પીડીપી નેતાએ બુરહાન વાનીને શહીદ ગણાવ્યો; આતંકવાદીનું મહિમામંડન કર્યા બાદ અબ્દુલ કબીરની ધરપકડ
છેલ્લું અપડેટ : 09 Oct 2026
જમ્મુ-કાશ્મીરમાં મહેબૂબા મુફ્તીની પાર્ટી PDPના વરિષ્ઠ નેતા અબ્દુલ કબીરે કિશ્તવાડમાં પાર્ટીના એક કાર્યક્રમ દરમિયાન વિવાદાસ્પદ નિવેદન આપ્યું હતું. તેમણે હિઝબુલ મુજાહિદ્દીનના કમાન્ડર બુરહાન વાનીના વખાણ કરતા તેને 'શહીદ' ગણાવ્યો હતો. આ નિવેદનને કારણે વિવાદ સર્જાયો હતો અને હવે મળતા અહેવાલો મુજબ તેમની ધરપકડ કરવામાં આવી છે. આતંકવાદીના વખાણ કરતા તેમણે કહ્યું હતું કે, "જ્યારે બુરહાન વાની શહીદ થયો, ત્યારે ભાજપના નેતાઓ વળતર સાથે તેના ઘરે ગયા હતા."
જ્યારે પત્રકારોએ PDP નેતા અબ્દુલ કબીરને પૂછ્યું કે તેઓ કોઈ આતંકવાદીને 'શહીદ' તરીકે કેવી રીતે સંબોધી શકે, ત્યારે તેઓ પોતાની વાત પર અડગ રહ્યા. વળતો જવાબ આપતા તેમણે કહ્યું, "હું તેને શું કહું તે મારી પસંદગી છે. આપણે લોકશાહી દેશમાં રહીએ છીએ અને આપણને જે અનુભવાય તે વ્યક્ત કરવાની સ્વતંત્રતા છે."
અહીં એ નોંધવું જરૂરી છે કે હિઝબુલ મુજાહિદ્દીનનો 'પોસ્ટર બોય' ગણાતો બુરહાન વાની ૨૦૧૬માં એક અથડામણમાં માર્યો ગયો હતો.
આતંકવાદીના મહિમામંડનથી કાશ્મીરી પંડિતોમાં રોષ
PDP નેતા દ્વારા કરવામાં આવેલી પ્રશંસા બાદ રાજકીય નિવેદનબાજી તેજ બની છે. વિસ્થાપિત કાશ્મીરી પંડિતોનું પ્રતિનિધિત્વ કરતી સંસ્થા 'રૂટ્સ ઇન કાશ્મીર'ના પ્રવક્તા અમિત રૈનાએ આતંકવાદીના વખાણ કરવા બદલ PDP નેતાની ટીકા કરી હતી. રૈનાએ કહ્યું, "આતંકવાદી કમાન્ડરને શહીદ કહીને તેઓ આતંકવાદી હુમલાના પીડિતોના પરિવારોની વેદના પર મીઠું ભભરાવી રહ્યા છે."
ભાજપ પણ રોષે ભરાયો
ભાજપે PDP પર આકરા પ્રહારો કર્યા અને પક્ષ પર આતંકવાદને પ્રોત્સાહન આપવાનો તથા તુષ્ટિકરણની રાજનીતિ કરવાનો આરોપ મૂક્યો. ભાજપના નેતા યુધવીર સેઠીએ આ નિવેદનને ચોંકાવનારું ગણાવ્યું અને માફીની માંગ કરી. સેઠીએ કહ્યું, "PDP નેતાઓએ કાશ્મીર ખીણમાં આતંકવાદ સામે લડતા પોતાના પ્રાણ ન્યોછાવર કરનારા સૈનિકોના પરિવારોની માફી માંગવી જોઈએ. આતંકવાદીઓની આવી પ્રશંસા સ્વીકાર્ય નથી."
