VIDEO: તમિલનાડુના મુખ્યમંત્રી થલપથી વિજય ત્રિશા સાથે યુકે કેમ પહોંચ્યા? DMKના આકરા પ્રહાર
છેલ્લું અપડેટ : 14 Sept 2026
સોર્સ : gstv
તમિલનાડુના મુખ્યમંત્રી થલપતિ વિજય ફરી એકવાર વિવાદમાં સપડાયા છે. તેમની યુકે (UK)ની સત્તાવાર મુલાકાત રોકાણકારો સાથે બેઠક કરવાના હેતુથી હતી; જોકે, શનિવારે અભિનેતા અજીત અને અભિનેત્રી ત્રિશા સાથે જોવા મળ્યા બાદ મુખ્ય વિરોધ પક્ષ DMKએ તેમની આકરી ટીકા કરી હતી. DMKએ ટિપ્પણી કરી હતી કે જ્યારે તમિલનાડુની જનતા મુશ્કેલીઓનો સામનો કરી રહી છે, ત્યારે તેમના મુખ્યમંત્રી મિત્રની કાર રેસ જોવા માટે લંડન ગયા છે.
શનિવારે સોશિયલ મીડિયા પર એક વીડિયો વાયરલ થયો હતો જેમાં થલપતિ વિજય અને તમિલ અભિનેતા અજીત મસ્તીભર્યા મૂડમાં જોવા મળ્યા હતા. આ ઘટના બાદ DMKના પ્રવક્તા ટી.કે.એસ. ઈલાંગોવને તેમની આકરી ટીકા કરતા કહ્યું, "મુખ્યમંત્રીએ કહ્યું હતું કે તેઓ રોકાણ આકર્ષવા માટે લંડન જઈ રહ્યા છે. પરંતુ સૌએ જોયું કે તેઓ ત્યાં તેમના મિત્રની કાર રેસ જોવા ગયા હતા."
આ પણ વાંચો: લંડનમાં મિત્રને જોઈને થલપતિ વિજય પોતાની લાગણી રોકી શક્યા નહીં; દોડીને તેમને ગળે લગાડ્યા.
થલપતિ વિજય પર DMKનો પ્રહાર
ઈલાંગોવન ઉપરાંત, DMKના ધારાસભ્ય માર્કન્ડેયને પણ વિજયની લંડન યાત્રાની ટીકા કરતા આકરા પ્રહારો કર્યા હતા. તેમણે કહ્યું, "મુખ્યમંત્રી વિજય લંડનમાં છે. અહીં આપણા રાજ્યમાં ખેડૂતો, માછીમારો અને અન્ય ઘણા લોકો સંબંધિત સમસ્યાઓ છે. તે સમસ્યાઓનું નિરાકરણ લાવવું પ્રાથમિકતા હતી; રોકાણકારો સાથેની વાતચીત પછી પણ થઈ શકતી હતી."
ઉલ્લેખનીય છે કે થલપતિ વિજય તમિલનાડુની રાજધાની ચેન્નાઈમાં 'મોટરસ્પોર્ટ્સ સિટી' બનાવવાની યોજના પર વિચાર કરી રહ્યા છે. આ સંદર્ભમાં, તેઓ વિશ્વ-સ્તરીય સુવિધાઓનું નિરીક્ષણ કરવા માટે લંડન ગયા છે.
વિજયની પાર્ટીનો પણ DMK પર વળતો પ્રહાર
થલપતિ વિજય વિશે સવાલો ઉઠાવવામાં આવ્યા બાદ, તેમની પાર્ટીએ પણ DMK સામે વળતો પ્રહાર કર્યો હતો. NDTV સાથે વાત કરતા TVKના પ્રવક્તા નારાયણને કહ્યું, "આ લોકો (DMK સભ્યો) ન તો રાજકારણ સમજે છે કે ન તો બાબતોનું સંચાલન કેવી રીતે કરવું તે જાણે છે. તેથી જ જનતાએ તેમને સત્તા પરથી દૂર કર્યા છે."
તેમણે વધુમાં ઉમેર્યું, "તેઓ માત્ર પ્રસિદ્ધિ અને દેખાડામાં માને છે, જ્યારે આપણા મુખ્યમંત્રી વાસ્તવમાં કામ કરી રહ્યા છે. મુલાકાત દરમિયાન કોઈ મિત્રને મળવામાં કંઈ ખોટું નથી." "તેઓ અજીત વિશે વાત કરી રહ્યા છે, અને અજીત માત્ર તમિલનાડુમાં જ નહીં પરંતુ રેસિંગની દુનિયામાં પણ એક સ્ટાર છે. જ્યારે તમિલનાડુના મુખ્યમંત્રી તેમને મળવા જાય છે, ત્યારે તેનાથી 'બ્રાન્ડ તમિલનાડુ'નું કદ વધે છે. તેઓ આપણી ઈર્ષ્યા કરે છે, અને એટલે જ તેઓ આવું કરી રહ્યા છે."
ઉલ્લેખનીય છે કે તમિલનાડુના મુખ્યમંત્રી થલપથી વિજય હાલમાં વિદેશ પ્રવાસ પર છે. ત્યાં તેમની સાથે અભિનેત્રી ત્રિશા પણ જોવા મળી હતી. ફિલ્મ અભિનેતા અજીત સાથેનો તેમનો એક વીડિયો પણ વાયરલ થયો હતો. આ ઘટનાઓ બાદ રાજકીય ગતિવિધિઓ તેજ બની છે.
