પેરિસ ઓલિમ્પિકમાં ભારતીય હોકીના સરપંચનું શાનદાર પ્રદર્શન, બ્રોન્ઝ મેડલ સાથે હરમનપ્રીત સિંહે કર્યા સૌથી વધુ ગોલ

પેરિસ ઓલિમ્પિક 2024માં ભારતને ચોથો મેડલ હોકી ટીમ તરફથી મળ્યો હતો. ભારતીય હોકી ટીમે પેરિસ ઓલિમ્પિકમાં તેની બ્રોન્ઝ મેડલ મેચ સ્પેન સામે રમી હતી, જેમાં 2-1થી જીત મેળવી હતી. આ સાથે ભારતીય હોકી ટીમે સતત બીજો ઓલિમ્પિક બ્રોન્ઝ મેડલ જીત્યો હતો. ભારતીય હોકી ટીમના સરપંચ (કેપ્ટન) હરમનપ્રીત સિંહ માટે આ ઓલિમ્પિક ખૂબ જ યાદગાર રહ્યો હતો. તેણે પ્રથમ વખત ઓલિમ્પિકમાં ભારતીય ટીમની કમાન સંભાળી હતી અને મેડલ જીતાડવામાં પણ સફળ રહ્યો હતો. તેણે એક ખેલાડી તરીકે પણ અદભૂત પ્રદર્શન કર્યું.

હરમનપ્રીત સિંહનું રેકોર્ડબ્રેક પ્રદર્શન

ભારતીય હોકી ટીમના કેપ્ટન હરમનપ્રીત સિંહે પેરિસ ઓલિમ્પિક 2024માં કુલ 10 ગોલ કર્યા, જે અન્ય ખેલાડીઓની સરખામણીમાં સૌથી વધુ છે. તેણે પેરિસ ઓલિમ્પિકમાં જર્મની, ગ્રેટ બ્રિટન, આર્જેન્ટિના અને ન્યુઝીલેન્ડ સામે રમાયેલી મેચોમાં એક-એક ગોલ કર્યા હતા તે જ સમયે, તેણે આયર્લેન્ડ, ઓસ્ટ્રેલિયા અને સ્પેન સામે બે-બે ગોલ કર્યા હતા. બ્રોન્ઝ મેડલ મેચમાં ભારત તરફથી બે ગોલ થયા હતા, બંને ગોલ હરમનપ્રીત સિંહે કર્યા હતા.

ભારતની બ્રોન્ઝ મેડલની સફર

પેરિસ ઓલિમ્પિકમાં ભારતને માત્ર 2 મેચમાં હારનો સામનો કરવો પડ્યો હતો. ભારતે પોતાના અભિયાનની શરૂઆત ન્યુઝીલેન્ડને 3-2થી હરાવીને કરી હતી. આ પછી આર્જેન્ટિના સામેની મેચ 1-1ની બરાબરી પર સમાપ્ત થઈ હતી. ત્યારબાદ ત્રીજી મેચમાં ભારતીય ટીમે આયર્લેન્ડને 2-0થી હરાવ્યું હતું. આ પછી બેલ્જિયમ સામે 1-2થી હારનો સામનો કરવો પડ્યો હતો. આ બાદ ભારતે ઓસ્ટ્રેલિયાને હરાવ્યું અને પેનલ્ટી શૂટઆઉટમાં બ્રિટનને 4-2થી હરાવ્યું હતું. પરંતુ સેમીફાઈનલમાં ભારતીય ટીમ જર્મની સામે 2-3થી પરાજય પામી હતી. આ પછી ભારતે બ્રોન્ઝ મેડલ મેચમાં શાનદાર વાપસી કરી અને મેડલ જીત્યો.

ઐતિહાસિક જીત બાદ હરમનપ્રીતે શું કહ્યું?

બ્રોન્ઝ મેડલ જીત્યા બાદ હરમનપ્રીત સિંહે કહ્યું કે, "આ તબક્કે રાહ લાંબી છે. હોકી ખેલાડી માટે આ સરળ નથી. અમે ખુશ છીએ કે અમે એક ટીમ તરીકે રમ્યા અને એકબીજામાં વિશ્વાસ હતો. કોચનો પણ આભાર. અમારું સપનું ગોલ્ડ મેડલ જીતવાનું હતું અને બધાને વિશ્વાસ હતો કે અમે જીતીશું. હું માફી માંગવા માંગુ છું કારણ કે અમે તેને નજીક આવીને ચુકી ગયા, પરંતુ આ મેડલ પણ અમારા માટે બધું જ છે."