાય છે.
રેલવે માર્ગ: નજીકનું મોટું રેલવે સ્ટેશન ચેન્નાઈ સેન્ટ્રલ / ચેન્નાઈ એગ્મોર છે (આશરે ૪૨ કિમી). જ્યારે ચેંગલપટ્ટુ જંક્શન પણ નજીકનું મહત્વનું સ્ટેશન છે. ત્યાંથી ટેક્સી કે બસ દ્વારા મંદિર પહોંચી શકાય છે.
સડક માર્ગ: આ મંદિર ઈસ્ટ કોસ્ટ રોડ (ECR) પર સ્થિત છે, જે ચેન્નાઈ અને મહાબલીપુરમ (મામલ્લાપુરમ) વચ્ચે આવે છે. ચેન્નાઈથી મહાબલીપુરમ જતી રાજ્ય પરિવહનની નિયમિત બસો, ખાનગી કેબ કે પોતાના વાહન દ્વારા અહીં ખૂબ જ સરળતાથી પહોંચી શકાય છે.
