'નીતીશ સેતુ'ના ઉદ્ઘાટન સમયે જોવા મળી મોદી-નીતીશની ખાસ બોન્ડિંગ, બંને નેતાઓ ઉષ્માભેર મળ્યા

વડાપ્રધાન નરેન્દ્ર મોદી શનિવારે (21 નવેમ્બર, 2026) બિહારના વૈશાલી જિલ્લાની મુલાકાતે પહોંચ્યા છે, જ્યાં તેઓ રાજ્યને અંદાજે ₹34,470 કરોડની વિવિધ વિકાસ પરિયોજનાઓની ભેટ આપશે. આ પ્રવાસનું મુખ્ય આકર્ષણ કચ્ચી દરગાહ અને બિદુપુર વચ્ચે ગંગા નદી પર બનેલા 9.76 કિલોમીટર લાંબા છ-લેનના 'નીતીશ સેતુ'નું ઉદ્ઘાટન છે. પૂર્વ મુખ્યમંત્રી નીતીશ કુમારના નામ પરથી રાખવામાં આવેલા આ પુલના નામકરણને લઈને બિહારનું રાજકારણ ગરમાયું છે અને સત્તાપક્ષ તથા વિપક્ષ સામસામે આવી ગયા છે.
₹34,470 કરોડના પ્રોજેક્ટ્સ અને મુખ્ય આકર્ષણો વડાપ્રધાન મોદી બપોરે અંદાજે 2 વાગ્યે રોડ કનેક્ટિવિટી, ઉર્જા, શહેરી માળખાગત સુવિધા, જળ સંસાધન, શિક્ષણ, આરોગ્ય અને પરિવહન ક્ષેત્રે વિવિધ પરિયોજનાઓનું ઉદ્ઘાટન અને શિલાન્યાસ કરશે. આ ઉપરાંત રાજ્યમાં પર્યાવરણને અનુકૂળ જાહેર પરિવહનને પ્રોત્સાહન આપવા 100 ઈલેક્ટ્રિક બસોને લીલી ઝંડી બતાવવામાં આવશે. પ્રધાનમંત્રી આવાસ યોજના (શહેરી) હેઠળ 26,900 થી વધુ લાભાર્થીઓના ગૃહ પ્રવેશના કાર્યક્રમો યોજાશે. 'નીતીશ સેતુ' વૈશાલીના બિદુપુર બ્લોકને પટનાના કચ્ચી દરગાહ સાથે જોડે છે, જેનાથી ઉત્તર અને દક્ષિણ બિહાર વચ્ચેનો પ્રવાસ અત્યંત સરળ બનશે.
નામકરણ પર વિપક્ષના પ્રહાર
પુલનું નામ 'નીતીશ સેતુ' રાખવા પર કોંગ્રેસ અને RJD એ આકરા સવાલો ઉઠાવ્યા છે. કોંગ્રેસ નેતા પવન ખેડાએ કચ્ચી દરગાહ-બિદુપુર પુલનું નામ દસમા શીખ ગુરુ, ગુરુ ગોવિંદ સિંહજીના બદલે નીતીશ કુમારના નામ પર રાખવા સામે વાંધો ઉઠાવ્યો હતો. તેમણે કહ્યું કે આ રીતે નામ બદલવાથી શીખ સમુદાયની લાગણી દુભાય છે. RJD નેતા તેજસ્વી યાદવે PM મોદી પર નિશાન સાધતા કહ્યું કે, "વડાપ્રધાને બિહાર આવતા પહેલા અરીસા સામે ઊભા રહીને વિચારવું જોઈએ કે જે સેતુનું તેઓ ઉદ્ઘાટન કરવા આવી રહ્યા છે, તેમાં તેમનું એક કણ કે ફૂટી કોડીનું પણ યોગદાન કેમ નથી?"
NDA નેતાઓ અને નીતીશ કુમારના પુત્રએ કર્યું સ્વાગત
બીજી તરફ, સત્તાધારી ગઠબંધનના નેતાઓએ આ નિર્ણયને આવકાર્યો છે. બિહારના આરોગ્ય મંત્રી અને નીતીશ કુમારના પુત્ર નિશાંત કુમારે પુલનું નામ તેમના પિતાના નામ પર રાખવા બદલ વડાપ્રધાન અને મુખ્યમંત્રીનો આભાર માન્યો હતો. તેમણે કહ્યું કે આ તેમના પિતાના વિઝન અને બિહારના વિકાસ પ્રત્યેની પ્રતિબદ્ધતાનું સન્માન છે.
જીતન રામ માંઝી અને ચિરાગ પાસવાન
કેન્દ્રીય મંત્રી જીતન રામ માંઝીએ કહ્યું કે નીતીશ કુમારે 20 વર્ષ સુધી બિહારની સેવા કરી છે અને આ તેમનું યોગ્ય સન્માન છે. જ્યારે કેન્દ્રીય મંત્રી ચિરાગ પાસવાને જણાવ્યું કે તેમના પિતા રામવિલાસ પાસવાનનું તેમના સંસદીય ક્ષેત્રને પટનાની મુખ્યધારા સાથે જોડવાનું દાયકાઓ જૂનું સપનું આજે પૂર્ણ થઈ રહ્યું છે.










