"અમેરિકાએ ઇરાક છોડવું જ પડશે! ૩૦ સપ્ટેમ્બરની ડેડલાઇન નક્કી થતાં જ મિડલ ઈસ્ટના રાજકારણમાં ખળભળાટ!"
છેલ્લું અપડેટ : 13 Aug 2026
લગભગ 23 વર્ષ બાદ ઇરાકમાં અમેરિકી સૈન્યની હાજરી હવે સત્તાવાર રીતે પૂરી થવા જઈ રહી છે. ઇરાકના વડાપ્રધાન અલી અલ-ઝૈદીના કાર્યાલય દ્વારા આ અંગેની મોટી જાહેરાત કરવામાં આવી છે. આગામી 30 સપ્ટેમ્બર 2026 સુધીમાં તમામ અમેરિકી સૈનિકો ઇરાક છોડીને પરત ફરી જશે. અમેરિકી સેન્ટ્રલ કમાન્ડ (CENTCOM) ના પ્રમુખ એડમિરલ બ્રાડ કૂપર સાથેની બેઠક બાદ આ મહત્ત્વપૂર્ણ નિર્ણયની પુષ્ટિ કરવામાં આવી છે.
23 વર્ષ જૂના સૈન્ય ઇતિહાસનો અંત
ઇરાકમાં અમેરિકી સૈન્યની હાજરીની શરૂઆત વર્ષ 2003માં થઈ હતી, જ્યારે અમેરિકાએ તત્કાલીન રાષ્ટ્રપ્રમુખ સદ્દામ હુસેનના શાસનને હટાવવા માટે અભિયાન શરૂ કર્યું હતું. વર્ષ 2011માં સૈનિકો પાછા બોલાવાયા હતા, પરંતુ વર્ષ 2014માં ISIS ના જોખમને કારણે સૈનિકોની ફરીથી તહેનાતી કરાઈ હતી. હવે 30 સપ્ટેમ્બરના રોજ ઇરાકમાં અમેરિકી સેનાની 23 વર્ષ લાંબી હાજરીનો ઔપચારિક અંત આવશે.
સૈનિકોની વાપસી માટે 30 સપ્ટેમ્બરની ડેડલાઇન
વડાપ્રધાન અલી અલ-ઝૈદીના કાર્યાલયના નિવેદન મુજબ, ISIS વિરુદ્ધના સૈન્ય મિશનને સમાપ્ત કરવા માટે 30 સપ્ટેમ્બરની તારીખ અંતિમ નક્કી કરાઈ છે. આગામી 1 ઓક્ટોબરથી ઇરાક માટે એક નવા યુગની શરૂઆત થશે, કારણ કે દેશ કોઈપણ વિદેશી સૈન્ય હાજરીથી મુક્ત થઈ જશે. ઉત્તરી કુર્દ ક્ષેત્ર અર્બિલમાંથી સૈનિકો અને સાધનો હટાવવાની પ્રક્રિયા અગાઉથી જ શરૂ થઈ ચૂકી છે.
બદલાતા વ્યૂહાત્મક સમીકરણો અને કરાર
આ સૈન્ય વાપસી એવા સમયે થઈ રહી છે જ્યારે મધ્ય-પૂર્વમાં અમેરિકા અને ઈરાન વચ્ચે તણાવ યથાવત છે. વર્ષ 2024માં થયેલા દ્વિપક્ષીય સમજૂતીના ભાગરૂપે આ સૈન્ય અભિયાનોને તબક્કાવાર રીતે બંધ કરવામાં આવી રહ્યા છે. અમેરિકી અધિકારીઓએ પણ પુષ્ટિ કરી છે કે નિર્ધારિત સમયસીમામાં સૈન્ય વાપસીની પ્રક્રિયા સફળતાપૂર્વક પૂર્ણ કરી લેવામાં આવશે.
