Olympic 2024 / એક હાર બાદ રેસલિંગ છોડી દેવાની હતી રિતિકા હુડ્ડા, આ રીતે પહોંચી પેરિસ ઓલિમ્પિક

પેરિસ ઓલિમ્પિક 2024માં મોટાભાગના ભારતીય રેસલર મેડલ જીતવામાં નિષ્ફળ રહ્યા હતા. વિનેશ ફોગાટના ડિસ્ક્વોલિફિકેશન બાદ આ રમતમાં મેડલની શક્યતા ઓછી દેખાતી હતી, પરંતુ 9 ઓગસ્ટે 21 વર્ષના યુવા રેસલર અમન સેહરાવતે આ સિદ્ધિ મેળવી હતી. તેણે ભારત માટે બ્રોન્ઝ મેડલ જીત્યો હતો. હવે ભારતની છેલ્લી રેસલર રિતિકા હુડ્ડા પેરિસમાં કુસ્તીના અખાડામાં ઉતરવા જઈ રહી છે. તે 10 ઓગસ્ટ, શનિવારે 76 કિગ્રા વજન વર્ગમાં પ્રી-ક્વાર્ટર ફાઈનલ મેચ રમશે. તમને જણાવી દઈએ કે આ કેટેગરીમાં ઓલિમ્પિકમાં પહોંચનારી તે પ્રથમ ભારતીય મહિલા છે. જોકે રિતિકાની સફર એટલી સરળ નહોતી. એક સમયે તે એટલી ભાંગી પડી હતી કે તેણે કુસ્તી છોડી દેવાનો નિર્ણય લીધો હતો.

હારથી ઓલિમ્પિક સુધીની સફર

22 વર્ષની રિતિકા રોહતકના ખરકડા ગામની રહેવાસી છે. તેણે ખૂબ જ નાની ઉંમરે કુસ્તી શરૂ કરી હતી અને એક દિવસ ભારત માટે ઓલિમ્પિક મેડલ જીતવાનું સપનું હતું. આ માટે તેના માતા-પિતાએ પણ તેને સપોર્ટ આપ્યો હતો. નાણાકીય સમસ્યાઓ હોવા છતાં, તેની દરેક જરૂરિયાતનું ધ્યાન રાખવામાં આવ્યું હતું. 2022માં મળેલી હારથી તેને ઘણો આઘાત લાગ્યો હતો. તે એશિયન ગેમ્સ અને કોમનવેલ્થ ગેમ્સ બંને માટે ક્વોલિફાય કરી શકી નહોતી. રિતિકા તેનાથી એટલી નિરાશ થઈ ગઈ કે તેણે કુસ્તી છોડી દેવાનો નિર્ણય કર્યો હતો.

પછી તેના માતા-પિતા તેના સપોર્ટમાં આવ્યા. બંનેએ પોતાની દીકરીને ઘણું સમજાવ્યું અને હારમાંથી સ્વસ્થ થઈને આગળ વધવાની તાકાત આપી. થોડા સમય પછી, રિતિકા આનાથી પ્રેરિત થઈ અને ફરી એકવાર સખત મહેનત કરવા લાગી. તેના કહેવા પ્રમાણે, તે આ માટે દરરોજ 7થી 8 કલાક પરસેવો પાડે છે. તેનો ફાયદો પણ તેને મળ્યો છે.

અંડર-23ની પ્રથમ ભારતીય મહિલા ચેમ્પિયન

રિતિકાએ 2023માં અંડર-23 વર્લ્ડ ચેમ્પિયનશિપમાં ભાગ લીધો હતો અને ગોલ્ડ મેડલ જીતીને સફળતા હાંસલ કરી હતી. તે આવું કરનાર પ્રથમ ભારતીય મહિલા પણ બની હતી. તેનાથી તેનો આત્મવિશ્વાસ પણ વધ્યો. આ પછી, તેણીએ ઓલિમ્પિક માટે સખત મહેનત કરવાનું ચાલુ રાખ્યું અને દરેક મેચમાં મુક્ત માનસિકતા સાથે રમવાનું નક્કી કર્યું. રિતિકાએ પેરિસ જતા પહેલા ગોલ્ડ મેડલને પોતાનું લક્ષ્ય ગણાવ્યું હતું. હવે તે તેનાથી માત્ર 4 ડગલાં દૂર છે. પોતાનું સપનું પૂરું કરવા માટે તેને વધુ 4 મેચ જીતવી પડશે. જો કે, તેની પ્રથમ મેચ રાઉન્ડ ઓફ 16ની હશે.