Paris Olympic / 7 મહિનાની પ્રેગનેન્સી... છતાં પણ લીધો ઓલિમ્પિકમાં ભાગ, આ એથ્લેટે સોશિયલ મીડિયા પર કર્યો ખુલાસો
ઓલિમ્પિક ગેમ્સમાં ભાગ લેવો એ દરેક એથ્લેટનું સપનું હોય છે. જો તમને આમાં મેડલ મળે છે તો તેનાથી સારુ
ઓલિમ્પિક ગેમ્સમાં ભાગ લેવો એ દરેક એથ્લેટનું સપનું હોય છે. જો તમને આમાં મેડલ મળે છે તો તેનાથી સારું શું હોઈ શકે છે. આ દિવસોમાં પેરિસ ઓલિમ્પિક પર આખી દુનિયાની નજર છે. આવી સ્થિતિમાં ત્યાંથી વિવિધ પ્રકારની વાર્તાઓ પણ સામે આવી રહી છે. હવે એક મોટો ખુલાસો સામે આવ્યો છે કે એક એથ્લેટે પ્રેગનેન્ટ હોવા છતાં ગેમ્સના આ મહાકુંભમાં ભાગ લીધો છે. તે ખેલાડીની વાર્તાએ સૌને ભાવુક કરી દીધા છે.
પ્રેગનેન્ટ છે ઈજિપ્તની ફેન્સર
હકીકતમાં, ઈજિપ્તની ફેન્સર નાદા હાફીઝે ખુલાસો કર્યો છે કે તેણે સાત મહિનાની પ્રેગનેન્ટ હોવા છતાં ઓલિમ્પિક ગેમ્સમાં ભાગ લીધો હતો. તેણીએ વર્લ્ડ કપ 10 એલિઝાબેથ ટાર્ટાકોવસ્કી સામે પ્રારંભિક મેચ જીતી હતી. હાફિઝે 15-13ના માર્જિનથી તાર્તાકોવ્સ્કી સામે વિમેન્સ વ્યક્તિગત ફેન્સીંગમાં પ્રથમ મુકાબલો જીત્યો હતો. જોકે, તે રાઉન્ડ ઓફ 16માં દક્ષિણ કોરિયાની જીયોન હાયોન્ગ સામે હારી ગઈ હતી.
ઓલિમ્પિકમાંથી બહાર થયા બાદ ખુલાસો કર્યો
હાફિઝે 29 જુલાઈના રોજ હાયોન્ગ સામે હારી ગયા બાદ તેના સોશિયલ મીડિયા એકાઉન્ટ પર તેની પ્રેગનેન્સી વિશે ખુલાસો કર્યો હતા. આ ખુલાસા બાદથી, હાફિઝને ફેન્સિંગ પ્રત્યેના તેના જુસ્સા અને સમર્પણ માટે ઘણી પ્રશંસા મળી રહી છે. હાયોન્ગ સામેની મેચમાં પણ હાફિઝે શાનદાર પ્રદર્શન કર્યું હતું.
મેદાન પર 2 નહીં પરંતુ 3 ખેલાડીઓ
હાફિઝે ઇન્સ્ટાગ્રામ પર લખ્યું, “તમે મેદાન પર જે બે ખેલાડીઓ જોયા તે વાસ્તવમાં ત્રણ હતા. હું, મારી હરીફ અને આપણી દુનિયામાં આવનારું મારું નાનું બાળક. મારા બાળક અને મારી સામે પડકારો હતા, પછી ભલે તે શારીરિક હોય કે ભાવનાત્મક હોય."
હાફિઝે ત્રીજી વખત ઓલિમ્પિકમાં ભાગ લીધો
હાફિઝે આગળ લખ્યું, "ગર્ભાવસ્થા પોતે જ મુશ્કેલ છે, પરંતુ જીવન અને રમતનું સંતુલન જાળવવા માટે લડવું ઘણું મુશ્કેલ હતું. હું ભાગ્યશાળી છું કે મારા પતિ ઇબ્રાહિમ ઇહાબ અને મારા પરિવારે મને આટલા સુધી પહોંચવામાં મદદ કરી. આ ખાસ ઓલિમ્પિક્સ અલગ હતું. ત્રણ વખતની ઓલિમ્પિયન પરંતુ આ વખતે નાના ઓલિમ્પિયન સાથે.'' હાફિઝે પેરિસ અભિયાન પહેલા રિયો ઓલિમ્પિક 2016 અને ટોક્યો ઓલિમ્પિક 2020માં પણ ઈજિપ્તનું પ્રતિનિધિત્વ કર્યું હતું.
