VIDEO: Recipe / આ રીતે ઘરે બનાવો સ્વાદિષ્ટ દૂધીની બરફી; ટેસ્ટી જ નહીં, હેલ્ધી પણ છે આ મીઠાઈ!
છેલ્લું અપડેટ : 12 Jul 2026
જો તમારું કંઈક ગળ્યું, હેલ્ધી અને ટેસ્ટી ખાવાનું મન હોય, તો તમે દૂધીની બરફી બનાવીને ખાઈ શકો છો. દૂધીની બરફી ખાવામાં ખૂબ જ સ્વાદિષ્ટ લાગે છે. તમે આ બરફી ઉપવાસમાં પણ ખાઈ શકો છો. દૂધીની બરફી ખાવાથી તમને પેટમાં બહુ ભારેપણું પણ લાગશે નહીં. એકવાર આ રીતે બરફી બનાવીને ખાશો તો વારંવાર ખાવાનું મન થશે. ફટાફટ નોંધી લો દૂધીની બરફી બનાવવાની સરળ રેસિપી.
દૂધીની બરફી બનાવવાની રેસિપી
પહેલું સ્ટેપ: બરફી બનાવવા માટે તમારે એકદમ તાજી, કુણી અને લીલી દૂધી લેવાની છે. દૂધીને છોલી, ધોઈને છીણી લો. હવે છીણેલી દૂધીને એક કડાઈમાં ઉકળવા (પાકવા) માટે મૂકી દો. પાણી ઉમેર્યા વગર જ દૂધીને થોડીવાર ઢાંકીને પકવશો તો તે સરળતાથી ગળી જશે (સોફ્ટ થઈ જશે). વચ્ચે-વચ્ચે ખોલીને ચેક કરતા રહો કે દૂધી બરાબર ચઢી ગઈ છે કે નહીં.
બીજું સ્ટેપ: જ્યારે દૂધી બરાબર ચઢી જાય ત્યારે તેમાં તમારા સ્વાદ મુજબ ખાંડ ઉમેરો. જો ગળપણ ઓછું પસંદ હોય તો ખાંડનું પ્રમાણ ઓછું રાખી શકો છો. ખાંડ વધારે નાખવાથી બરફી સરળતાથી જામી જાય છે પરંતુ થોડી કડક બને છે. હવે દૂધી અને ખાંડ ઓગળી જાય ત્યાં સુધી તેને પકવો. જ્યારે ખાંડ ઓગળીને તેમાં બબલ્સ જેવું થવા લાગે ત્યારે સમજી લેવું કે મિશ્રણ બરફી માટે તૈયાર છે.
ત્રીજું સ્ટેપ: બીજી બાજુ, તમે પહેલાથી જ દૂધ ઉકાળીને માવો બનાવી લો. માવો બહુ વધારે પ્રમાણમાં લેવાનો નથી. જો તમે 1 મોટી દૂધીની બરફી બનાવી રહ્યા હોવ, તો તેના માટે 1 વાટકી એટલે કે 200 ગ્રામ માવો પૂરતો છે. આટલો માવો તમે 1 લીટર દૂધમાંથી તૈયાર કરી શકો છો. જ્યારે માવો બનીને તૈયાર થઈ જાય, ત્યારે તેને દૂધીવાળા મિશ્રણમાં ઉમેરી દો. હવે તેને થોડું ઘટ્ટ થાય ત્યાં સુધી સતત હલાવતા રહીને પકવો.
ચોથું સ્ટેપ: દૂધી અને માવો મિક્સ થયા પછી જ્યારે તે જામવા માટે તૈયાર થશે, ત્યારે તમને ખ્યાલ આવી જશે કે મિશ્રણ કડાઈની કિનારીઓ છોડવા લાગશે અથવા સહેજ ચોંટવા લાગશે. હવે સમજી લેવું કે દૂધીની બરફી જામવા માટે એકદમ તૈયાર છે. એક થાળી લો અને તેમાં ઘી લગાવી દો. હવે તેમાં તૈયાર કરેલું દૂધીનું મિશ્રણ ઉમેરી દો. તેને પ્લેટમાં પાથરીને બરાબર સેટ કરી લો. તેને 1 કલાક માટે ઠંડુ થવા મૂકી દો. જ્યારે બરફી બરાબર સેટ થઈ જાય, ત્યારે ચપ્પુની મદદથી તેના ટુકડા કરી લો. તૈયાર છે દૂધીની સ્વાદિષ્ટ બરફી! તમે તમારી પસંદગી મુજબ તેમાં કાજુ-બદામના ટુકડા પણ ઉમેરી શકો છો.
