પેરિસ ઓલિમ્પિકના દરેક મેડલમાં વપરાયું છે એફિલ ટાવરનું લોખંડ, જાણો તેની પાછળની આખી સ્ટોરી

રમતગમતમાં મેડલ જીતવાથી ખેલાડીનું જીવન બદલાઈ શકે છે. દરેક રમતવીરનું આનું સપનું હોય છે અને આ ભાવના સાથે આ વર્ષે પેરિસમાં યોજાઈ રહેલી ઓલિમ્પિક ગેમ્સમાં ભાગ લેવા માટે વિશ્વભરના ખેલાડીઓ આવ્યા છે. પેરિસ ઓલિમ્પિક 2024 માટે મેડલ ખાસ તૈયાર કરવામાં આવ્યા છે. માર્ટિન ફોરકેડના નેતૃત્વમાં પેરિસ 2024 એથ્લેટ કમિશન, મેડલને વિશેષ રીતે તૈયાર કરવા પર વિચારણા કરી હતી. વિશ્વ પ્રસિદ્ધ એફિલ ટાવરને ઓલિમ્પિક મેડલ્સ સાથે સાંકળવાનું નક્કી કરવામાં આવ્યું હતું. તેથી જ દરેક ઓલિમ્પિક અને પેરાલિમ્પિક મેડલને એફિલ ટાવરના મૂળ લોખંડના ટુકડાથી શણગારવામાં આવે છે. વાસ્તવમાં, 1887-1889ની વચ્ચે બનેલ એફિલ ટાવરનું ઘણી વખત નવીનીકરણ કરવામાં આવ્યું છે. આ સમય દરમિયાન તેમાંથી કાઢવામાં આવેલી ધાતુને સાચવવામાં આવી હતી. હવે પેરિસ 2024 ગેમ્સ માટે તૈયાર કરવામાં આવેલા મેડલમાં પણ આ ધાતુનો ઉપયોગ કરવામાં આવ્યો છે. તેની પાછળ ઓલિમ્પિક કમિશનનો ઈરાદો એફિલ ટાવર અને ફ્રેન્ચ ઈતિહાસને રમતગમત સાથે જોડવાનો છે.

આવી છે મેડલની ડિઝાઇન 

ફ્રાન્સમાં છેલ્લી સમર ગેમ્સના 100 વર્ષ પછી ચેમ્પિયનની વાપસીની ઉજવણી કરવા માટે મેડલને રિયલ જ્વેલરીની જેમ ડિઝાઇન કરવામાં આવ્યા છે. આ માટે ફ્રેન્ચ જ્વેલર ચૌમેટની કુશળતાનો ઉપયોગ કરવામાં આવ્યો છે. LVMH ગ્રૂપની કંપનીએ આ મેડલ તૈયાર કર્યા છે. ફ્રેન્ચ કારીગરીની કુશળતા, સુંદરતા અને શિલ્પ કૌશલ તરીકે વિશ્વ વિખ્યાત, ચૌમેટ ત્રણ પ્રેરણાઓ પર આધારિત ડિઝાઇનની સાથે શ્રેષ્ઠ જ્વેલરીની ડિઝાઇન લઈને આવ્યા છે - હેક્સાગોન, રેડિયન્સ અને જેમ સેટિંગ. એફિલ ટાવર અને ગેમ્સ મેડલને એકસાથે લાવવા માટે સમાન રીતે પ્રતીકાત્મક કારીગરી જરૂરી છે. આ કારણે ચૌમેટનું LVMH હાઉસ પસંદ કરવામાં આવ્યું હતું. મેડલને એફિલ ટાવરમાંથી નીકળેલા લોખંડના ટુકડાથી શણગારવામાં આવ્યા છે. આ ઉપરાંત મેડલની રિબનમાં પણ ખાસ રંગોનો ઉપયોગ કરવામાં આવ્યો છે. ઓલિમ્પિક અને પેરાલિમ્પિક ગેમ્સ પેરિસ 2024 માટે મેડલ રિબન એફિલ ટાવરની જાળીની જેમ ડિઝાઇન કરવામાં આવ્યા છે. ઓલિમ્પિક મેડલની રિબન ઘેરા વાદળી છે, જ્યારે પેરાલિમ્પિક મેડલની રિબન ઘેરા લાલ છે.

દરેક મેડલનું હશે આટલું વજન
ફોર્બ્સની રિપોર્ટ અનુસાર આ વખતે ઓલિમ્પિકમાં 529 ગ્રામ વજનનો મેડલ આપવામાં આવશે. લગભગ 95.4 ટકા ગોલ્ડ મેડલ વાસ્તવમાં ચાંદી (505 ગ્રામ)થી બનેલો છે. તેમાં માત્ર 6 ગ્રામ શુદ્ધ સોનું અને 18 ગ્રામ આયર્ન છે. પેરિસ ઓલિમ્પિકમાં આપવામાં આવેલા ગોલ્ડ મેડલની કિંમત 950 ડોલર (લગભગ 80 હજાર રૂપિયા) છે. શુદ્ધ સોનાના બનેલા મેડલ છેલ્લે 1912માં આપવામાં આવ્યા હતા. જો આજે આવા મેડલ તૈયાર કરવામાં આવે તો એક મેડલની કિંમત લગભગ 35 લાખ રૂપિયા થશે. સિલ્વર મેડલનું વજન 525 ગ્રામ છે. તેમાં 507 ગ્રામ ચાંદી અને 18 ગ્રામ આયર્ન હોય છે. તેની કિંમત લગભગ 486 ડોલર (લગભગ 41 હજાર રૂપિયા) છે. બ્રોન્ઝ મેડલનું વજન 455 ગ્રામ છે. તેમાં 415.15 ગ્રામ તાંબુ, 21.85 ગ્રામ જસત અને 18 ગ્રામ આયર્ન હોય છે. તેની કિંમત 13 ડોલર (લગભગ 1100 રૂપિયા) છે.