VIDEO: "અમે મુખ્ય ચૂંટણી અધિકારીની કચેરીએ ગયા તેમાં ભાજપને શું વાંધો છે? CEO ઓફિસ પહોંચતા જ પ્રિયંક ખડગે ભડક્યા
છેલ્લું અપડેટ : 03 Oct 2026
કર્ણાટકની રાજધાની બેંગલુરુમાં કોંગ્રેસના એક ઉચ્ચ સ્તરીય પ્રતિનિધિમંડળે મુખ્ય ચૂંટણી અધિકારીની કચેરીની મુલાકાત લીધા બાદ રાજકારણ ગરમાયું છે. ભાજપ દ્વારા આ મુલાકાત સામે સવાલો ઉઠાવવામાં આવતાં કર્ણાટક સરકારના મંત્રી પ્રિયંક ખડગેએ આકરા તેવર અપનાવી ભાજપ અને ચૂંટણી પ્રક્રિયા પર ગંભીર આક્ષેપો કર્યા છે.
પ્રિયંક ખડગેએ ભાજપના વાંધા સામે વળતો પ્રહાર કરતાં કહ્યું કે, "અમે મુખ્ય ચૂંટણી અધિકારીની કચેરીએ ગયા તેમાં ભાજપને શું વાંધો છે? જો અમને ભારતીય ચૂંટણી પંચ (ECI) સાથે કોઈ પ્રશ્ન કે સમસ્યા હોય તો તેની સાથે ભાજપને શું લેવાદેવા? જો તેમને કોઈ તકલીફ હોય તો તેઓ ફરિયાદ કરે. ભાજપ આખરે શા માટે ચૂંટણી પંચ કે મુખ્ય ચૂંટણી અધિકારીના પ્રવક્તા હોય તેવું વર્તન કરી રહી છે? અને અમે કયા નિયમોનું ઉલ્લંઘન કર્યું છે?"
પોલીસ કે નિયમભંગના દાવાઓ પર આક્રોશ વ્યક્ત કરતા તેમણે RSSની પ્રવૃત્તિઓનો ઉલ્લેખ કર્યો હતો: "RSS બેંગલુરુમાં ચારેબાજુ કૂચ અને પથસંચલન કાઢે છે. કેટલી? 512 જેટલી કૂચ! તો શું મારે તે તમામ સામે પણ FIR નોંધાવી દેવી જોઈએ? અમે તો શાંતિપૂર્વક ઓફિસની અંદર હતા અને સીઈઓ સાથે ચર્ચા કરી રહ્યા હતા. ખુદ સીઈઓએ વિનંતી કરી હતી કે તેમણે ભારતના ચૂંટણી પંચ સાથે વાત કરવી પડશે અને મુખ્ય ચૂંટણી કમિશનર (CEC) પાસેથી નિર્દેશો લેવા પડશે."
મતદાર યાદીમાંથી જથ્થાબંધ નામ હટાવવાના ષડયંત્રનો આરોપ
પ્રિયંક ખડગેએ મતદાર યાદીમાં ગેરરીતિ થઈ રહી હોવાનો સીધો આરોપ લગાવતાં કહ્યું કે ભાજપે આ બાબતે જવાબ આપવો જોઈએ. તેમણે જણાવ્યું કે, "ભાજપે ખુલાસો કરવો જોઈએ કે તેમની પાસે પહેલેથી છપાયેલા (પ્રિ-પ્રિન્ટેડ) ફોર્મ ક્યાંથી આવી રહ્યા છે? જે કાર્યકરો બૂથ લેવલ એજન્ટ (BLA) નથી, તેઓ કચેરીઓમાં જઈને મતદારોના નામો જથ્થાબંધ રીતે રદ કરવાની માંગણી કેમ કરી રહ્યા છે? ફોર્મમાં બધું પહેલેથી છાપેલું છે, અને મતદારનું નામ શા માટે કાપવું જોઈએ તે કારણ પણ પહેલેથી છપાયેલું છે. શું આ ખુલ્લેઆમ નિયમોનું ઉલ્લંઘન નથી?"
કોંગ્રેસ પ્રતિનિધિમંડળની આ મુલાકાત અને ખડગેના આકરા વલણથી કર્ણાટકમાં મતદાર યાદી સુધારણા અને ચૂંટણી પંચની સ્વાયત્તતા મુદ્દે શાસક પક્ષ કોંગ્રેસ અને વિપક્ષ ભાજપ વચ્ચે મોટો વિવાદ છેડાઈ ગયો છે.