શું છે Unified Pension Scheme - UPS, જાણો સરકારી કર્મચારીઓને કેવી રીતે કરશે ફાયદો

કેન્દ્ર સરકારે સરકારી કર્મચારીઓને મોટી ભેટ આપી છે. કેન્દ્રીય કેબિનેટે સરકારી કર્મચારીઓ માટે નવી પેન્શન સ્કીમ યુનિફાઇડ પેન્શન સ્કીમ (UPS)ને મંજૂરી આપી છે. ખાસ વાત એ છે કે જે લોકો 2004 થી માર્ચ 2025 સુધી નિવૃત્ત થયા છે તેમને પણ આ પેન્શન યોજનાનો લાભ મળશે. આ ઉપરાંત તેમને વ્યાજની સાથે એરિયર્સ પણ મળશે.

કેન્દ્ર સરકારે જણાવ્યું કે વિશ્વભરના દેશોમાં ઉપલબ્ધ યોજનાઓ જોયા બાદ અને ઘણા લોકો સાથે ચર્ચા કર્યા બાદ યુનિફાઇડ પેન્શન સ્કીમનું સૂચન કરવામાં આવ્યું હતું. જે બાદ કેબિનેટે તેને મંજૂરી આપી દીધી છે. સરકારી કર્મચારીઓ NPS અને UPSમાં જે પણ સ્કીમ ઈચ્છે તે લઈ શકે છે. આવી સ્થિતિમાં કર્મચારીઓ બેમાંથી એક પેન્શન યોજનાનો લાભ લઈ શકશે.

કેન્દ્ર સરકારના 23 લાખ કર્મચારીઓને આ યોજનાનો લાભ મળશે. યુપીએસમાં સરકારનું યોગદાન 18.5% રહેશે. આ યોજના 1 એપ્રિલ, 2025 થી લાગુ કરવામાં આવશે.

જાણો આ યોજના વિશેની 4 મહત્વની બાબતો?

• કર્મચારીઓ પાસેથી ખાતરીપૂર્વકની રકમની માંગણી કરવામાં આવી રહી હતી. યુપીએસ હેઠળ, કર્મચારીઓને નિવૃત્તિ પછી 50% ખાતરીપૂર્વકનું પેન્શન આપવામાં આવશે. આ નિવૃત્તિ પહેલાના 12 મહિનાના સરેરાશ મૂળભૂત પગારના 50% હશે.
• કર્મચારીઓને આ પેન્શન 25 વર્ષની સેવા પછી જ મળશે.
• જો કોઈ કર્મચારીનું મૃત્યુ થાય છે, તો આ યોજના હેઠળ ફેમિલી પેન્શનની જોગવાઈ હશે. આ અંતર્ગત પરિવારને 60 ટકા પેન્શન મળશે.
• જો કોઈ કર્મચારીની સેવા 25 વર્ષથી ઓછી છે, તો તેને દર મહિને 10000 રૂપિયા પેન્શન મળશે.