'તમે હાર્યા નથી...', વિનેશ ફોગાટની નિવૃત્તિ પર બજરંગ પુનિયા અને સાક્ષી મલિક થયા ગુસ્સે

પેરિસ ઓલિમ્પિકમાંથી ડિસક્વોલિફાય જાહેર થયા બાદ નિરાશ અને દુ:ખી ભારતીય કુસ્તીબાજ વિનેશ ફોગાટે ગુરુવારે કુસ્તીમાંથી નિવૃત્તિ લેવાની જાહેરાત કરી હતી. વિનેશ ફોગાટે સોશિયલ મીડિયા પર એક ઈમોશનલ મેસેજ શેર કર્યો છે. ઉલ્લેખનીય છે કે, ગોલ્ડ મેડલ મેચ પહેલા વજન દરમિયાન વિનેશ ફોગાટનું વજન 100 ગ્રામ વધુ જોવા મળ્યું હતું, ત્યારબાદ તેને ડિસક્વોલિફાય કરવામાં આવી હતી. વિનેશ ફોગાટે મંગળવારે 50 કિલો ફ્રી સ્ટાઇલ રેસલિંગની ફાઇનલમાં પહોંચીને ઇતિહાસ રચ્યો હતો. ડિસક્વોલિફાય થતાં પહેલાં, તેને ઓછામાં ઓછું સિલ્વર મેડલ મળવાનું નિશ્ચિત હતું.

વિનેશની નિવૃત્તિ પર બજરંગ પુનિયાનું દિલ તૂટી ગયું

વિનેશ ફોગાટની નિવૃત્તિના સમાચાર સાંભળીને સાથી ભારતીય કુસ્તીબાજ બજરંગ પુનિયાનું દિલ તૂટી ગયું છે. બજરંગ પુનિયાએ સોશિયલ મીડિયા પ્લેટફોર્મ (X) પર એક પોસ્ટ શેર કરીને પોતાનો ગુસ્સો વ્યક્ત કર્યો છે. બજરંગ પુનિયાએ (X) પર લખ્યું, ‘વિનેશ તમે હાર્યા નથી, તમને હરાવવામાં આવી છે. તમે હંમેશા અમારા માટે વિજેતા જ રહેશો. ભારતની દીકરી હોવાની સાથે તમે ભારતનું ગૌરવ પણ છો.’

X પર જુઓ

સાક્ષી મલિક પણ થઈ ભાવુક

સાથી મહિલા રેસલર સાક્ષી મલિકે પણ વિનેશ ફોગાટની નિવૃત્તિ પર પોતાની પ્રતિક્રિયા આપી છે. સોશિયલ મીડિયા પ્લેટફોર્મ (X) પર પોસ્ટ શેર કરતી વખતે, સાક્ષી મલિકે લખ્યું, ‘વિનેશ, તમે હાર્યા નથી, દરેક દીકરી જેના માટે તમે લડ્યા અને જીત્યા તે હારી છે. આ સમગ્ર ભારત દેશની હાર છે. દેશ તમારી સાથે છે. એક ખેલાડી તરીકે તેના સંઘર્ષ અને જુસ્સાને સલામ.’ 

X પર જુઓ

આ સિવાય કોંગ્રેસ નેતા શશિ થરૂરે પોસ્ટ શેર કરતા લખ્યું, 'ઇસ સિસ્ટમ સે પક ગઈ હૈ યે લડકી, 
લડતે-લડતે થક ગઈ હૈ યે લડકી...’

X પર જુઓ

શું હતો સમગ્ર મામલો?

ઉલ્લેખનીય છે કે, સેમીફાઈનલ જીત્યા બાદ વિનેશ ફોગાટ પાસે ગોલ્ડ મેડલ જીતવાની સારી તક હતી. કોને ખબર હતી કે, વિનેશ ફોગટ સાથે આખા દેશની આશાઓ માત્ર 100 ગ્રામના બોજ નીચે દટાઈ જશે. પેરિસ ઓલિમ્પિકમાં દેશ માટે ગોલ્ડ મેડલ જીતવાથી એક જીત દૂર રહેલી વિનેશ ફોગાટ 50 કિગ્રા કેટેગરીની ફાઇનલમાં વજન માટે ઉભી થઈ તો તેનું વજન 100 ગ્રામ વધુ હોવાનું જાણવા મળ્યું હતું, જેના કારણે તેને તેની કારકિર્દીના સૌથી મોટા દિવસે ઓલિમ્પિકમાંથી ડિસક્વોલિફાય કરવામાં આવી.ે