ક્યાંક વાહનો પાણીમાં ગરકાવ, તો ક્યાંક સોસાયટીઓ જળમગ્ન... કશ્મીરથી ગુજરાત સુધી 'જળ પ્રલય'
છેલ્લું અપડેટ : 24 Jul 2026
દેશના અનેક ભાગોમાં મુસળધાર વરસાદને કારણે સ્થિતિ વણસી છે. કશ્મીરથી લઈને ગુજરાત સુધી આફતનો વરસાદ ચાલુ છે. ભારે વરસાદના કારણે લોકોનું જનજીવન ભારે પ્રભાવિત થયું છે. મોન્સૂનના આગમનની સાથે જ દેશના અલગ-અલગ વિસ્તારોમાં ધોધમાર વરસાદ પડી રહ્યો છે. મહારાષ્ટ્ર, જમ્મુ-કશ્મીર અને ગુજરાતમાં સ્થિતિ સૌથી વધુ કફોડી બની છે. અહીં નદી-નાળાઓ ઉભરાઈ રહ્યા છે, લોકોના ઘરોમાં પાણી ઘૂસી ગયા છે, રસ્તાઓ જળમગ્ન બન્યા છે અને નદીઓનું સ્તર ભયજનક સપાટીથી ઉપર વહી રહ્યું છે.
કેટલાંક વિસ્તારોમાં તો સ્થિતિ એટલી ખરાબ છે કે લોકોને ઓફિસ કે અન્ય કામકાજ માટે જવા હોડીઓનો સહારા લેવો પડી રહ્યો છે.
ગુજરાતમાં ભારે વરસાદથી આફત
ગુજરાતના પણ ઘણા વિસ્તારો ભારે વરસાદથી પ્રભાવિત થયા છે. નવસારી, અમદાવાદ, સુરત અને વલસાડમાં સ્થિતિ સૌથી વધુ ખરાબ છે. નવસારીના કેટલાય વિસ્તારો પૂરના પાણીમાં ડૂબી ગયા છે અને વાહનો તણાઈ કે ડૂબી ગયા છે.
પ્રભાવિત વિસ્તારોમાંથી લોકોને સલામત બહાર કાઢવા માટે NDRF દ્વારા મોટા પાયે બચાવ કામગીરી (રેસ્ક્યૂ ઓપરેશન) ચલાવવામાં આવી રહી છે. નવસારીના સારીખુરદ ગામમાં પૂરના પાણીમાં ફસાયેલા ૨૫ મહિલાઓ અને ૨૨ બાળકો સહિત કુલ ૬૭ લોકોને NDRF ની ટીમ દ્વારા બચાવી લેવાયા છે.
ઉત્તરાખંડમાં નદીઓનું જળસ્તર વધ્યું
દેવભૂમિ ઉત્તરાખંડની વાત કરીએ તો અહીં પણ મોન્સૂન થંભવાનું નામ નથી લઈ રહ્યું. પહાડી અને ઉપરના વિસ્તારોમાં ધોધમાર વરસાદને કારણે અલકનંદા અને મંદાકિની નદીઓનું જળસ્તર ભયજનક સપાટીની ખૂબ નજીક પહોંચી ગયું છે. નદીઓમાં પૂર જેવી સ્થિતિને કારણે સ્થાનિક લોકોની દિનચર્યા પર માઠી અસર પડી છે.
જમ્મુ-કશ્મીરમાં એલર્ટ
જમ્મુ-કશ્મીરમાં પણ મુસળધાર વરસાદને લીધે સ્થિતિ સતત બિચકી રહી છે.
-
અનંતનાગ: સતત વરસાદને કારણે ઝેલમ નદીનું જળસ્તર વધી રહ્યું છે, જેના પગલે તંત્ર દ્વારા વિસ્તારમાં એલર્ટ જારી કરી દેવામાં આવ્યું છે.
-
રિયાસી: સતત વરસાદ અને ચિનાબ નદીમાં પાણીની આવક વધતાં સલાલ ડેમના અનેક દરવાજા ખોલી દેવાયા છે. નીચાણવાળા વિસ્તારોના લોકોને સાવચેતી રાખવાની સલાહ આપવામાં આવી છે.
મહારાષ્ટ્રમાં ડેમ છલકાયા
મહારાષ્ટ્રમાં પણ ચોમાસાની શરૂઆત સાથે જ ધોધમાર વરસાદ શરૂ થઈ ગયો છે. અનેક વિસ્તારો પાણીમાં ડૂબી ગયા છે. ભારે વરસાદના કારણે પવના ડેમ તેની ક્ષમતાના ૯૫% સુધી ભરાઈ ગયો છે.
