Recipe: સાંજના નાસ્તામાં કંઈક નવું ટ્રાય કરવું છે? નોંધી લો સ્પેશિયલ સાંભર વડીની રેસીપી
છેલ્લું અપડેટ : 29 Apr 2026
નાગપુરની પ્રખ્યાત સાંભર વડી (કોથમીર વડી) હવે તમે ઘરે જ બનાવી શકો છો. આ એક એવો ચટપટો અને કુરકુરો નાસ્તો છે જે સ્વાદમાં લાજવાબ છે અને બનાવવામાં એકદમ સસ્તો.
1. લોટ તૈયાર કરવાની રીત
સૌ પ્રથમ એક વાસણમાં ઘઉંનો લોટ અને ચણાનો લોટ (બેસન) મિક્સ કરો. તેમાં સ્વાદ મુજબ મીઠું, અજમો અને થોડું ગરમ તેલનું મોણ નાખીને બરાબર મિક્સ કરો. હવે થોડું-થોડું પાણી ઉમેરીને નરમ લોટ બાંધી લો. લોટને ૧૦-૧૫ મિનિટ માટે ઢાંકીને રાખો જેથી તે બરાબર સેટ થઈ જાય.
2. મસાલાનો વઘાર
એક પેનમાં તેલ ગરમ કરો. તેમાં હિંગ અને રાઈનો વઘાર કરો. ત્યારબાદ અધકચરી વરિયાળી, જીરું અને આખા ધાણા ઉમેરીને હળવા સાંતળો. આ મસાલા વડીને અસલી દેશી ફ્લેવર આપશે.
3. નારિયેળ અને તલનું મિશ્રણ
વઘારમાં સફેદ તલ, ખસખસ અને છીણેલું સૂકું નારિયેળ ઉમેરો. આ સામગ્રી મસાલાને સરસ ટેક્સચર અને સોડમ આપશે. નારિયેળ હળવું ગુલાબી થાય ત્યાં સુધી તેને ધીમી આંચ પર શેકો.
4. મસાલાનું પરફેક્ટ બેલેન્સ
હવે તેમાં અધકચરી પીસેલી શેકેલી સીંગનો ભૂકો ઉમેરો. સાથે જ મીઠું, લાલ મરચું, ધાણાજીરું અને હળદર નાખો. સ્વાદને બેલેન્સ કરવા માટે થોડી ખાંડ અને આમચૂર પાવડર ખાસ ઉમેરવો, કારણ કે ખાટો-મીઠો સ્વાદ જ સાંભર વડીની ખાસિયત છે.
5. તાજી કોથમીરનો જાદુ
મસાલો તૈયાર થઈ જાય એટલે ગેસ બંધ કરી દો. હવે તેમાં પુષ્કળ પ્રમાણમાં ઝીણી સમારેલી તાજી કોથમીર (ધાણા) ઉમેરો. ધ્યાન રાખવું કે કોથમીર નાખ્યા પછી મસાલાને રાંધવો નહીં, જેથી તેની તાજગી અને લીલો રંગ જળવાઈ રહે.
6. વડીને આકાર આપવાની રીત
બાંધેલા લોટમાંથી લુઆ પાડીને તેને પાતળી રોટલીની જેમ વણી લો. રોટલી પર હળવી ચટણી લગાવો અને વચ્ચે તૈયાર કરેલું સ્ટફિંગ (મસાલો) મૂકો. હવે તેને સાવચેતીથી રોલ કરો અને તેની કિનારીઓ બરાબર પેક કરી દો જેથી તળતી વખતે મસાલો બહાર ન આવે.
7. તળવાની રીત અને સર્વિંગ
એક કડાઈમાં તેલ ગરમ કરો. તૈયાર કરેલા રોલ્સને મધ્યમ આંચ પર તળો. તે એકદમ ગોલ્ડન અને કુરકુરા થાય ત્યાં સુધી તળવા. તૈયાર છે ગરમાગરમ સાંભર વડી! તેને ત્રાસી કાપીને ગ્રીન ચટણી, સાંભર કે કઢી સાથે સર્વ કરો.
