Olympics 2024 / હોકીમાં ટીમ ઈન્ડિયાનો દબદબો! ક્વાર્ટર ફાઈનલની ટિકિટ મળી, મેડલ જીતવાની આશા વધી

પેરિસ ઓલિમ્પિક 2024માં ભારતે અત્યાર સુધીમાં બે મેડલ જીત્યા છે, પરંતુ દેશવાસીઓ હજુ પણ ગોલ્ડની આતુરતાથી રાહ જોઈ રહ્યા છે. આ બધાની વચ્ચે ભારતીય હોકી ટીમ ઓલિમ્પિક 2024માં તિરંગો લહેરાવી રહી છે. ભારતીય હોકી ટીમ દરેક મેચમાં સફળ રહી છે. હરમનપ્રીત સિંહની ટીમે શાનદાર પ્રદર્શન કર્યું અને ક્વાર્ટર ફાઈનલની ટિકિટ મેળવી છે. જ્યારે ગ્રુપ સ્ટેજમાં હજુ બે મેચ બાકી છે. આવી સ્થિતિમાં હોકી ટીમ પાસેથી મેડલની અપેક્ષા વધી ગઈ છે.

ભારતીય હોકી ટીમની અત્યાર સુધીની મેચ 

ભારતીય હોકી ટીમે અત્યાર સુધીમાં ત્રણ મેચ રમી છે. ત્રણ મેચમાંથી ભારત બે જીતવામાં સફળ રહ્યું છે અને એક મેચ ડ્રો રહી હતી. ભારતની પ્રથમ મેચ ન્યુઝીલેન્ડ સામે રમાઈ હતી. જેમાં ભારતે 3-2થી જીત મેળવી હતી. ભારતની બીજી મેચ આર્જેન્ટિના સામે રમાઈ હતી. આ મેચ 1-1થી ડ્રો રહી હતી. ભારતની ત્રીજી મેચ આયર્લેન્ડ સામે રમાઈ હતી. જેમાં ભારત 2-0થી જીત મેળવવામાં સફળ રહ્યું હતું.

ઓલિમ્પિક 2024ના પોઈન્ટ ટેબલમાં ભારતીય હોકી ટીમ

ટુર્નામેન્ટમાં કુલ 12 ટીમો ભાગ લઈ રહી છે, જેને બે ગ્રુપમાં વહેંચવામાં આવી છે. ગ્રુપ સ્ટેજમાં દરેક ટીમ એક-બીજાનો સામનો કરશે. ભારતને બેલ્જિયમ, ઓસ્ટ્રેલિયા, આર્જેન્ટિના, ન્યુઝીલેન્ડ અને આયર્લેન્ડની સાથે પૂલ Bમાં રાખવામાં આવ્યું છે. અત્યાર સુધી તમામ ટીમોએ 3-3 મેચ રમી છે. બેલ્જિયમ ત્રણેય મેચ જીતીને પોઈન્ટ ટેબલમાં ટોચ પર છે. ભારત બે જીત અને એક ડ્રો સાથે પોઈન્ટ ટેબલમાં બીજા સ્થાને છે. ઓસ્ટ્રેલિયા એક હાર અને બે જીત સાથે ત્રીજા સ્થાને છે. આર્જેન્ટિના એક જીત, એક હાર અને એક ડ્રો સાથે ચોથા સ્થાને છે. ન્યુઝીલેન્ડ અને આયર્લેન્ડ પોતાની ત્રણેય મેચ હારી ચૂક્યા છે. ન્યુઝીલેન્ડ પાંચમા અને આયર્લેન્ડ છઠ્ઠા સ્થાને છે. તમને જણાવી દઈએ કે આ પોઈન્ટ ટેબલ પૂલ Bનું છે. ત્રણ મેચ રમ્યા બાદ બેલ્જિયમ અને ભારતને ક્વાર્ટર ફાઈનલની ટિકિટ મળી ગઈ છે.

ભારતીય હોકી ટીમની આગામી ગ્રુપ સ્ટેજ મેચ

ત્રણ મેચમાં શાનદાર પ્રદર્શન કર્યા બાદ હરમનપ્રીત સિંહની કપ્તાનીવાળી ભારતીય હોકી ટીમ તેની ચોથી મેચ 1 ઓગસ્ટે બેલ્જિયમ સામે રમશે. આ મેચ બપોરે 1.30 કલાકે રમાવાની છે. આ પછી ભારતીય હોકી ટીમ ગ્રુપ સ્ટેજની તેની છેલ્લી મેચ ઓસ્ટ્રેલિયા સામે 2 ઓગસ્ટે સાંજે 4:45 કલાકે રમશે.