ડિનરમાં બનાવો ઢાબા સ્ટાઇલ 'રાજમા મલાઈ કોફ્તા', મોંમાં મૂકતાં જ ઓગળી જશે મલાઈદાર સ્વાદ
છેલ્લું અપડેટ : 07 Oct 2026
રોજ-રોજ રાતના ભોજનમાં એ જ દાળ, બટાકા કે પનીરનું શાક ખાઈને જો તમે કંટાળી ગયા હોવ, તો આજે કંઈક નવું અને સ્વાદિષ્ટ ટ્રાય કરવાનો દિવસ છે. જી હા, રેસ્ટોરન્ટ કે ઢાબાનું મસાલેદાર ખાવાનું કોને પસંદ નથી હોતું? પણ કેવું રહે જો એ જ શાનદાર સ્વાદ તમને તમારી પોતાની જ રસોઈમાં મળી જાય? આજે અમે તમારા માટે લઈને આવ્યા છીએ એક એકદમ ખાસ અને અનોખી વાનગી - રાજમા મલાઈ કોફ્તા.
મલાઈ કોફ્તા તો તમે ઘણીવાર ખાધા હશે, પણ રાજમામાંથી બનેલા આ કોફ્તાનો સ્વાદ એકદમ હટકે હોય છે. રાજમાના નરમ કોફ્તા જ્યારે કાજુ અને મલાઈવાળી રિચ ગ્રેવીમાં બોળાય છે, ત્યારે મોંમાં મૂકતાં જ ઓગળી જાય છે. આ ડીશ વીકેન્ડ ડિનર કે ઘરે આવેલા મહેમાનોને ઈમ્પ્રેસ કરવા માટે એકદમ પરફેક્ટ છે. ચાલો જાણીએ તેને બનાવવાની સરળ રીત.
રાજમા મલાઈ કોફ્તા બનાવવા માટેની સામગ્રી
કોફ્તા માટે
1 કપ બાફેલા રાજમા (રાતભર પલાળેલા અને સારી રીતે બાફેલા)
2 બાફેલા બટાકા (બાઇન્ડિંગ માટે)
1 ઝીણી સમારેલી ડુંગળી અને 2 લીલા મરચાં
ઝીણી સમારેલી લીલી કોથમીર
અડધી ચમચી ગરમ મસાલો, અડધી ચમચી લાલ મરચું પાવડર અને સ્વાદાનુસાર મીઠું
તળવા માટે તેલ
ઢાબા સ્ટાઇલ ગ્રેવી માટે:
2 મોટી ડુંગળી અને 3 ટામેટાંની પેસ્ટ
1 ચમચી આદુ-લસણની પેસ્ટ
8-10 કાજુની પેસ્ટ (રિચનેસ માટે)
અડધો કપ તાજી મલાઈ કે ક્રીમ
1-1 ચમચી ધાણાજીરું પાવડર, હળદર અને કાશ્મીરી લાલ મરચું
1 ચમચી કસુરી મેથી
2 ચમચી તેલ અથવા માખણ
રાજમા મલાઈ કોફ્તા બનાવવાની રીત
સૌપ્રથમ એક મોટા વાસણમાં બાફેલા રાજમાને સારી રીતે મેશ (ચોળી) કરી લો. ધ્યાન રહે કે રાજમામાં પાણી ન હોય. હવે તેમાં બાફેલા બટાકા, ઝીણી સમારેલી ડુંગળી, લીલા મરચાં, લીલી કોથમીર અને બધા સૂકા મસાલા ઉમેરીને સારી રીતે મિક્સ કરી લો. આ મિશ્રણમાંથી નાના-નાના ગોળ કે લંબગોળ કોફ્તા બનાવી લો. હવે એક કડાઈમાં તેલ ગરમ કરો અને આ કોફ્તાને ગોલ્ડન બ્રાઉન અને ક્રિસ્પી થાય ત્યાં સુધી તળી લો. તેને એક પ્લેટમાં કાઢીને બાજુ પર રાખી દો.
હવે ગ્રેવી બનાવવા માટે બીજી કડાઈમાં માખણ કે તેલ ગરમ કરો. તેમાં થોડું જીરું અને આદુ-લસણની પેસ્ટ ઉમેરીને સાંતળો. હવે ડુંગળીની પેસ્ટ નાખો અને ગુલાબી થાય ત્યાં સુધી પકાવો. ત્યારબાદ ટામેટાંની પેસ્ટ, હળદર, ધાણાજીરું અને કાશ્મીરી લાલ મરચું ઉમેરીને મસાલો તેલ છોડવા લાગે ત્યાં સુધી સાંતળો.
મસાલો બરાબર સંતળાઈ જાય પછી તેમાં કાજુની પેસ્ટ ઉમેરો અને 2 મિનિટ સુધી પકાવો. હવે ગેસની આંચ ધીમી કરો અને તેમાં તાજી મલાઈ કે ક્રીમ ઉમેરો. તેને સતત હલાવતા રહો જેથી ગ્રેવી ફાટી ન જાય. હવે તેમાં અડધો કપ પાણી અને સ્વાદાનુસાર મીઠું નાખીને ગ્રેવીમાં એક ઉકાળો આવવા દો.
ગ્રેવી ઘટ્ટ થાય એટલે તેમાં કસુરી મેથી અને થોડી લીલી કોથમીર ઉમેરો અને ગેસ બંધ કરી દો. ધ્યાન રાખો કે કોફ્તાને ઉકળતી ગ્રેવીમાં ન નાખવા, નહીં તો તે તૂટી શકે છે. જ્યારે પણ તમારે પીરસવું હોય, ત્યારે એક સર્વિંગ બાઉલમાં પહેલા કોફ્તા મૂકો અને ઉપરથી ગરમાગરમ મલાઈદાર ગ્રેવી રેડો.
લીજીએ, તમારું ઢાબા સ્ટાઇલ 'રાજમા મલાઈ કોફ્તા' એકદમ તૈયાર છે. તેને ગરમાગરમ બટર નાન, લચ્ચા પરોઠા કે જીરા રાઇસ સાથે પીરસો. માનો કે ન માનો, જે પણ આ ખાશે, તે આંગળા ચાટતા રહી જશે અને તમારી પાસે આની રેસિપી ચોક્કસ માંગશે.
