Paris Olympic / ભારતીય સ્ટાર અશ્વિની પોનપ્પાએ કરી સંન્યાસની જાહેરાત, કહ્યું- 'આ મારી છેલ્લી ઓલિમ્પિક'

ભારતીય બેડમિન્ટન ખેલાડી અશ્વિની પોનપ્પાએ નિવૃત્તિની જાહેરાત કરી છે. તેણે કહ્યું કે, આ તેની છેલ્લી ઓલિમ્પિક હતી. મંગળવારે, તે અને તેની પાર્ટનર તનિષા ક્રાસ્ટોને પેરિસ ઓલિમ્પિકની વિમેન્સ ડબલ્સ ઈવેન્ટમાં સતત ત્રીજી વખત હારનો સામનો કરવો પડ્યો. અશ્વિની અને તનિષાની જોડી ગ્રુપ સીની અંતિમ મેચમાં ઓસ્ટ્રેલિયાની સેટિયાના માપાસા અને એન્જેલા યુ સામે 15-21, 10-21થી હારી ગઈ હતી. તેમની ત્રણેય ગ્રુપ મેચો હાર્યા બાદ તેમનું અભિયાન સમાપ્ત થયું છે.

અશ્વિનીએ 2001માં તેનું પ્રથમ નેશનલ ટાઈટલ જીત્યું અને જ્વાલા ગુટ્ટા સાથે એક પ્રચંડ અને ઈતિહાસ સર્જનારી મહિલા જોડી બનાવી. જ્વાલા ગુટ્ટા 2017 સુધી રમી હતી. તેણીએ 2010 દિલ્હી કોમનવેલ્થ ગેમ્સમાં ગોલ્ડ મેડલ અને ઉબેર કપ (2014 અને 2016) અને એશિયન ચેમ્પિયનશીપ (2014)માં બ્રોન્ઝ મેડલ સહિત અનેક આંતરરાષ્ટ્રીય મેડલ જીત્યા હતા.

જ્યારે 34 વર્ષીય અશ્વિની, જે તેની ત્રીજી ઓલિમ્પિકમાં રમી રહી છે, તેને પૂછવામાં આવ્યું કે, શું તે 2028ની લોસ એન્જલસ ગેમ્સમાં રમવા માંગે છે, તો તેણે કહ્યું, "આ મારી છેલ્લી ઓલિમ્પિક હશે, પરંતુ તનિષાએ હજુ લાંબી મજલ કાપવાની છે. તે ભાવનાત્મક અને માનસિક રીતે તે ખૂબ ભારે છે, હું તેને ફરીથી સહન નહીં કરી શકું. તે સરળ નથી, જો તમે થોડા નાના છો તો તમે તેને સહન કરી શકો છો. આટલા લાંબા સમય સુધી રમ્યા પછી, હું હવે સહન નથી કરી શકતી."